Say Sankabalgan a Toon Nambilay ed Kapiganman

Kapitulo 28

Sinuppiat Nipaakar ed Panag-ayunal

Ngalngalin sakey taon la so apalabas nanlapud inyatendi nen Jesus ed Paskua na 30 K.P. Natan, pigaran bulan la a nipangaw si Juan a Bautista. Anggaman nilabay toray babangatan ton magmaliw a patumbok nen Kristo, pigara lambengat ed sikara so nagmaliw ya ontan.

Natan arum ed sarayan babangatan na nipangaw a Juan so linma ed si Jesus tan nantepet: “Akin et sikami tan saray Fariseos manayunal kami a mabetbet, balet saray babangatan mo ag ira manayunal?” Saray Pariseo so mangaagamil na panag-ayunal a mamidua ed sakey simba bilang sakey a ritual na relihyon da. Tan nayarin tutumboken na saray babangatan nen Juan so mipadparan kustombre. Nayari met a sikaray manaayunal pian gogolan so inkipangaw nen Juan tan manumameng no akin a saray babangatan nen Jesus so agmibibiang ed sikara ed sayan panangibalikas na ermen.

Diad ebat, impaliwawa nen Jesus: “Nayarian ta na saray anak na panbansalan so manermen, legan na piayam na novio ed sikara? balet ta onsabi naani so saray agew, a kitainan na novio ed sikara, et saman la ra manayunal.”

Nepeg a nonoten na saray babangatan nen Juan a si Juan a mismo so anukoy ed si Jesus bilang say Nobyo. Kanian legan a presente si Jesus, ag-ipasen nen Juan a matukoy so panayunal, ni saray babangatan nen Jesus. Saginonor, sanen inatey si Jesus, saray babangatan to so peteg a nanermen tan nanayunal. Balet sanen sikatoy apaoli tan tinmokotok ed tawen, anggapo lay rason a sikaray manermen ni tan manayunal.

Insan, inter nen Jesus irayan ilustrasyon: “Anggapo’y too a mangisakab na balo ya abel ed daan a kawes; ta [no] satan so isakab pinaten to’y kawes, et onloor so pilat. Agda met yan so balo’n alak ed saray daan ya supot a katat: ta no andi napilat so saray katat naibung so alak, tan saray katat naderal: ingen yan da’y balo’n alak ed supot a balo ya katat.” Anto so pisiglaotan na sarayan ilustrasyon ed panag-ayunal?

Tinulongan nen Jesus iray babangatan nen Juan a Bautista a mangapresya ya anggapo so nepeg a manilalo a mipakna iray babangatan to ed saray daan ya agamil na Judaismo, a singa say ritual a panag-ayunal. Sikatoy aglinma dia pian sakaban tan parukeyen so daan lan tuloy a sistema na panagdayew ya akaparaan lan naekal. Agnepeg ya itukoy so Inkakristiano ed Judaismo’d saman a pati saray tradisyon na totoo. Andi, satan so agnepeg a singa balon sakab ed daan a kawes odino singa balon alak ed daan a katat. Mateo 9:14-17; Marcos 2:18-22; Lucas 5:33-39; Juan 3:27-29.

▪ Siopa so mangaagamil na panag-ayunal, tan para’d anton gagala?

▪ Akin ya agnanayunal iray babangatan nen Jesus, kaleganan a kaiba to’ra, tan saginonor panon a magano lan naandi so sengegay panag-ayunal?

▪ Anton ilustrasyon so insalaysay nen Jesus, tan anto so kabaliksan na saraya?