Say Sankabalgan a Toon Nambilay ed Kapiganman

Kapitulo 31

Panangetel na Dawa ed Sabaton

Ag-abayag et si Jesus tan saray babangatan to so tinmaynan ed Jerusalem pian ompawil ed Galilea. Saman so panaon na primabera, tan diad uma et wala’ra so dawa. Saray babangatan so narasan. Kanian angetel ira na samet a dawa tan angan. Balet lapud saya so Sabaton, saray kiwas da so naimano na arum.

Saray relihyoson papangulo ed Jerusalem so nangetma a pateyen si Jesus para’d kuan ya isusumlang ed Sabaton. Natan et saray Pariseo so angitarok na sakey ya akusasyon. “Nia! Saray babangatan mo so manggagawa na bengatlan agnepeg a gawaen ed Sabaton,” so pakasalanan da.

Ibabaga na saray Pariseo a say pangetel tan pangupo-gupo ed satan diad lima so panagani tan pansilwag. Balet say istrikton a panangipatalos da ed no anto so kabaliksan na kimey so nanggawa ed Sabaton a makapabelat, bangta saman so ginagalan magmaliw a magayaga, makapaseseg ed espiritual a panaon. Kanian diad panuppiat et angusar si Jesus na alimbawa ed Kasulatan pian ipanengneng ya agbalot ginagala nen Jehova a Dios so ontan ya agmakatunongan ya istrikton panangiyaplika ed Sabaton a ganggan To.

Imbaga nen Jesus a sanen si David tan saray totoo to so narasan, sikara so tinmunda ed tabernakulo tan angan na tinapay na panangiyapay. Saraman a tinapay so inekal la manlapud arapan nen Jehova tan sinalatan na saray balo, tan saraya so ordinaryon ingganan kanen na saray saserdote. Ingen, diad saraman a kipapasen, si David tan saray totoo to so agkinondena ed impangan da.

Diad pangitatarok ni na sakey ya alimbawa, inkuan nen Jesus: “Agyo ta abasa ed Ganggan a diad Sabaton et saray saserdote ed templo so mangipapasen ed Sabaton bilang aliwan sagrado tan mantultuloy ya anggapoy kasalanan?” On, anggaman ed Sabaton et saray saserdote so tuloy-tuloy ed panlalabak tan arum niran kimey ed templo diad pangiprepara na saray bagat ya ayep! “Balet ibaga’k ed sikayo,” kuan nen Jesus, “a sakey a bengatlan babaleg nen say templo so wadia.”

Diad panisimbawa ed saray Pariseo, intuloy nen Jesus: “No atalosan yo labat no anto so labay ya ibaga na saya, ‘Kaukolan ko so panangasi, tan aliwan bagat,’ agyo komon kinondena iray andian na kasalanan.” Insan sinampotan to: “Lapud Katawan na Sabaton so Anak na too.” Anto so labay ya ibaga nen Jesus ed satan? Tutukoyen nen Jesus so mareen a sanlibon taon ya uley to ed Panarian.

Diad loob na 6,000 taon la natan, say sankatooan so manasagmak na makapabelat ya inkaaripen ed silong nen Satanas a Diablo, tekep na karawalan tan bakal a nagagawa ed inagew-agew. Diad biek a dapag, say baleg ya uley nen kristo ed Sabaton so magmaliw a panaon na painawa manlapud amin ya ontan a kairapan tan panaglames. Mateo12:1-8; Levitico 24:5-9; 1 Samuel 21:1-6; Numeros 28:9; Oseas 6:6.

▪ Anton panamakasalanan so ginawa sumpad saray babangatan nen Jesus, tan panon ya inebatan nen Jesus itan?

▪ Anto so lingo na saray Pariseo ya impakabat nen Jesus?

▪ Diad anton pamaakaran a si Jesus et “Katawan na Sabaton”?