Say Sankabalgan a Toon Nambilay ed Kapiganman

Kapitulo 34

Panagpili ed Saray Apostol To

Ngalngalin sakey taon tan kapaldua labat sanen impakabat nen Juan a Managbautismo si Jesus bilang say Kordero na Dios tan si Jesus so angigapo ed mapublikon ministeryo to. Diad saman a panaon et si Andres, Simon Pedro, Juan, tan nayarin si Santiago (ya agi nen Juan), ontan met ed si Felipe tan Nataniel (a tatawagen met na Bartolome), so nagmaliw ya inmunan babangatan to. Asabi panaon, dakel nira so akiulop ed sikara ed itutumbok ed Kristo.

Natan et akaparaan la si Jesus a mamili na saray apostol to. Saraya so magmaliw a maapit a kakaiba to a naikdan na nikadkaduman panagsanay. Balet sakbay a sikara so pilien, si Jesus so linma ed sakey a palandey tan nansalabi ed panagpikasi, a maseguron onkekerew na kakabatan tan panamendisyon na Dios. Sanen inmagew la, tinawag toray babangatan to tan manlapud sikara et sikatoy amili na 12. Anggaman kuan, lapud sikara so mantutultuloy a babangatan nen Jesus, mansiasiansia niran tatawagen a babangatan met.

Anemira ed saray pinili nen Jesus, ya asalambit ed tagey, et saraman so nagmaliw ya inmunan babangatan to. Si Mateo, a tinawag nen Jesus manlapud panagbuwisan ya opisina to, so pinili met. Saramay arum a limaran pinili et si Judas (a tatawagen met a Tadeo), Judas Iscariote, Simon a taga Canaan, Tomas, tan Santiago ya anak nen Alfeo. Sayan Santiago so tatawagen met a Santiagon Malangwer, nayarin lapud memelag ed impanlaman odino malalangwer ed edad nen samay sakey ya apostol Santiago.

Natan et sarayan 12 so abaybayag lan kakaiba nen Jesus, tan kabkabat tola’ran tuloy. Diad tua, dakel ed sikara so kakapinsan to a mismo. Si Santiago tan say agi ton si Juan so mapatnag a kakapinsan ton peteg. Tan nayarin si Alfeo so agi nen Jose, say amabaleg ed si Jesus. Kanian say anak nen Alfeo, say apostol Santiago, so magmaliw met a kapinsan nen Jesus.

Siempre, si Jesus so andian na problema ed pananda ed kangaranan na saray apostol to. Balet kasin natandaan mo’ra? Bueno, tandaan labat a wala so duaran manngaran na Simon, duaran manngaran na Santiago, tan duaran manngaran na Judas, tan si Simon so walaan na agin Andres, tan si Santiago so walaan na agin Juan. Satan so tumbok ed pananda ed saray waloran apostol. Say arum ya apatira so mangilalaktip na sakey a managsingil na buwis (si Mateo), sakey a diad saginonor et nanduaruwa (si Tomas), sakey a tinawag manlapud silong na sakey a kiew (si Nataniel), tan say kaaro ton si Felipe.

Labinsakey ed saray apostol so taga Galilea, say baley a binalegan nen Jesus. Si Nataniel so taga Cana. Sikara di Felipe, Pedro, tan Andres so gendat a taga Bethsaida, di Pedro tan Andres so diad saginonor et inmalis ed Capernaum, ya ompatnag a nanayaman nen Mateo. Sikara di Santiago tan Juan so walad anapan a panagsigay tan nayarin nanayam met ed odino asingger ed Capernaum. Ompatnag a si Judas Iscariote, ya angitapat ed kinen Jesus, so mogmon apostol a taga Judea. Marcos 3:13-19; Lucas 6:12-16.

▪ Sioparan apostol so nayarin kakapinsan nen Jesus?

▪ Sioparay apostol nen Jesus, tan panon mo a natandaan so kangaranan da?

▪ Taga iner iray apostol?