Aglingwanan na Dios so “Aro ya Inpanengneng Yo ed Ngaran To”
“SAY Dios aliwan ag matonong pian nalingoanan to so gawa yo tan say aro ya inpanengneng yo ed ngaran to, ed inpanulong yo ed saray sasanto ed saray pankaokolanda, tan ed panotulong yo ni natan ed sikara.” (Hebreos 6:10) Sarayan salita nen apostol Pablo so tua parad Tastasi nen Jehova diad Mamabukig a Europa. Sitotoor a manlilingkor parad intereses na ngaran na Dios, diad loob na saray dekada et sikaray abayag a nanggunaet tan nanirap ed silong na saray panameget ya impaakseb na datin babanlongan-na-Sobyet iran gobierno. Tatandaan nen Jehova iray maong a gawa ra tan iikdan tora na saray bendisyon na Panarian. Alimbawa, nengnengen tayo so apalabas a report ed serbisyon taon manlapu labat ed talora ed saraman a pasen.
Saray Datin Teritorya na Sobyet Union
Irereport na saray datin teritorya na Sobyet Union a legan na 1992 serbisyon taon, say pantok a bilang na manangipalapag na Panarian so dinmaak na 35 porsiento—manlapud 49,171 ya anggad 66,211! Balet aliwan satan lambengat, lapud ta saraman a manangipalapag so aktibon tuloy, a singa nanengneng ed maabig iran indaak diad panangipalima na literaturay Biblia, a pati saray magasin. Inusar dan maong met iray brosyur tan bokleta, ya akapangipalima na 1,654,559. Satan so masulok a mamitlon bilang nen katantaon a 477,235! Anto so ebat ed amin na sarayan impalima? Sakey a doblen bilang na saray panangiyaral na Biblia ed abung. Natan et 38,484 iran panangiyaral na Biblia so nikokondukta.
Ontan met, say pibibiang ed panag-auxiliary payunir so inmatagey na 94 porsiento. Mapatnag a saya so tinmulong ed matalonan bilang na balo nin bautismadon babangatan, 26,986, unong a nikumpara ed bilang nen katantaon a 6,570, sakey a makapakelaw a 311-porsienton indaak!
Panon a saray arum ed kapkapanbautismo so nagmaliw ya interesado ed maong a balita? No maminsan say aralem a kapagaan na mangiyaaral a Tasi so sakey a rason. Isalaysay na sakey a manangasikason manangimaton a taga Moldova:
“Sikamin sanasawa so binmisita ed sakey a biin datin angipanengneng na interes ed katuaan na Biblia. Sakey a panagaral na Biblia so nigapo ed sikato. Anggaman ontan, say masiken to so agbalot angipanengneng na interes. Sakey ya agew sanen sikami onlan mangiyaral ed sikato, say panaon so ambetel a maong tan maniebe. Anggapo so walad saray lansangan, balet sikami so akasabi ed abung to ed aturon panaon. Inkuan to’d masiken to: ‘Nengneng mo no panon so panatalima na sarayan totoo ed sikata? Sikaray duga’d panaon anggaman maniebe.’ Sayan agawa so amaisip ed masiken to. Sikato so anguman ed kanonotan to tan akiaral, tan natan sikato tan say akulaw to so bautismadon Tastasi.”
Diad arum a panaon say inkamagalang na Tasi so nayarin managyat na interes ed maong a balita. Sakey a matatken a taga Moldova met, so awalaan na onian eksperiensia:
“Sakey a lakin binisitak ed teritoryan panpupulongan ko so ag-interesado ed saray Tasi nen Jehova. Inkuanton sikatoy membro na Iglesian Ortudoks, a singa say ama tan laki to. Kanian kinerew to’d siak ya onalis ed sular. Anggaman ontan, sakbay a tinmaynan ak, inikdan toak na pankanawnawan ibaga ed sikato so rason ed ibisitak. Impaarap ko so Mateo 28:19, a sasalitaen to: ‘Onla kayo sirin, tan mangawa kayo na saray babangatan ed amin a naciones, ya binyagan yo ra ed ngara’y Ama, tan say Anak, tan say Espiritu Santo.’ Insan inter ko’d sikatoy address na panmimitingan mi tan inmalis. Asurpesa ak ta sakey simba ed saginonor sayan laki so inmatendi ed miting mi! Sikato so nansiansia anggad asumpal so programa. Insalaysay ton sakey simban magbabawi lapud sikato so ontanlan agmakaaro ed siak. Diad saman sakey a panagaral na Biblia so nigapon tampol, tan natan et sikato lay sakey ed saray agagi tayo.”
Sakey nin matalonggaring a nengneng na serbisyon taon et say mapatpatnag ya ebat ed saray pankaukolan na agagi tayo ed saman a pasen. Legan na panaon na ambetel na 1991/92, ngalngali 400 toneladan tagano tan dakel a kawes parad lalaki, bibii, tan ugugaw so impawit ed saramay mankaukolan. Sarayan probisyon so inbunog ed ngalngalin amin a pasen na datin teritoryay Sobyet Union, anggan ed arawin pasen na Irkutsk diad Siberia tan Khabarovsk, ya asingger ed Hapon. Tua a sakey a makapasagyat a pakapatnagan ya aglilingwanan nen Jehova so aron ipapanengneng na agagi tayo ed ngaran to! Sayan ebidensya na inaagin panangaro a pinakiwas na espiritu nen Jehova so walaan met na resulta ed sikaran mikasakey ed sankamundoan a pamilya ra. Alimbawa, insulat na sakey ya agin bii ed sangan opisina na Ukraine:
“Say tulong ya inter yo ed sikami so angapektan tuloy ed saray emosyon mi. Sikami akanangis tan akisalamat ta agkami nilingwanan nen Jehova a Dios. Tua, a maniirap kami ed materyal natan, ingen pisalamatan mi sinmabin tulong a nanlapud agagi tayo ed Sagur, sikami so akabawi ed materyal a dalan. Natan, lapud tulong yo, sarag na pamilyak so mangideboto na malaem a panaon diad serbisyo ed si Jehova. No linawa nen Jehova, say marikit ko tan siak so man-auxiliary payunir ed saray bulan na tiagew.”
Niarum ni, say pananulong a sagpot so angitarok na pantasi ed saray taga-paway lapud saray manag-imaton so makanengneng ed panangipatnag na aro na Tastasi tan saray kiwas da. Insulat na sakey a pamilya ed sananey a kongregasyon: “Naawat mi so materyal a tulong a tugyopen na tagano tan kawesen. Subsubran tuloy! Say suporta tan panamaseseg yo so sakey a leksion parad sikami a sikami met so manggawa komon na maabig ed arum. Sayan kiwas na panangaro so naimano na saray agmananisia, ontan met ed interesadon totoo tan saray pamilya ra; satan so baleg a pantasi nipaakar ed tuan impanaagi.”
Say limaran distrito kumbension tan sakey ya internasyonal a kumbension ya agawa ed apalabas a Hunyo tan Hulyo, a walaay teman “Saray Manangakbibit na Liwawa,” so sakey nin ebidensya na panamendisyon nen Jehova ed impasyan kimey na Tastasi to tan say aron impanengneng da ed panangipakabat ed ngaran to. Saray kumbension so inatendian na 91,673 totoo, tan 8,562 so abautismoan. Say sankabalgan ya inmatendi et diad St. Petersburg, say pasen na internasyonal a kumbension, a ditan et 46,214—pati ed saray delegadon nanlapud 30 bansa ed liber na mundo—so dinmagup ed Estadyum na Kirov.
Sakey a laki diad Siberia a ngalngalin manedad na 60 so linma ed kumbension diad Irkutsk pian onnengneng labat. Inkuanto: “Amin ya inmatendi so amisteng, tekep na maimis iran lupa, tan maabig ira ed balang sakey. Sarayan totoo so singa sakey a nankakasakey a pamilya. Nalikna na sakey a sikaray sankaaro aliwa labat ed estadyum noag ontan met ed inagew-agew ya aktibidades. Akaawat ak na ekselentin literaturay Biblia tan naaralan kon nagkalalo no anto iyan organisasyon. Labay ko so miabet ed saray Tasi nen Jehova tan paiyaralan na Biblia a kaiba ra.”
Diad parehon kumbension diad Irkutsk, ya inatendian na 5,051, sakey ya interesadon bii a taga Republika na Yakut, Siberia so nankomento: “Ninengneng ko so totoo et labay ko so onakis lapud gayaga. Siak so misalamat a tuloy ed si Jehova ta tinulongan toak pian nakabatan so ontan a totoo. Dia ed kumbension et naawat ko so literatura, tan labay kon itongtong itan ed arum. Labay kon tuloy so magmaliw a managdayew nen Jehova.”
Say direktor na Sentral Estadyum diad Alma Ata, Kazakhstan, no iner ya 6,605 so inmatendi ed kumbension, so angikuan ed onggendan: “Siak so aliketan ed awawey yo. Kumbinsido ak la natan ya amin yo, balanglan ugaw odino matatken so marespeton totoo. Agko nibaga a manisia ak ed Dios, balet sisiaen koray sagradon bengatlan inpabitar na impanaagi yo, diad awawey yo ed espiritual tan materyal iran kablian.”
Inbalikas na sakey a pulis diad kumbension ed Alma Ata: “Akapiabet ak la ed sikayon totoo ya amidua, diad kumbension. Agaylan marakep so pikimey ed saray Tasi nen Jehova.”
Romania
Aglilingwanan met nen Jehova so aron ipapanengneng na agagi ed Romania parad ngaran to. Anengneng ed sayan apalabas a serbisyon taon so dakel a maliket ya ebento parad Tastasi. Ununa, sakey a sangan opisina so inletneg lamet diad Bucharest. Say kaunoran a legal a kimey so anampot nen 1949. Say opisina so walaan na ngalngali 20 agagin lalaki tan bibii a mankikimey ed balon pasilidades. Lilingkoran na sangan opisina so 24,752 manangipalapag—sakey a sankatalonaan a pantok a mangirerepresenta na 21-porsienton indaak ed promedyo nen katantaon.
Kayari na saray taon na masekreton panagpulong, saray manangipalapag so mas makapangiyarunsa ed mapublikon puerta-ed-puertan panagtasin kimey. Ipapanengneng na sakey ya eksperiensia ed Mures County no panon a maabig ya uusaren na saray Tasi so antokaman a pankanawnawa pian manpulong ed arum, anggano sikaray manbibiahe. Isulat na sangan opisina:
“Diniside na sakey a manangipalapag so manpulong diad sakey a komparment na tren ya onla’d sananey. Say reaksion na totoo so gendagendat a paborable, balet diad unor a komparment et wala so linmesan kairapan. Anggapo ed saray managbiahe so malabay a mangawat na kopya na saray magasin tayo. Diad kaunoran, sakey a lakin sisasanok a tuloy so tinmalindeg tan kinmelyaw: ‘Ibantak kon amin iray magasin mo’d bentana! Akin a masyado yo kamin iisturboen na relihyon yo?’ Say manangipalapag so mauyamon inmebat ya anggano ibantak ton amin so magasin, wala so nagunggunaan ed satan a kiwas to—saramay makarokdok ed saray magasin. Naimanoy inkakalmado na manangipalapag, say laki so ontanlan asagyat ya inala to iray magasin tan saratan so ginapoan ton mismo ya inbubunog ed arum iran managbiahe ed saman a kompartment. Makapakelaw ya amin da so angala na magasin. Kayari impangibunog to, naandian na kopya so laki. Kanian, sikatoy tinepetan na manangipalapag: ‘Mama, agyo ta labay a nawalaan kayo na dilin kopya yo?’ Diad saman siningkat na laki so sakey ed saray magasin manlapud sakey a managbiahe a walaay duaran kopya tan inkuanto: ‘Natan awalaan ak met na sakey a kopya!’”
Diad dakel iran bansa say panagpulong a kimey na saray Tasi nen Jehova so no maminsan et nanlagyat ed isusumpa na kleroy Kakristianoan. Diad Romania, saray pari na Iglesian Ortudoks so mabetbet ya onsasanok ed saray Tasi. Balet agmamatunda iya ed si Jehova diad panamendisyon ed totoo to lapud aron ipapanengneng da ed ngaran to. Isulat na sakey a manangasikaso na sirkito:
“Kaiba so lokal a kongregasyon, sikami so linman nanpulong ed saray baryo. Wala so sanlasus ya agagi. Angabang kami sakey a bus a nambiahey 50 kilmetro pian makasabi’d saray uma na melag a baley. Inimbitaan miy dakel ed publikon paliwawa a nagawa’d Cultural Home. Nen ikuanlan igapoy miting, sinmabiy pari na Ortudoks pian guloen so miting mi. Sinalin patundaen na saray pulis so pari. Anggaman kuan, agto tinmunda. Sikatoy tinmalona ed impamatunday miting sanen pinisit toy salming ed arapan a lolooban a puerta. Anggaman ontan, dakel ed saray lokal a manaayam diman so ag-akikasakey a balot ed kondukta na pari. Sirin sakey a nagnap a pantasi so niiter ed amin na inmatendi, tan dakel a literatura so nibunog.”
Makapaermen, diad pigaran parte na bansa, dagdaiset iray Tasi. Sanen sakey a regular payunir so inmunan sinmabi diad county na Olt, aromog ton siatsiamera so agagi ed interon county tan sakey a baleg a teritoryan pupulongan. Kayari sakey taon, say bilang na Tastasi so binmaleg ed 27, a limara ed sikara so nagmaliw lamet ya aktibon manangipalapag. Inletneg na payunir iray pundoan to ed syudad na Corabia, ya anggapo diman so Tasi. Kayarin wadman iray Tasi ed loob labat na 45 agew, say lokal a pari so nanprotesta diad panamegley na radyo na Craiova sumpad kimey da. Inkuanton “nilubak” day syudad na Corabia tekep na saray bangat da, a sasalien dan umanen so relihyon na totoo. Nantultuloy iray panangataki, diad getman patundaen so kimey tan deralen so maabig a pakatongtongan na Tastasi ed saman a pasen. Pinmantok itan sanen saray agagi so walad Bucharest parad distrito kumbension. Say pari na Ortudoks ed Corabia so mabiskeg ya angiyanunsio kayari na serbisyo to’d simbaan: “Amin tayo so manggawa komon na demostrasyon ed lansangan pian sagyaten so pulisya ya onsumpad saray Tasi, a mangiimpluensya ed interon pasen diad saray palapagan da tan manasamal ed totoo.” Balet diad mismon labi sakbay na kagawa komon na pantitipon, sakey a bengatlan aggendagendat so agawa. Sakey a grupo na bandalismo so aneral ed simbaan tan say City Cultural Home. Kanian, say panagprotestan miting so agbalot agawa!
Saray Teritorya na Datin Yugoslavia
Say 1992 serbisyon taon so sankairapan a taon parad saray agagi ed pasen na Yugoslavia. Anggaman ontan, diad parehon panaon, sikaray awalaan na pigaran magayagan eksperiensia. Maong ta aglilingwanan nen Jehova so kimey da tan aron nipanengneng da ed ngaran to.
Inmunan ginmapo so bakal ed Slovenia, insan diad Croatia, tan diad saginonor et diad Bosnia tan Herzegovina. Diad loob na sakey taon, diad saksakey a republika, limaran balo iran Estado so nanbabanikel a mangiletneg na dilin ketegan, ganggan, tan kuarta ra. Nilasus ed Tastasi so kaukolan ya ontaynan ed saray ayaman da tan mananap na salimbeng ed saray agagi ra ed arum a paspasen. Mipadpara ed arum iran bansa ed Mamabukig a Europa, tinuro iray komite na emerhensya diad babaleg a syudades, a mangasikaso ed saray panpundoan, tagano, tan kawesen parad mankakaukolan ya agagi tayo. Legan na serbisyon taon, ngalngali 55 toneladan tagano so inbunog ed saray agagi diad saray kongregasyon a walad nagogonigon a paspasen. Dakel iran sulat na apresasyon so nareresibe.
Insalaysay na agagi diad Dubrovnik no panon a sikaray misalsalamat nisesengeg ed tulong a niiter ed sikara. Legan a sakey ya agin bii so sinmempet a walaan na supot na tagano, sakey a kaabay so tinmepet no iner so angaliwan to na saray iknol. Imbaga na agin bii ed sikato ya inpawit na saray espiritual ya agagi to ed sananey a lugar. Say kaabay so nikelawan. Diad sananey a kaso sakey ya agkabat a lakin taga Slovenia so tinmawag ed sakey a matatken tan kuanto: “Nadngelan kon saray Tasi nen Jehova so mangibubunog ed taganon naawat da manlapud agagi ra diad dugan paraan. Angipawit ak na pigaran supot ed totoo, anggaman ontan et ag-iran balot sinmabi ed ginetma iran destinasyon da. Nayarin ipawit ko iratan a pananulong iran bengatla ed sikayo, tan nayarin ibunog yo iratan?” Ontan met, saray dyaryo tan radyo so paborablen angireport nipaakar ed pananulong a kimey tayo.
Amta na sakey ya agin lakin abautismoan ed internasyonal a kumbension diad Zagreb nen 1991 so ondaraak iran kairapan et analiw na interon lako na panagsaliwan na tagano. Inawit toy tagano ed abung ton asingger ed bakalan. Legan ya onpapalalo so kakisiray tagano, sayan suplay so apaneknekan a nagmaliw a peteg a bendisyon ed agagi.
Posibli so pakagamor na permiso parad sakey a baleg a trak pian mangawit na saray tagano parad saray agagin akulong ed Sarajevo. Maliket kamin mangibaga a say impangidiliber so matalonan agawa.
Say bakal so angapekta ed saray sibilyan. Makapaermen, diad sampot na serbisyon taon et anemiran agagi tayon lalaki tan bibii tan duaran interesado so inatey, tan arum so asugatan.
Anggaman ontan, ipapanengneng na dakel ya eksperiensia a diad interamenti et sakey a salimbeng so pagmaliw a sakey ed saray Tasi nen Jehova. Diad sakey a kaso saray agagi so nanbibiahen mamaarap ed sakey a distrito kumbension diad Belgrade sanen say bus so pinatunda na saray sundalo, a tinepet da no kasin walaray membro na sakey a relihyon ed limog da. Inmebat iray agagi ya anggapo. Kaukolan ya ipanengneng daray pakabidbiran iran kard da, tan arum ed sikara so walaan na kangaranan a mangipanengneng a nayarin sikaray kabiangan na satan a relihyon. Inakusa ira na saray sundalo so mantitila, balet saray agagi so walaan na paimanon inmekal manlapud iglesia; anggaman sikaray niyanak ed saman a relihyon, inkuandan sikara la natan so Tastasi nen Jehova, a manbibiahen mamaarap ed kumbension da. Diad saya saray sundalo so angiyabuloy ed sikaran ontuloy ed biahe ra.
Saray payunir so nantultuloy ed serbisyo ra tekep na agnababawasan a seseg, tan napapaneknekan iyan nagmaliw a peteg a panamayubo ed kimey. Say Panag-Bantayan, tekep na makapaliket iran apis ton de-kolor, so nipapatalos a bansag ed amin a manunan lenguahe na rehyon. Satan so maparanay a mangitatarok ed saray manangaro na katuaan tan inkatunong na espiritu l a “nabebetangan dan tagano ed dugan panaon.” (Lucas 12:42, NW) Legan na 1992 serbisyon taon, 674 balon agagin lalaki tan bibii so abautismoan.
Andi duaruwan aglilingwanan na Dios so kimey na saray agagi ed Mamabukig a Europa tan aron ipapanengneng da ed ngaran to. Niarum ni, pilalek to ya amin a managdayew to, inerman so panaayaman da et ontumbok ed maabig a konsehon tinmunbok ya inter nen Pablo, ed Hebreos 6:11, ya ibabaga to: “Panpirpirawatan mi ya balang sakey ed sikayo ipanengneng to so onman a seet nipaakar ed inkapno na andi kaatapan ya ilalo anga ed kasampotan.”