Say Sankabalgan a Toon Nambilay ed Kapiganman

Kapitulo 33

Panumpal ed Propesiya nen Isaias

Kayarin akabatan nen Jesus so planon pamatey ed sikato na saray Pariseo tan saray patumbok a kapartido nen Herodes, sikato tan saray babangatan to so inmatras ed dayat na Galilea. Dia et baleg ya ulop a manlapud interon Palestina, tan anggad manlapud paway ni ingen na ketegan to, so inmasingger ed sikato. Dakel so pinaabig to, a say resulta et amin iramay walaan na makapaermen a sakit so nanggunaet pian sikato so nadiwit.

Lapud dakel a tuloy so totoo, imbaga to ed saray babangatan to a naynay a mangiparaan na baloto a naluganan to. Diad iyarawi manlapud gilig, napaliisan toray karaklan manlapud iseseksek ed sikato. Nayarian toran bangatan manlapud baloto odino manbaroy ed sananey a lugar pian tulongan so totoo diman.

Naiimano nen babangatan a Mateo a say kimey nen Jesus so manusumpal ed “sinalita nen Isaias ya profeta.” Insan inaon nen Mateo so propesian sinumpal nen Jesus:

“Nia, so aripen ko a sikato’y pinilik; Inararok a dia’d sikato napaliket so kamarerwak: Say Espirituk yan ko naani ed sikato, Et ipakaba’ to naani ed saray Gentil so panangokom. Sikato’y agmisiblangan naani tan agmet oningal; Tan angapo met naani makadngel na voces to ed saray polong. Say kawayan a betag sikato’y agto naani puteren, Tan say pabilo’n manasewek agto naani erepen, Anga ed napan-palabo to’y panangokom. Et dia’d ngaran to so panilaloan na saray Gentiles.”

Siempre, si Jesus so inararon aripen ya inabobonan na Dios. Tan pinalinew nen Jesus no anto so tuan inkahustisya, a pabibilungeten na saray palson relihyoson tradisyon. Lapud pikewet a panangiyaplika ra ed ganggan na Dios, saray Pariseo so ag-anggan ontulong ed sakey a mansasakit a too no Sabaton! Ipapalinew so inkahustisya na Dios, inekalan nen Jesus iray totoo na pabelat na pikewet iran tradisyon, tan lapud saya, sinali na saray relihyoson pangulo a sikatoy pateyen.

Anto so labay ya ibaga na ‘sikato’y agmisiblangan naani tan agmet oningal, tan angapo met naani makadngel na voces to ed saray polong’? Sano mamapaabig na totoo si Jesus, ‘ibibilin ton malmalet ed sikara a sikato’y agda ipakabat.’ Agto labay a sikatoy nawalaan na maingal a panangiyanunsyo ed sikato a mismo diad saray lansangan odino nawalaan na pinikewet a salaysay ed katuaan.

Ontan met, impasabi nen Jesus so makaligliwan mensahe to ed saray totoon singa kawayan a betag, apiklo tan agatin-gatinan. Sikaray singa pabilo’n manasewek, a say ultimon kidyam na bilay to et ngalngali lan naerep. Agpuputeren nen Jesus so kawayan a betag odino eerepen so mankuyep, manasewek a pabilo. Balet diad inkamatamoy tan aro, onsiano ton aagwaten so mauyamo. Peteg, si Jesus imay sakey a saray nasyon et nayarin makapan-ilalo! Mateo 12:15-21; Marcos 3:7-12; Isaias 42:1-4.

▪ Panon a pinalinew nen Jesus so inkahustisya, ya agmisisiblangan odino mangipapaknol na boses to ed saray polong?

▪ Sioparay singa sakey a kawayan a betag tan sakey manasewek a pabilo, tan panon ya impasen ira nen Jesus?