Say Sankabalgan a Toon Nambilay ed Kapiganman

Kapitulo 29

Panggawa na Maabig Iran Kimey ed Sabaton

Saman so primabera na 31 K.P. Pigaran bulan labat so linmabas kayarin akitongtong si Jesus ed sakey a bii ed bobon diad Samaria legan a mamapaarap ed Galilea a nanlapud Judea.

Natan, kayari na malaknab a panagbangat ed interon Galilea, si Jesus so linma lamet ed Judea, tan dia nampupulong ed saray sinagoga. No ipareng ed atensyon ya inter na Biblia ed ministeryo to ed Galilea, daiset so isasalaysay to nipaakar ed aktibidad nen Jesus ed Judea legan na sayan ibibisita tan legan na saray bulan ya inusar to dia kayari na apalabas a Paskua. Mapatnag ya ag-apabli so ministeryo to ed Judea a singa agawa ed Galilea.

Ag-abayag et si Jesus so mamapaarap ed manunan syudad na Judea, say Jerusalem, para’d Paskua na 31 K.P. Dia, asingger ed Wangalan na syudad para’d saray Karnero, et say tangke a tatawagen a Bethzatha, no iner a dakel a mansasakit, bulag, tan piley et oonla. Manisia ra a napaabig iray totoo diad panamegley na isakat da ed saray danum na tangke sano saraya so akimbog.

Saman so Sabaton, tan anengneng nen Jesus so sakey a too ed abay na tangke a 38 a taon lan mansasakit. Lapud kabat to so kabayag la na pansasakit na too, intepet nen Jesus: “Labay mo ta so onabig?”

Inmebat ed kinen Jesus: “Katawan, anggapo so took a mangilasor ed siak ed tangke sano akimbog so danum; leleg ingen ya onlasor ak say sananey onaan la nen say siak.”

Inkuan nen Jesus ed sikato: “Alagey ka, libit mo so dokolan mo tan manakar ka.” Diad saman et tampol a say too so inmabig, nilibit to so dokolan to, tan nanakar!

Balet sanen anengneng na saray Judio iman a too, inkuanda: “Sabaton natan, tan agmatunong para’d sika a libiten mo so dokolan mo.”

Inmebat iman a too ed sikara: “Samay mismon sakey ya amaabig ed siak so angikuan ed siak, ‘Libit mo so dokolan mo tan manakar ka.’”

“Siopatay toon angikuan ed sika, ‘Libit mo tan manakar ka.’?” tepet da. Si Jesus so pinmaliis lapud say karaklan, tan saman ya apaabig so agmikabat ed ngaran nen Jesus. Anggaman kuan, saginonor et si Jesus tan saman a too so akapandumog ed templo, tan akabatan na too no siopa so amaabig ed sikato.

Kanian inanap na too iramay Judio pian ibaga ed sikara a si Jesus so amaabig ed sikato. Diad impakaamta da ed saya, linma iray Judio ed si Jesus. Para’d anton rason? Pian kabaten no anton paraan a nagagawa to irayan makapakelaw a bengabengatla? Andi. Noagta pian mananap na lingo ed sikato lapud gagawaen to irayan maabig a bengatla ed Sabaton. Tan ginmapo ra ingen a mamasegsegang ed sikato! Lucas 4:44; Juan 5:1-16.

▪ Kaunongan la so kabayag nanlapulad imbeneg ya imbisita nen Jesus ed Judea?

▪ Akin a say tangke a tatawagen a Bethzatha so bantog a tuloy?

▪ Anton milagro so ginawa nen Jesus diad tangke, tan anto so epekto na saya ed saray Judio?