Mangiyapay na Saray Bagat A Makapaliket ed Si Jehova
“Diad panamegley nen [Jesu-Kristo] et sikatayon naynay so mangiyapay ed Dios na sakey a bagat na panangidayew, salanti, say bunga na saray bibil a mangiyabawag ed lapag ed ngaran to.”—HEBREOS 13:15.
1. Anto so impaseseg nen Jehova ed saray makasalanan ya Israelitas a gawaen?
SI Jehova so Mananulong ed saraman so mangiyaapay na makapaliket iran bagat ed sikato. Sirin, say pabor to so aminsan et wala ed saray Israelitas ya angiyapay na saray ayayep a bagat. Balet anto so agawa kayari na naulit-ulit ya impankasalanan da? Diad panamegley nen propeta Oseas, sikara so pinaseseg: “Ompawil ka, O Israel, ed si Jehova a Dios mo, ta sika so atumba ed inkauges mo. Alaen yoray salita tan ompawil ed si Jehova. Ikuan ed sikato, amin yon totoo, ‘Komon ta perdonaen mo so inkauges; tan awaten so maong, tan sikami so mangiyapay na saray walad kalangweran a bakan kalakian na saray bibil mi.’”—Oseas 14:1, 2.
2. Anto so ‘saray walad kalangweran a bakan kalakian na saray bibil,’ tan panon so impanukoy nen apostol Pablo ed propesiya nen Oseas?
2 Sirin saray kadaanan a totoo na Dios so apaseseg a mangiyapay ed si Jehova na ‘saray walad kalangweran a bakan kalakian na saray bibil da.’ Anto iraya? Akin, saray bagbagat na masimoon a dayew! Tutukoyen to iyan propesiya, pinaseseg nen apostol Pablo iray Hebreon Kristianos a “mangiyapay ed Dios na sakey a bagat na panangidayew, salanti, say bunga na saray bibil a mangiyabawag ed lapag ed ngaran to.” (Hebreos 13:15) Anto so ontulong ed saray Tasi nen Jehova a mangiyapay na ontan iran bagbagat natan?
“Aligen So Pananisia Ra”
3. Diad belas, anto so imbaga nen apostol Pablo ed Hebreos 13:7, a mamalesa na anton tepet?
3 Say pangiyaplika ed simbawan inter nen Pablo ed saray Hebreos so ontulong ed sikatayon mangiyapay na saray makapaliket a bagbagat ed Baleg a Mananulong tayo, si Jehova a Dios. Alimbawa, insulat na apostol: “Nonoten iraman so mangipapangulo ed sikayo, a nansalita na salita na Dios ed sikayo, tan legan a morekdeken yo no panon so nagmaliwan na ugali ra et aligen yo so pananisia ra.” (Hebreos 13:7) Siopa so tinukoy nen Pablo sanen inkuanto, “Nonoten iraman so mangipapangulo ed sikayo,” odino “mananguley ed sikayo”?—New World Translation Reference Bible, paimanod-leksab.
4. (a) Unong ed Griegon teksto, anto so gagawaen na saraman so “mangipapangulo”? (b) Siopa iraman so “mangipapangulo” ed limog na saray Tastasi nen Jehova?
4 Sinalita nen Pablo iraman so “mangipapangulo,” odino manguuley. (Heb 13 Bersikulo 7, 17, 24) Say Ingles a salitan “manguley” so inagwat ed panamegley na Latin a nanlapud Griegon ky·ber·naʹo, a kabaliksan to so “pangibegsay na baluto, pangiwanwan, panguley.” Saray Kristianon mamatatken so manguley diad pangusar ed saray “abilidad dan mangiwanwan” (Griego, ky·ber·neʹseis) diad pangiter na panangipangulo tan panangiwanwan ed saray lokal a kongregasyon. (1 Corinto 12:28) Balet saray apostoles tan arum a mamatatken ed Jerusalem so nanserbin bilang sakey ya ulop a mangiter na panangiwanwan tan simbawa ed amin a kongregasyon. (Gawa 15:1, 2, 27-29) Natan, sirin, sakey a mananguley ya ulop na mamatatken so mangitatarya na espiritual a panangimaton ed saray Tasi nen Jehova ed sankamundoan.
5. Akin tan panon a nepeg tayon ipikasi iray mamatatken na kongregasyon tan saray membro na Mananguley ya Ulop?
5 Saray lokal a mamatatken tan membro na Mananguley ya Ulop so mangipapangulo ed limog tayo; sirin, sikara so nepeg tayon respetoen tan ipikasi a sikara so ikdan na Dios na kakabatan a nakaukolan diad panguley ed kongregasyon. (Ipareng so Efeso 1:15-17.) Agaylan matukotukoy a nonoten tayo so anggan siopan ‘nansalita ed salita na Dios ed sikatayo’! Si Timoteo so binangatan na aliwa lambengat na ina to tan bai to noagta ontan met ed saginonor nen Pablo tan saray arum. (2 Timoteo 1:5, 6; 3:14) Sirin nayarian nen Timoteo a morekdeken no panon so nagmaliwan na kondukta na saraman so mangipapangulo tan akayarin mangalig ed pananisia ra.
6. Siopa pananisia so nepeg tayon aligen, balet siopa so tumboken tayo?
6 Saray ontan a sinansakey a singa si Abel, Noe, Abraham, Sara, Rahab, tan Moises so angagamil na pananisia. (Hebreos 11:1-40) Sirin, nayarian tayon aligen so pananisia ra ya anggapoy sugnar lapud sikara so inatey a matoor ed Dios. Balet nayarian tayo met ya ‘aligen so pananisia’ na saray matoor a lalakin mangipapangulo natan ed limog tayo. Siempre, agtayo tumboken iray ag-ayadyarin totoo, lapud iteteen tayoray mata tayo ed si Kristo. A singa inkuan nen Edgar J. Goodspeed a managpatalos na Biblia: “Saray bayani ed inmuna ran panaon so aliwa ran modelo na mananisia, lapud diad si Kristo so walaan na magmaong a padron . . . Say Kristianon bumabatik so nepeg a mangiyapasakey na mata to ed si Jesus.” On, si ‘Kristo so nanirap a nisesengeg ed sikatayo, ya angitilak na panuliranan ed sikatayo pian tumboken a maapit iray bakat to.’—1 Pedro 2:21; Hebreos 12:1-3.
7. Panon so nepeg a pangapekta na Hebreos 13:8 ed awawey tayo ed panirap nisesengeg ed si Jesu-Kristo?
7 Inteen to so imano ed Anak na Dios, inyarum nen Pablo: “Si Jesu-Kristo so pareho nen karuman tan natan, tan diad ando lan ando.” (Hebreos 13:8) Saray matoor a tastasin singa si Esteban tan si Santiago so angipanengneng na agnagiing a katooran, diad impanumbok ed mabiskeg a padron nen Jesus. (Gawa 7:1-60; 12:1, 2) Lapud sikara so mabulos ya ompatey bilang patumbok nen Kristo, say pananisia ra so makanan aligen tayo. Diad abenegan, diad kaplesan, tan anggan diad arapen, saray maridios a totoo so agmanbabaraan ya ompaliis a manlapud panagmak na inkamartir bilang babangatan nen Jesus.
Paliisan Iray Palson Bangat
8. Panon so panegek yo ed saray salita nen Pablo ed Hebreos 13:9?
8 Say agmanguman a personalidad nen Jesus tan saray bangabangat to so nepeg a manggawa ed sikatayon ompeket ed saman so imbangat to tan saray apostoles to. Nibaga ed saray Hebreos: “Agkayo paipapalir ed saray nanduruma tan sankailin bangabangat; ta maabig ed puso so kaikdan na biskeg diad agkanepegan a panangasi, aliwan saray naakan, ya ag-akagunggunaan na saraman so angarap ed saratan.”—Hebreos 13:9.
9. Diad antoran superyor a bengatla so inturo nen Pablo diad sulat to ed saray Hebreon Kristianos?
9 Saratan a bengatla so inturo na saray Judios a bilang say makapakelaw ya inkiiter na Ganggan ed Palandey Sinai tan say magnayon ya inkaari nen David. Balet impanengneng nen Pablo ed saray Hebreon Kristianos ya anggaman say inkiletneg na Ganggan na sipanan so makapakelaw, si Jehova so lalon mabiskeg a mantasi a tekep na saray tanda, pakelaw, mabibiskeg iran gawa, tan say panangiyutob ed masanton espiritu sanen ininaguraan so balon sipanan. (Gawa 2:1-4; Hebreos 2:2-4) Say mangatatawen a Panarian nen Kristo so agnatenyeg, a singa agawa ed mangaraldalin ya inkaari na saray Davidikon manuley nen 607 K.K.P. (Hebreos 1:8, 9; 12:28) Nagkalalo ni, titiponen nen Jehova iray alanaan ed arap na bengatlan lalon makapakelkelaw nen say mamilagron inkipatnag ed Palandey Sinai, lapud sabien da so mangatatawen a Palandey Sion.—Hebreos 12:18-27.
10. Unong ed Hebreos 13:9, diad anto a say puso so napabiskeg?
10 Saray Hebreos sirin so nankaukolan na ipaliis ed “kipalir ed saray nanduruma tan sankailin bangabangat” na Judaismo. (Galacia 5:1-6) Aliwan diad panamegley na saratan a bangabangat noagta ‘diad panamegley na agkanepegan a panangasi na Dios a say puso so napabiskeg’ ta pian mansiansian agnagiing ed katuaan. Arum so mapatnag ya angisangsang nipaakar ed tagano tan bagbagat, lapud imbaga nen Pablo a say puso so ag-agawan mabiskeg “diad saray naakan, ya ag-akagunggunaan na saraman so angarap ed saratan.” Say espiritual a gunggguna so mansumpal a manlapud maridios a debosyon tan apresasyon ed dondon, aliwan manlapud agkanepegan a kapagaan nipaakar ed panangan ed arum iran tagano tan pananumpal ed saray partikular ya agew. (Roma 14:5-9) Nagkalalo ni, say bagat nen Kristo so nanggawa ed saray bagbagat na Levita ya aliwan epektibo.—Hebreos 9:9-14; 10:5-10.
Saray Bagbagat A Makapaliket ed Dios
11. (a) Anto so belas na saray salita nen Pablo ed Hebreos 13:10, 11? (b) Anton piguratibon altar so wala ed saray Kristianos?
11 Saray Leviticon saserdote so angan na karne a manlapud saray imbagat ya ayayep, balet insulat nen Pablo: “Walaan kami na sakey ya altar a saramay manggawa na sagradon lingkor ed tolda [say tabernakulo] so andian na pakauley a mangan. Ta saray laman na saraman ya ayayep a say dala ra so inloob ed masanton pasen na atagey a saserdote nisesengeg ed kasalanan so pinoolan ed paway na kampamento” ed Agew na Pananakbong. (Hebreos 13:10, 11; Levitico 16:27; 1 Corinto 9:13) Saray Kristianos so walaan na piguratibon altar a mangituturo na iyaasingger ed Dios diad letnegan na bagat nen Kristo a manakbong ed kasalanan tan mansumpal diad panamerdona nen Jehova tan kilalaban a mamaarap ed maandon bilay.
12. Diad Hebreos 13:12-14, anto so nipaseseg ed saray alanaan a Kristianos a gawaen?
12 Ag-indesdes nen Pablo so panulibayan ed Agew na Pananakbong, ingen ta inyarum to: “Sirin si Jesus met, pian komon et pasantosen to so totoo ed dilin dala to, so nanirap ed paway na wangalan” na Jerusalem. Diman et si Kristo so inatey tan angitarya na sigpot ya epektibon mananakbong a bagat. (Hebreos 13:12; Juan 19:17; 1 Juan 2:1, 2) Pinaseseg nen apostol Pablo iray kapara ton alanaan a Kristianos: “Sikatayo, sirin, so onla ed sikato [Kristo] ed paway na kampamento, ya itepel tayo so balaw a sinagmak to, lapud andian itayo dia na sakey a syudad a mantultuloy, noagta sikatayo so magunaet a manaanap ed samay sakey ya onsabi.” (Hebreos 13:13, 14; Levitico 16:10) Anggaman sikatayo so binalaw a singa si Jesus, sikatayo so mansungdo a bilang Tastasi nen Jehova. Sikatayo so ‘mangipukay ed ag-inkamaridios tan saray minumundon pilalek tan manbilay ed mabunigas a nonot tan diad inkatunong tan maridios a debosyon ed pegley na sayan peles a sistema na bengabengatla’ ambegyan onnenengneng ed balon mundo. (Tito 2:11-14; 2 Pedro 3:13; 1 Juan 2:15-17) Tan saray alanaan ed limog tayo so magunaet a manaanap ed “syudad,” say mangatatawen a Panarian.—Hebreos 12:22.
13. Saray bagbagat a makapaliket ed Dios so agmanugyop lambengatla na anto?
13 Ontumbok a sinalambit nen Pablo iray bagbagat a makapaliket ed Dios, ya insulat to: “Diad panamegley to [si Jesus] et sikatayon naynay so mangiyapay ed Dios na sakey a bagat na panangidayew, salanti, say bunga na saray bibil a manangiyabawag ed lapag ed ngaran to. Nagkalalo ni, aglilingwanan so panaggawa na maong tan say panangipanabang na bengatla ed arum, lapud diad ontan iran bagat et say Dios so napaliket a maong.” (Hebreos 13:15, 16) Saray Kristianon bagat so agmanugyop na basta saray gawa na inkapanangasi. Saray totoo ed inkalapagan so manggagawa na ontan. Alimbawa, saya so agawa sanen saray totoo ed dakel a nasyones so tinmulong ed saray biktima na yegyeg ed Sobyet Armenya ed saginonor a 1988.
14. Say pangiyapay ed Dios na makapaliket a bagat so mangidanet ed anton kimey?
14 Say sagradon lingkor ya isasaklang tayo ed si Jehova a “tekep na maridios a takot tan galang” so niletneg ed dilin-sakripisyon nengneng na aro ya impatnag nen Jesus. (Hebreos 12:28; Juan 13:34; 15:13) Sayan serbisyo so mangidadanet ed kimey na panagpulong tayo, lapud diad panamegley nen Kristo bilang Atagey a Saserdote et ‘mangiyapay itayo ed Dios na sakey a bagat na panangidayew, say bunga na saray bibil a manangiyabawag ed lapag ed ngaran to.’ (Oseas 14:2 Roma 10:10-15; Hebreos 7:26) Siempre, “agtayo lilingwanan so panaggawa na maong tan say panangipanabang na bengatla ed arum,” a mangisakup, ed anggan, saray arum nen “say saraman so misiglaotan ed sikatayo ed pananisia.” (Galacia 6:10) Nagkalautla sano saray kaparan Kristianos so managmak na desyang odino walad pankaukolan odino irap, ya isaklang tayo so maaron tulong a materyal tan espiritual. Akin? Lapud sikatayo so manaarowan ed balang sinansakey. Sikara met so labay tayon makayarin mantultuloy a malet ed lapag a panangiyabawag ed ilalo ra ya anggapo so ikapuy, “lapud diad ontan iran bagat et say Dios so napaliket a maong.”—Hebreos 10:23-25; Santiago 1:27.
Pauleyan
15. (a) Panon yon segeken so simbawa na Hebreos 13:17? (b) Akin ya ipanengneng so respeto ed saraman so mangipapangulo?
15 Pian nisaklang iray makapaliket a bagat, nepeg a sikatayo so mikooperan sigpot ed organisasyon na Dios. Agto uulileken so pamaakaran na autoridad, insulat nen Pablo: “Matulok ed saraman so mangipapangulo ed limog yo tan pauleyan, lapud sikara so manbabantay ed saray kakamarerwa yo a singa saraman so mangisaklang na pipapalinewan; pian saya komon so gawaen da a tekep na gayaga tan aliwan panermen, lapud saya so makaderal ed sikayo.” (Hebreos 13:17) Nepeg tayon respetoen iray aturon mamatatken a mangipapangulo ed kongregasyon, ta pian sikara so agmanermen ed kagonigon diad kakulangan na kooperasyon tayo. Say isaew tayon manpauley so mansumpal a makapabelat ed saray manangasikaso tan manresulta ed espiritual a kasakitan tayo. Say kooperatibon espiritu so manggawan magmainomay ed saray mamatatken so pangiteen na talabay tan ontulong ed pankakasakey tan diad aligwas na kimey ed panangipulong-ed-Panarian.—Salmo 133:1-3.
16. Akin a matukoy so pampauley ed saraman so mangipapangulo ed limog tayo?
16 Agaylan matukotukoy a sikatayo so pauleyan ed saraman so mangipapangulo! Sikara so manbabangat ed saray miting tayo tan tulongan da itayo ed ministeryo. Bilang managpastol, anapen da so pankaabiganan tayo. (1 Pedro 5:2, 3) Tulongan da itayon mamasiansia na maabig a relasyon ed Dios tan diad kongregasyon. (Gawa 20:28-30) Diad isuko ed makabat tan maaron panangasikaso, ipapanengneng tayo so respeto ed Supremon Manangasikaso, si Jehova a Dios, tan say Manangilaman a Manangasikaso to, si Jesu-Kristo.—1 Pedro 2:25; Apocalipsis 1:1; 2:1–3:22.
Mapikasi
17. Antoran pikakasi so kinerew nen Pablo, tan akin a nayarian ton manepeg a kerewen ed sikara?
17 Lapud si Pablo tan saray kakaiba to so nisian a manlapud saray Hebreos, anganko lapud panamasegsegang, inkuanto: “Mantultuloy a sikami so ipikasi, ta matalek kami a walaan kami na matuan konsiensia, unong a kaliktan min ikiwas so inkasikamin simamatua ed amin a bengatla. Balet sikayo so nagkalalon bilinen mi a manggawa ed saya, pian komon siak so nipawil ed sikayo a magano.” (Hebreos 13:18, 19) No si Pablo so sakey a toon pikewet a walaan na epel a konsiensia, anton kanepegan so wala ed sikato ya onkerew ed saray Hebreos a mangipikasin sikato so makapikasakey ed sikara? (Uliran 3:32; 1 Timoteo 4:1, 2) Siempre, sikato so sakey a matuan ministro, a diad maabig a konsiensia et tinarangkaan toray Judaista. (Gawa 20:17-27) Si Pablo so matalek met a nayarian ton pikasakeyan iray Hebreos ed magano no sikara so angipikasi ed satan a nagawa.
18. No ilaloan tayo so arum a mangipikasi ed sikatayo, antoran tepet so nayarin tepeten tayo ed inkasikatayo?
18 Say kerew nen Pablo ed pikakasi na saray Hebreos so mangipanengneng a manepeg ed saray Kristianos so pampipikasian ed balang sinansakey, anggan diad ngaran. (Ipareng so Efeso 6:17-20.) Balet no ilaloan tayo so arum a mangipikasi ed sikatayo, agta sikatayo so singa say apostol tan seguroen a sikatayo so ‘walaan na matuan konsiensia tan ikikiwas tayo so inkasikatayon simamatua ed amin a bengatla’? Kasin sikayo so matua ed amin a pidedeneng yo? Tan kasin sikayo so walaan na parehon talek ed pikakasi a wala ed si Pablo?—1 Juan 5:14, 15.
Pansaran Salita tan Bilin
19. (a) Anto so sipipikasin kaliktan nen Pablo ed saray Hebreos? (b) Akin a say balon sipanan so andi-anggaan a sipanan?
19 Kinerew to so pikakasi na saray Hebreos, imbalikas nen Pablo so sipipikasin kaliktan, a kuanto: “Natan komon say Dios na kareenan, ya amangon a manlapud saray inaatey ed baleg a pastol na karnero diad dala na andi-anggaan a sipanan, say Katawan a Jesus, so manginlong ed sikayo ed amin a bengatlan maong diad panggawa na linawa to, a gawaen ed sikatayo diad panamegley nen Jesu-Kristo diad saman so makapaliket-a-maong ed imaton to; onla komon ed sikato so gloria ed ando lan ando. Amen.” (Hebreos 13:20, 21) Diad pakanengneng ed mareen a dalin, “say Dios na kareenan” so amaoli ed si Kristo ed imortal a bilay ed tawen, a diman et impresenta nen Jesus so merito na naibung a dala to a nanggawan balido ed balon sipanan. (Isaias 9:6, 7; Lucas 22:20) Satan so andi-anggaan a sipanan lapud saramay wala ed dalin so mangawat na permanentin gungguna a manlapud serbisyo na saray 144,000 iran espiritual ya anak na Dios a miuley ed si Jesus ed tawen tan wala ed balon sipanan. (Apocalipsis 14:1-4; 20:4-6) Satan so diad panamegley nen Kristo a say Dios, a pangipabtangan na gloria, so ‘manginlong ed sikatayo ed amin a bengatlan maong a nakaukolan diad panggawa na linawa to tan makapaliket-a-maong ed imaton to.’
20. Panon yon segeken tan ipaliwawa so manangisaran bilin nen Pablo ed saray Hebreon Kristianos?
20 Aliwan maseguro ed no panon so ikiwas na saray Hebreos ed saray sulat to, inkuan nen Pablo: “Natan et bilinen takayo, agagi, ya awaten yo iyan salita na panamaseseg [ya ontalineng ed Anak na Dios, aliwan diad saray Judaista], ta, peteg, tinugyop ko so sakey a sulat ed sikayo diad saray pigaran salita [ya imanoen so ambelat a karga to]. Imanoen a say agi tayon Timoteo so nibulos [nanlapud pangawan], a diad sikato, no sikato so onsabin magano, nanengneng takayo.” Nayarin nansulat a nanlapud Roma, inilaloan na apostol a sikato a kaiba to si Timoteo so ondalaw ed saray Hebreos ed Jerusalem. Insan imbaga nen Pablo: “Ipasabi yo so pabanok ed amin na saraman so mangipapangulo [bilang managkimey-na-impasyan mamatatken] ed limog yo tan ed amin na saray sasantos [saraman so walaan na mangatatawen ya ilalo]. Saramay walad Italya so mangipawit ed sikayo na pabano ra. Say agkanepegan a panangasi [na Dios] so wala komon ed sikayon amin.”—Hebreos 13:22-25.
Sakey a Sulat a Walaan na Magnayon a Kablian
21. Say sulat ed saray Hebreos so ontulong ed sikatayon mantalos ed antoran manunan punto?
21 Anganko a mas nagkalalo nen say anggan dinan nin arum a libro ed Masanton Kasulatan, say sulat ed saray Hebreos so ontulong ed sikatayon mantalos ed kabaliksan na saray bagbagat a niyapay ed leksab na Ganggan. Say sulat so malinlinew a mangipapanengneng a say bagat nen Jesu-Kristo so alenleneg a mangiter na nakakaukolan a dondon a para ed makasalanan a katooan. Tan say makatantandan mensahen aromog ed sulat et sikatayo so nepeg ya ontalineng ed Anak na Dios.
22. Anto so arum iran rason na pagmaliw tayon misalsalamat diad sulat ed saray Hebreos?
22 Nagkalalo ni, a singa anengneng tayo ed akaunan duaran artikulo, sikatayo so walaan na arum iran rason a misalamat ed madibinon apuyanan a sulsulat ed saray Hebreos. Sikatayo so tulongan ton ag-onkesaw ed ministeryo tayo, tan panoen to itayo na tepel, lapud amta tayo a si Jehova so Mananulong tayo. Nagkalalo ni, pasesegen to itayon mangusar ed saray bibil tayo tan amin na saray pakayari tayon andi-siblet diad panangisaklang na sagradon lingkor ed agew tan labi tan diad panangiyapay na impapuson bagbagat a mamaliket ed daydayewen tan maaron Dios tayo, si Jehova.
Panon So Iyebat Yo?
◻ Panon so intulong na sulat ed saray Hebreos ed sikara ya ompaliis ed saray palson bangabangat?
◻ Saray bagat a makapaliket ed Dios so mangiyapasakey ed anton importantin kimey?
◻ Siopa “iraman so mangipapangulo,” tan akin a manpauley ed sikara?
◻ Panoy pangipabitar na sulat ed saray Hebreos diad pikakasi?
◻ Akin a nibaga tayon saray sulat ed Hebreon Kristianos so walaan na magnayon a kablian?
[Saray litrato ed pahina 20]
Saray bagat a makapaliket ed Dios so mangisakup ed pibibiang ed mapublikon ministeryo tan diad panangiter na makatulong a simbawa ed saray kaparan Kristianos