Mantasi ed Si Jehova tan Ag-onkekesaw
“Imanoen a maapit so sakey ya angisungdo ed ontan a sumlang a tongtong na saray makasalanan . . . pian sikayo komon so agnakesawan tan onkapuy ed saray kamarerwa yo.”—HEBREOS 12:3.
1, 2. Anton makakumbinsin prueba so inter nen Jesus ed saray babangatan to a sikato so apaoli?
ANENGNENG ko so Katawan!” Diad saratan a salita na pankelaw, imbalita nen Maria Magdalena so inkioli nen Jesus. (Juan 20:18) Saya so ananda ed gapowan na 40 agew ya apusek na saray makapasagyat ya agawgawa ed saray babangatan nen Kristo, ya akadkaunan naermenan diad impatey to.
2 Kinaliktan nen Jesus ya agto itilak so panduaruwa ed kanonotan na saray babangatan to a sikato so peteg a mabilay. Sirin, singa imbaga nen Lucas: “Diad dakel a pamintuaan et impanengneng [nen Jesus] so inkasikato a mabilay kayari na impanirap to, unong a sikato so anengneng da ed apataplon agew.” (Gawa 1:3) Diad tua, diad sakey ya inkagawa et “sikato so pinmatnag ed masulok a liman lasus ya agagi ed sakey a panaon.” (1 Corinto 15:6) Peteg, anggapo la so lugar na panduaruwa. Si Jesus so mabilay!
3. Anton tepet nipaakar ed Panarian so impaarap na saray babangatan nen Jesus ed sikato, tan akin a say ebat to so anurprisa ed sikara?
3 Diad saman et ninonot lambengat na saray babangatan nen Jesus so mangaraldalin a “panarian na Dios,” sakey a nipawil ed nasyon na Israel. (Lucas 19:11; 24:21) Kanian tinepetan da si Jesus: “Katawan, kasin ipawil mo so panarian ed Israel diad sayan panaon?” Andi-duaruwan say ebat to so amakelaw ed sikara, ta inkuanto: “Agyo kayarian so pangala na pikakabat ed saray panaon odino panpanaon ya impasen na Ama ed dilin geter to; balet sikayo so mangawat na pakayari sano onsabi so masanton espiritu ed sikayo, tan sikayo so tastasik ed Jerusalem tan ed amin a Judea tan Samaria tan diad sankaarawian a pasen na dalin.” (Gawa 1:6-8) Agaylan angat so nipasen natan ed arap na saray babangatan! Tan agaylan responsabilidad! Panon so pakasumpal da ed ontan a kimey? Say ebat so agnambayag et sinmabi ed makapakelaw a nengneng.
Panangawat ed Angat
4. Deskribien so agawa ed agew na Pentecostes.
4 Indalatdat nen Lucas: “Legan a say agew na piesta na Pentecostes so nagagawa a sikaran amin so nandaragup ed parehon pasen tan kapagdakan agawa a nanlapud tawen so sakey ya ungol a singa sakey a manasibengbeng a dagem, tan pinano to so interon abung a panyudyurongan da. Tan saray dila a singano apuy so anengneng ed sikara tan niyutob ed kaliberliber, tan dinmapo so sakey ed kada sakey ed sikara, tan sikaran amin so napno na masanton espiritu tan ginmapon nansalita na saray nanduruman salsalita, unong ya inter na espiritu ed sikara a pakapansalita.” Baleg a tuloy so ungol ya anawag na imano na sakey ya ulop na saray Judios a manaayam ed Jerusalem nisesengeg ed piesta. Sikara so nikelawan a makadngel ed ‘saray dilin salita ra nipaakar ed saray makapakelaw a bengabengatla na Dios.’—Gawa 2:1-11.
5. Diad anton kalaknab a say pasakbay nen Jesus ed Gawa 1:8 so agnambayag et asumpal?
5 Ag-inabala nen Pedro so panaon diad impangiter na dinamikon paliwawa, a papaneknekan ton anggapoy duaruwa a “si Jesus a Nazareno,” ya impasak da, so “Katawan” ya impasakbay nen David ed saray salita: “Inkuan nen Jehova ed Katawan ko: ‘Yurong ka ed nikawanan ko, anggad pangipasen ko ed saray kakabusol mo a totoonan na saray salik.’” Atigsok ed puso, saray dumerengel nen Pedro so nantepet: “Lalaki, agagik, anto so gawaen mi?” Diad ebat et sikara so pinaseseg nen Pedro: “Magbabawi, tan balang sakey komon ed sikayo so nabautismoan diad ngaran nen Jesu-Kristo diad kaperdona na saray kasalanan yo.” Nansumpalan? Talon libo so abautismoan! (Gawa 2:14-41) Niniiter la so panagtasi ed Jerusalem. Saginonor, ninmatnat ed amin a Judea, insan diad Samaria, tan kaunoran “diad sankaarawian a pasen na dalin.” Maples a tuloy so inkilaknab na kimey na panangipulong-ed-Panarian a diad ngalngalin 60 K.P. et nayarian nen apostol Pablo ya ibaga a say maong a balita “so nipulong ed amin a pinalsa a wala ed leksab na tawen.”—Colosas 1:23.
Inkilaknab na Panarian tan Panamasegsegang
6, 7. (a) Panon a say kilaknab na Panarian tan kapasegsegang na saray Kristianos so nambansag kaleganan na inmunan siglo? (b) Anton maganat a pankaukolan so tinmalindeg ed limog na saray Kristianos ed Jerusalem, tan panon so inkapano na sayan pankaukolan?
6 Agnambayag kayari na Pentecostes 33 K.P., saray babangatan nen Jesus so walaan na katunongan a mannonot ed saray salita to: “Say aripen so aliwan babaleg nen say katawan to. No siak so pinasegsegang da, sikayo so pasegsegangen da met.” (Juan 15:20) Saray Judion papangulo so asanokan sanen “say salita na Dios so binmulaslas tan say bilang na saray babangatan so dinmakel a tuloy ed Jerusalem.” Diad saray palson panamakasalanan, si babangatan ya Esteban so binato ya anggad patey. Saman so pinmatnag a tanda ya alagden na dakel, lapud “diad saman ya agew et tinmalindeg so baleg a panamasegsegang a sumpad kongregasyon a walad Jerusalem; amin nilikud iray apostoles so nitaytayak ed interon pasen na Judea tan Samaria.”—Gawa 6:7; 7:58-60; 8:1.
7 Say panamasegsegang so temporaryon kinmepa. Balet agnambayag kayari to, pinatey nen Herod Agrippa I si apostol Santiago. Si Pedro so impriso balet tan imbulos na anghel. Saginonor et saray agagi ed Jerusalem so apairap a tuloy ed materyal, tan nakaukolan ya ipawit na saray kapananisiaan ed arum a pasen so tulong ed sikara. (Gawa 9:31; 12:1-11; 1 Corinto 16:1-3) Kaleganan na sakey a bisita nen apostol Pablo ed Jerusalem, say relihyoson inkapanatiko so mapatnag legan ya inyingal na sakey ya ulop: “Ekal mo so ontan a too ed dalin, lapud sikato so agmanepeg a manbilay!” (Gawa 22:22) Peteg, saraman a Kristianos a manaayam ed Jerusalem tan Judea so nankaukolan na malaem a panamaseseg a mansiansian sitotoor diad panagtasi nipaakar ed Panarian. Insipan nen Jesus ed saray babangatan to a “say masanton espiritu, ya ibaki na Ama ed ngaran ko,” so onkiwas a bilang “mananulong.” (Juan 14:26) Balet panon natan na Ama a mangitarya na ontan a nakakaukolan a tulong odino ligliwa? Say ebat, ed kabiangan, so diad panamegley nen apostol Pablo.
Sulat nen Pablo ed Saray Hebreos
8. (a) Anto so anagdag ed si Pablo a mangisulat ed sulat to diad saray Hebreos? (b) Diad anton nengneng na sulat to so pangiyapasakeyan tayo na imano tayo, tan akin?
8 Nen ngalngalin 61 K.P., si Pablo so apriso ed Roma, balet ta sikato so sikakabat ed nagagawa ed saray agagi to ed Jerusalem. Sirin, diad leksab na panangiwanwan na espiritu nen Jehova, insulat to so nipanpanaon a sulat to ed saray Hebreos. Sikato so napno na maaron panagpaga ed saray Hebreon agagi ton lalaki tan bibii. Kabat nen Pablo so nakaukolan da pian napabiskeg so pananisia ra tan talek da ed si Jehova bilang Mananulong da. Sirin nayarian da so ‘ombatik a tekep na panagsungdo ed babatiken a niiyan ed arap da’ tan sitatalek a mangikuan: “Si Jehova so mananulong ko; agak antakot. Anto so nagawaan na too ed siak?” (Hebreos 12:1; 13:6) Sayan aspekto na sulat nen Pablo ed saray Hebreos (kapitulo 11-13) so kaliktan tayo natan a pangiyapasakeyan na imano. Akin? Lapud say kipapasen a nidungetan na saraman ya akadkaunan Kristianos so pareho ed kidudungetan na saray Tasi nen Jehova natan.
9. Anton salisalan ya inarap na saray Kristianos nen inmunan siglo so niyarap met ed saray Kristianos natan, tan panon so pakaabet labat ed satan?
9 Diad dalem na kapolian tayo, dakerakel so kinmiwas a positibo ed mensahe na Panarian diad pangidedika ra na inkasikara ed si Jehova tan nababautismoan a bilang Tastasi to. Anggaman kuan, dingan na sayan panangipalaknab ed tuan panagdayew et sinmabi so maruksan panamasegsegang, dakel iran Kristianos so angisuko ni ed saray bilay da a singa ginawa nen Esteban, Santiago, tan arum iran matoor ya inmunan-siglon tastasi. Sirin, say salisalan so pareho natan a singa nen saman: Siopa so makayarin ontalindeg ed subok na katooran da diad arap na ombabaleg ya isusumpa ed mensahe na Panarian? Nagkalalo ni, siopa so makayarin mangarap ed makapataktakot iran nagagawa legan a say andi-kaparan “baleg a kairapan” so magano lan ondapo ed sayan peles a kapolian? (Mateo 24:21) Say ebat so, saraman so akaparaan a “mibakal na maabig a pibabakal nipaakar ed pananisia,” saraman so “putel ed pananisia.” Saraya so diad kaunoran et makayarin mangibaga: “Saya so impanalo ya analo ed mundo, say pananisia tayo.”—1 Timoteo 6:12; 1 Pedro 5:9; 1 Juan 5:4.
Panangungguna Manlapud SarayMatoor ya Ehemplo
10. (a) Anto so pananisia? (b) Panon so liknaan na Dios nipaakar ed saray lalaki tan bibii na pananisia ed kadaanan a panaon?
10 Anto so pananisia? Onebat si Pablo: “Say pananisia so nipaseguron panalagar ed saray bengatlan inilaloan, say mapatnag a panangiparungtal ed saray kapetegan anggamano ag-anengneng. Ta diad panamegley na saya et saray totoo ed kadaanan iran panaon so walaan na pantasi ed sikara.” (Hebreos 11:1, 2) Insan pinabiskeg nen Pablo so salaysay to ed pananisia diad impangipanengneng to na pananisia ya onkikiwas. Intawag toray manunan punto ed bilay na arum ed saray “lalaki ed kadaanan iran panaon,” tan ontan met ed saray bibii a singa si Sara tan Rahab. Agaylan makapaseseg so pakaromog a say “Dios so angibaing ed sikara, a tawagan bilang Dios da”! (Hebreos 11:16) Kasin nibaga met na Dios so ontan ed sikatayo lapud pananisia tayo? Komon ta sikato so agtayo ikdan na sengegan na pangibaing ed sikatayo legan a manampot so kada agew.
11. Panon so pakagunggunaan tayo natan a manlapud “lurem na saray tastasin nanliktub ed sikatayo?”
11 Diad panumbok ed awaran na sarayan matoor a lalaki tan bibii, inkuan nen Pablo: “Kanian, sirin, lapud walaan itayo na ontan lan baleg a lurem na saray tastasi ed kaliberliber tayo, italirak tayo so amin a pakabelatan tan say kasalanan a magmainomay ya akaliktob ed sikatayo, tan batiken tayo a tekep na panagsungdo so babatiken a niiyan ed arap tayo.” (Hebreos 12:1) Anggaman nanaugip natan ed lubok, kasin sarayan maabig-ehemplon matoor a tastasi so mabilay ed kanonotan tayo? Kasin sikara so kabat yo tan saray eksperiensia ra so magenap lan tuloy a mangebat na on? Saya so sakey ed saray dakerakel a tumang na maparanay a panagaral ed Biblia, ya usaren so amin a pakatalos tayo a mamabilay ed saray makapasagyat ya eksperiensia na sayan “lurem na saray tastasi.” Tua, say pangipapuso ed matoor ya ehemplo ra so ontulong na baleg ed sikatayo a manalona ed anggan anton kakulangan na pananisia. Diad biek, saya so ontulong ed sikatayon mangiter na makpel tan andi-takot a pantasi ed katuaan ed leksab na amin a sirkumstansya.—Roma 15:4.
Ag-onkekeksaw
12. (a) Panon a say ehemplo nen Jesus so ontulong ed sikatayon ‘ag-onkesaw tan onkapuy ed saray kamarerwa tayo’? (b) Anto so arum ed saray kaplesan-agew ya ehemplo na saraman so ag-onkekesaw?
12 Say sankabalgan ya ehemplo tayo ed pananisia et si Jesus. Ipapaseseg nen Pablo: “Batiken tayo a tekep na panagsungdo so babatiken a niiyan ed arap tayo, legan ya onnengneng itayo a mapetepet ed Manunan Ahente tan Manamayadyari na pananisia tayo, si Jesus. . . . Peteg, imanoen a maapit so sakey ya angisungdo ed ontan a sumlang a tongtong na saray makasalanan a sumpa ed saray dilin pankaabiganan da, pian sikayo komon so ag-onkesaw tan onkapuy ed saray kamarerwa yo.” (Hebreos 12:1-3) Panon “inkamaapit” so impangimano yo ed ehemplo nen Jesus? Panon “inkamapetepet” so inenengneng yo ed sikato? (1 Pedro 2:21) Sikatayo so labay nen Satanas ya ‘onkesaw tan onkapuy ed saray kamarerwa tayo.’ Sikatayo so labay ton ontunda diad panggawa ed kimey na panagtasi. Panon so panggawa to ed saya? No maminsan et diad pirmin isusumpa a manlapud saray relihyoso tan minumundon pakauley, a singa nen inmunan siglo. Nen katantaon, say kimey na panangipulong-ed-Panarian so asebelan ed ngalngalin 40 bansa. Balet kasin satan so nanggawa ed saray agagi tayon onkesaw? Andi! Say matoor a kimey da so nansumpal ed 17,000 tan masulok nin abautismoan ed saratan a daldalin nen 1988. Agaylan saya so manamakiwas ed amin na saraman so manbibilay ed saray bansan walaan na relatibon kawayangan! Sikatayo so agbalot onkesaw diad panangipulong ed maong a balita na Panarian!
13. (a) Anto so arum ed saray masilib a bengatlan nayarin manggawa ed sikatayon onkapuy diad kimey na panagpulong tayo? (b) Anto ‘so gayagan niiyan ed arap nen Jesus,’ tan panon so pakagamor tayo na miulibay a magayagan awawey?
13 Anggaman kuan, walaray arum nin nagkalalon masilib a bengatla a manggawa ed sikatayon onkesaw. Saraya so mangisakup ed isusumpa ed naapag-apag a sankaabungan, kagonigonan ed nonot, saray problema ed bunigas, panangidesdes na kaedaran, kadidismaya nisengeg ed kakulangan na positibon resulta ed kimey na panagpulong tayo, odino anganko say liknaan na agpakankaanos lapud say anggaan na sayan sistema na bengabengatla so agni sinmabi. Bueno, anto so tinmulong ed si Jesus a mangisungdo ed saray impanirap ed nonot tan pisikal? Sikato “so gayaga a niiyan ed arap to.” (Hebreos 12:2) Apabiskeg si Jesus diad gayaga na impamaliket ed puso na Ama to diad impangalangon ed Sikato tan diad paniilalo ed saginonor a liket a sagmaken to diad panangipaakseb ed saray makapakelaw a bendisyon na Mesianikon Panarian. (Salmo 2:6-8; 40:9, 10; Uliran 27:11) Kasin tumboken tayon nagkalalon mapetepet iyan magayagan awawey nen Jesus? Tan nonoten so paseguro nen Pedro diad 1 Pedro 5:9: “Saray parehon bengatla ed nengneng na saray irirap so nagagawa diad interon panlilimog na saray agagi yo ed mundo.” Diad pikabat a natalosan nen Jehova, a nalikna so ampetang a sankamundoan ya impanaagi tan iteen tayoray mata tayo ed saray gayagan walad unaan tayo ed leksab na uley na Panarian—amin na saya so ontulong ed sikatayon ag-onkesaw diad panlingkor ed si Jehova ed pananisia tan diad panagpulong sano say anggaan so asingger lan tuloy.
No Akin a Si Jehova So Manisiplina
14. Antoran gungguna so nayarin mansumpal a manlapud saray subok tan irirap a nayarin nakaukolan tayon sungdoan?
14 Si Pablo natan so mangiter na liwawa ed rason no akin a nayarin nakaukolan tayon sungdoan iray subok tan irirap. Isusuhiri to a sikatayo so onnengneng ed ontan a singa sakey a porma na disiplina. Inrason nen Pablo: “Anako, agmo leglemewen so disiplina a manlapud si Jehova, nisay onsuko sano sika so peteken to; lapud say inaro nen Jehova so disiplinaan to.” (Hebreos 12:5, 6) Anggan si Jesus so “angaral na katutulok a manlapud saray bengatlan sinagmak to.” (Hebreos 5:8) Peteg, nakaukolan tayo met ya aralen so katutulok. Imanoen so makagunggunan epekto na panangiyabuloy ed disiplinan manmoldi ed sikatayo. Inkuan nen Pablo: “Diad saraman so impasal na satan et amawala na mareen a bunga, salanti, inkatunong.” Agaylan satan so makapaseseg!—Hebreos 12:11.
15. Panon so nayarin pangiyaplika tayo ed simbawa nen Pablo a ‘pansiansiaen a maptek iray basbas a para ed saray sali tayo’?
15 No awaten tayo so “disiplina a manlapud si Jehova” ed sayan liwawa, ipapapuso tayo so positibon simbawa nen Pablo: “Sirin peteken iray liman alupaypay tan saray manggiwgiw a pueg, tan itultuloy a peteken iray dalan a para ed saray sali yo.” (Hebreos 12:12, 13) No maminsan et sankainomayan so isuawi a manlapud ‘mainget a dalan a mangipaarap ed bilay.’ (Mateo 7:14) Si apostol Pedro tan saray arum ed Antiokia so nankasalanan ya aminsan diad impanggawa ed saya. Akin? Lapud “sikara so agmanaakar a maptek unong ed pananisia ed maong a balita.” (Galacia 2:14) Natan, sikatayo so mantultuloy ya ontalineng ed Engranden Managbangat tayo, si Jehova a Dios. Nakaukolan tayon usaren a nagnap iray tulong a nitarya ed panamegley “na matoor tan makabat ya aripen.” Saya so mangipaseguro na ‘maptek a dalan’ a para ed saray sali tayo.—Mateo 24:45-47; Isaias 30:20, 21.
16. (a) Panon so nayarin ilesa na “makasamal a lamut” ed sakey a kongregasyon? (b) Akin ya insiglaot nen Pablo so imoralidad diad kakulangan na apresasyon ed saray sagradon bengatla, tan panon so nayarin pakasalimbeng tayo ed inkasikatayo a sumpad saratan a kaatapan?
16 Si Pablo so ontumbok ya amasakbay a sikatayo so “manalwar a manbantay pian anggapo komon so nasibletan ed agkanepegan a panangasi na Dios; ya anggapo komon so makasamal a lamut ya ontubo tan manggawa na gulo tan dakel so nayarin tilolan na satan.” (Hebreos 12:15) Diad inkadismaya, ag-inkapnek, say pananap na lingo ed dalan na kagagawa na saray bengatla ed kongregasyon so magmaliw a singa “samal a lamut” a magmainomay ya onkayat tan samalan to so mabunigas iran kanonotan na arum ed kongregasyon. Nayarian tayon labanan so ontan iran negatibon kanonotan diad panmorekdek ed saray agnabilang a bendisyon ya intarok na katuaan ed bilay tayo. (Salmo 40:5) Sananey a kaatapan et say pakawalaan na saray moral a tendensya odino ‘kakulangan na apresasyon ed saray sagradon bengatla, a singa si Esau.’ (Hebreos 12:16) Sarayan duaran kaatapan so impansiglaotan nen Pablo, lapud say sakey so magmainomay a mangitonton ed arum. Anggapo so Kristiano ya onsuko ed ontan iran sinisiblet a pilalek no iyaplika toray salita nen Pedro: “Alaen yo so talindeg yo a sumpad [Diablo], putel ed pananisia.”—1 Pedro 5:9.
“Saray Kapetegan Anggaman Ag-anengneng”
17. Ipareng iray makapakebbiew ya agawa ed Palandey Sinai diad saraman so nidudunget ed saray Kristianos natan.
17 Say pananisia tayo so onsaral a tuloy ed saray “kapetegan anggaman ag-anengneng.” (Hebreos 11:1) Arum ed sarayan ag-anengneng a kapetegan so ituloy nen Pablo a salitaen diad Hebreos 12:18-27. Dedeskribien to so makapataktakot ya agawa ed Palandey Sinai sanen nansalitan direkta so Dios ed Israel tan sanen inkuan nen Moises: “Siak so ataktakot tan manggiwgiw.” Insan inyarum na apostol: “Balet sikayo so akaasingger ed Palandey Sion tan sakey a syudad na mabilay a Dios, mangatatawen a Jerusalem, tan saray nilaksalaksan angheles, ed inkalapagan ya asamblea.” Diad kipapasen na saray inmunan Israelitas ed Palandey Sinai, say boses na Dios so nanyugyog ed dalin, kuan nen Pablo, balet natan et insipan To, a kuanto: “Ingen maminsan ni et yegyegen ko so aliwa labatlan say dalin noagta ontan met ed tawen.” Anggaman sarayan salita so manunan nipaarap ed saray alanaan a Kristianos, say “baleg ya ulop” na arum a malakarneron totoo so makapangipapuso met ed satan. (Apocalipsis 7:9) Kasin peteg a papablien yo so ibabaga nen Pablo? Sikatayo so akaalagey ed arap na pandaragup na saray samplon libulibon angheles. Siempre, sikatayo met so ontalindeg ed arap nen Jehova. Diad nikawanan a lima to et si Jesu-Kristo. Peteg, sikatayo so wala ed lalon makapataktakot a posisyon tan wala ed leksab na babaleg a responsabilidad nen say saraman so kadaanan a Hebreos ed Palandey Sinai! Tan nonoten, say panagyegyeg ed onsasabin bakal na Armagedon so maandipat ed peles a marelmeng a tawen tan dalin. Peteg ya aliwan panaon natan na “isener” diad italineng ed Salita na Dios tan pangunor ed satan!
18. Panon lambengat a sikatayo so makapantultuloy a mantasi ed si Jehova, ya ag-onkekesaw?
18 Peteg, sirin, sikatayo so manbibilay ed sankamakapataktakotan a panaon ed awaran na too. Bilang Tastasi nen Jehova, sikatayo so nibaki ed sankaarawian a pasen na dalin a mangipulong ed maong a balita na niletneg a Panarian na Dios. Diad panggawa na ontan, nepeg a walaan itayo na pananisian agbalot nagiing, sakey a pananisian ag-onkesaw, sakey a pananisian manggawa ed sikatayon mangawat ed disiplina nen Jehova. No walaan itayo na ontan a pananisia, sikatayo so naromog ed limog na saraman so “mantultuloy a nawalaan na agkanepegan a panangasi, a diad panamegley to et sikatayo so nayarin makapaliket a mangisaklang ed Dios na sagradon lingkor a tekep na maridios a takot tan kebbiew.” (Hebreos 12:28) On, tan itultuloy tayo so mantasi ed si Jehova tan ag-onkesaw.
Panon So Iyebat Yo?
◻ Akin a say sulat nen Pablo ed saray Hebreos so makagungguna ed sikatayo?
◻ Anton salisalan so nepeg ya arapen na saray Kristianos natan?
◻ Panon so kagunggunaan tayo a manlapud saray matoor a tasi ed kadaanan?
◻ Akin a disiplinaan nen Jehova iraman so inaro to?
◻ Anto so tombok ed panagtasi ya ag-onkekesaw?