Apocalipsis—Asingger la so Engranden Kapantokan To!
Kapitulo 13
Sakey a Trono a Para ed Saray Manalo
23, 24. (a) Diad anton malaknab a tumang so sasalitaen nen Jesus? (b) Kapigan so inyurong nen Jesus ed Mesianikon trono to, tan kapigan so inggapo ton pangukom ed saray mangibabagan Kristianos? (c) Anton makapakelaw a sipan so ginawa nen Jesus ed saray babangatan to sanen inletneg to so Memoryal na impatey to?
23 Sasalitaen nen Jesus so malaknab nin tumang, a kuanto: “Diad saman so manalo et iter ko so piyurong ed siak diad tronok, a singa siak so analo tan akiyurong ed Amak diad trono to.” (Apocalipsis 3:21) Diad kasumpalan na saray salita nen David ed Salmo 110:1, 2, say manamemben-katooran a Jesus, unong ya analo ed mundo, so apaoli nen 33 K.P. tan nitandoro a miyurong ed si Ama to ed mangatatawen a trono To. (Gawa 2:32, 33) Diad sananey nin makanan taon, 1914, si Jesus so sinmabi ya onyurong ed dilin Mesianikon trono to bilang Ari tan Ukom. Say pananghuis so ginmapo nen 1918 ed saray mangibabagan Kristianos. Saray alanaan a mananalo ya inatey sakbay na saman a panaon so apaoli ed saman tan akikasakey ed si Jesus ed Panarian to. (Mateo 25:31; 1 Pedro 4:17) Saya so insipan to ed sikara sanen inletneg to so Memoryal na impatey to, a kuanto ed saray babangatan to: “Siak so manggawa na sipan ed sikayo, unong a singa say Amak so nanggawa na sakey a sipan ed siak, nipaakar ed sakey a panarian, pian sikayo so mangan tan oninum ed dulang ko diad panarian ko, tan onyurong ed saray trono a mangukom ed labinduan tribu na Israel.”—Lucas 22:28-30.
24 Agaylan makapakelaw a kimey—piyurong ed manuuley ya Ari kaleganan “na panamalsa-lamet” tan mibiang ed sikato, diad letnegan na ayadyarin bagat to, ed pangitandoro ed mundo na matulok a katooan diad Edenikon inkayadyari! (Mateo 19:28; 20:28) Unong ya ipapakabat ed sikatayo nen Juan, gawaen nen Jesus iraman so manalo a “sakey a panarian, saserdote ed Dios tan Ama to,” a mangukopa ed saray trono ed liber na dilin sankarakpan a mangatatawen a trono nen Jehova. (Apocalipsis 1:6; 4:4) Komon ta amin tayo—balanglan kabiangan na alanaan odino ed balon dalin a sosyedad a maniilalon mibiang ed panangipawil ed Paraiso—so mangipapuso ed saray salita nen Jesus ed saray taga Laodicea!—2 Pedro 3:13; Gawa 3:19-21.
25. (a) A singa ed saray akaunan mensahe, panon so impangisampot nen Jesus ed mensahe to diad Laodicea? (b) Panon so nepeg ya ikiwas na sinansakey a Kristianos natan ed saray salita nen Jesus diad kongregasyon ed Laodicea?
25 Singa ed saray akaunan mensahe, sinampotan nen Jesus iyan sakey diad saray salita na panamilin: “Komon ta say sakey a walaan na layag so ondengel ed ibabaga na espiritu ed saray kongregasyon.” (Apocalipsis 3:22) Sikatayo so manbibilay ed kaaralman na panaon na anggaan. Say ebidensya so walan amin ed kaliberliber tayo a say Kakristianoan so ambetebetel no nipaakar ed panangaro. Miduma, komon ta sikatayo bilang tuan Kristianos so onkiwas a sisisimoon ed mensahe nen Jesus ed kongregasyon diad Laodicea, on, ed amin a pitoran mensahe na Katawan ed saray kongregasyon. Saya so nagawaan tayo diad magunaet a pibibiang ed kasumpalan na baleg a propesiya nen Jesus ed agew tayo: “Tan sayan maong a balita na panarian so nipulong ed amin a panaayaman a dalin ya onkanan pantasi ed amin a nasyones; tan insan onsabi so anggaan.”—Mateo 24:12-14.
26. Kapigan lamet so impisalita nen Jesus a direkta ed si Juan, balet diad anto so akibiangan to?
26 Say simbawa nen Jesus ed saray pitoran kongregasyon so anampot. Sikato so agnansalita ed si Juan lamet ed Apocalipsis ya anggad unor a kapitulo; balet sikato so akibiang ed dakel ed saray pasingawey, alimbawa, diad panangidapo na saray panangukom nen Jehova. Mibiang tayo natan ed Juan a klase diad panangusisa ed komaduan makatantandan pasingawey ya imparungtal na Katawan a Jesu-Kristo.