Say Sankabalgan a Toon Nambilay ed Kapiganman

Kapitulo 30

Eebatan Iray Manangakusa To

Sanen saray Judion relihyoson lider so angakusa ed si Jesus a mamubuyak ed Sabaton, inyebat to: “Si Amak so mankikimey ni anga ed natan, tan siak mankimey ak.”

Anggaman ed ibabaga na saray Pariseo, say kimey nen Jesus so aliwan singa samay isesebel ed ganggan na Sabaton. Say kimey ton panagpulong tan panagpaabig so sakey a ganggan a nanlapud Dios, tan ed pangalig ed ehemplo na Dios, itutultuloy ton gagawaen iman ya inagew-agew. Anggaman kuan, say ebat to so lalon amasanok ed saray Judio nen say gendat, tan ginetma ran sikatoy pateyen. Akin?

Lapud diad saman et sikara so aglabat manisia a si Jesus et mamubuyak na Sabaton noagta ipapasen so pangibabaga ton personal ya Anak na Dios bilang ayew. Anggaman kuan, si Jesus so ag-antakot tan inebatan toni’ra na malaglaem nipaakar ed apaboran a siglaotan to ed Dios. “Say Ama aroen to so Anak,” inkuanto, “tan ipanengneng to ed sikato so saray amin a bengatla’n gawaen to lanlamang.”

“Ta onong a say Ama paulien to’ray inatey,” intuloy nen Jesus, “ontan to met nia’y Anak mangiter na bilay ed labay to.” On, say Anak so mamapaoli la ed inaatey diad espiritual a paraan! “Say ondengel na salitak, tan manisia ed saman so angibaki dia ed siak,” inkuan nen Jesus, “[so] pinmaway ed ipapatey ya onloob ed bilay.” On, intuloy to: “Say [oras] so onsabi, tan natan la, sano narengel na saray inaatey so voces na Anak na Dios: et saray ondengel nabilay ira.”

Anggaman anggapo ni so nikurit a si Jesus so literal ya amaoli na siopaman manlapud patey, imbaga to ed saray manangakusa to a say ontan a literal a kikioli na inaatey so nagawa. “Ag kayo mankelaw ed saya,” inkuanto, “ta onsabi [oras], ya amin so saray wala ed saray [pakanodnonotan a lobok, NW] narengel da so voces to. Et onpaway ira.”

Anggad sayan panaon, mapatnag ya agnin balot deniskribe nen Jesus so importantin betang to ed gagala na Dios diad ontan a malinew tan pihon paraan. Balet walaan iray manangakusa nen Jesus na mas ni nen say mismon panagtasi to nipaakar ed sarayan bengatla. “Nanbaki kayo ed Juan,” impanonot nen Jesus ed sikara, “et tinasian to so katuaan.”

Duay taon labat ed asasakbay, imbaga nen Juan a Managbautismo ed sarayan Judion relihyoson lider so nipaakar ed samay Sakey ya onsaginonor ed sikato. Ipapanonot ed sikara so datin atagey a panangipasen da para’d say nipangaw la natan a Juan, inkuan nen Jesus: “Kinaliktan yo so nangayaga ed liwawa to ed sakey a panaon.” Impanonot nen Jesus iya ed ilalon sikaray natulongan, on, iliktar ira. Ingen sikatoy ag-onsasaral ed panagtasi nen Juan.

“Saray dili a kimey a gawaen ko [kaiba so milagron kagagawa to labat], mantasira ed siak, ya say Ama inbaki toak.” Balet nilikud ed satan, intuloy nen Jesus: “Say Ama ya angibaki ed siak, tinasiantoak.” Alimbawa, say Dios so angiter na pantasi nipaakar ed si Jesus ed inkabautismoan to, ya ibabagan: “Saya so Ana’ko ya inararok.”

Peteg, anggapoy rason na saray manangakusa nen Jesus pian sikatoy ipulisay da. Say mismon Kasulatan ya ibabaga dan susukimaten da so mamapaneknek nipaakar ed sikato! “No sinisia yo si Moises, sisiaen yo ak met komon,” sinampotan nen Jesus, “ta sikato insula’to so nipaakar ed siak. Balet no ag yo sisiaen so saray sulsula’to, panon so pananisia yo ed salitak?” Juan 5:17-47; 1:19-27; Mateo 3:17.

▪ Akin a say kimey nen Jesus so aliwan isusumlang ed Sabaton?

▪ Panon a deneskribe nen Jesus so importantin betang to ed gagala na Dios?

▪ Pian paneknekan a sikatoy Anak na Dios, siopan panagtasi so inturo nen Jesus?