Say Sankabalgan a Toon Nambilay ed Kapiganman

Kapitulo 32

Anto so Maptek a Gawaen no Sabaton?

Saman so sananey nin Sabaton a si Jesus so dinmalaw ed sakey a sinagoga asingger ed Dayat na Galilea. Wadman so sakey a lakin say kawanan a lima to so amagaan. Saray eskriba tan saray Pariseo so maapit a manbabantay pian nengnengen no kasin sikato so paabigen nen Jesus. Diad kaunoran et intepet da: “Kasin maptek so mantambal no Sabaton?”

Saray Judion relihyoson pangulo so manisian say panagpaabig so maptek a gawaen no Sabaton sano say bilay lambengat so walad kapeligroan. Alimbawa, ibabangat da ya aliwan maptek sano Sabaton ya ipetek so sakey a pukel odino bedberan so sakey ya alikda. Kanian saray eskriba tan saray Pariseo so manusuppiat ed kinen Jesus diad gunaet dan makala na akusasyon sumpad sikato.

Anggaman kuan, kabat nen Jesus so panagkatunongan da. Diad parehon bekta, amoria ton sikaray angadapta na sakey ya alablabas, agmakasulatan a panmoria no anto so kabaliksan na sakey ya isusumlang ed agew na Sabaton a manesebel ed pantrabaho. Sirin nipaarap si Jesus para’d sakey a dramatikon panaarapan diad impangibaga ed lakin walaay amagaan a lima: “Talindeg ka tan alagey ka ed pegley.”

Natan, diad iyaarap ed saray eskriba tan saray Pariseo, inkuan nen Jesus: “Siopa ed sikayo a walaan na sakey a karnero tan, sano saya so napelag ed sakey ya abot ed Sabaton, et saya so agto alaen tan agwaten?” Lapud say sakey a karnero so mangirerepresenta na pinansyal a puonan, saya so agda papaulianan anggad ontombok ya agew, a nayarin mansakit tan mankabaliksan na kalugi ra. Nilikud ni, ibabaga na Kasulatan: “Say maptek a too pablien to so bilay na ayep to.”

Pian ipanengneng so pipara, intuloy nen Jesus: “Amin so inkonsidera, kaunongan ni so sakey a too a walaay kablian to nen say sakey a karnero! Kanian maptek so manggawa na sakey a maabig a bengatla no Sabaton.” Saray relihyoson papangulo so agmakayarin suppiaten so ontan a lohikal, maabagey a panagkatunongan, tan sikaray agla inmesel.

Tekep na sanok, ontan met na ermen ed inmawet ya inka-ambagel da, ninmengneng si Jesus ed kaliberliber. Insan inkuanto’d samay laki: “Iyunat mo so limam.” Tan inyunat to tan say lima so inmabig.

Imbes a manliket a say lima na laki so inmabig, saray Pariseo so pinmaway tan tampol ya akikomplot ed saray patumbok a kapartido nen Herodes pian pateyen si Jesus. Sayan partido pulitikal so mapatnag a mangilalaktip ed saray membro na relihyoson Saduseo. Diad inkalapagan, sayan partido pulitikal tan saray Pariseo so maparungtal a sumpad sakey tan sakey, balet ta sikaray malet a nankakasakey ed isusumpa ra ed si Jesus. Mateo 12:9-14; Marcos 3:1-6; Lucas 6:6-11; Uliran 12:10 Exodo 20:8-10.

▪ Anto so kipapasen para’d sakey a dramatikon panaarapan ed baetan nen Jesus tan Judion relihyoson papangulo?

▪ Anto so sisiaen na sarayan Judion relihyoson pangulo nipaakar ed panagtambal no Sabaton?

▪ Anton ilustrasyon so inusar nen Jesus pian peteken so lingon panmoria ra?