Sikaray Atumangan Lapud Impanakar ya Andi-Pakabalawan

SI Jehova so mamebendisyon tan manutumang ed matoor ya ariripen to. Nayarin sikaray kaukolan a manalagar na pigaran panaon pian nanengneng so kasumpalan na saray gagala na Dios, balet agaylay liket sano naeksperiensia so panamendisyon to!

Saya so niyilustran tuloy ed ngalngali duan libon taon lan apalabas ed kipapasen na Judion saserdote a si Zacarias tan say asawa to, si Elizabet, a namparan nanlapud pamilya nen Aaron. Insipan na Dios a bendisyonan iray Israelita ed pakawalaan na ananak no sikara so sitotoor a manlingkor ed sikato. Inkuan to a saray anak so sakey a tumang. (Levitico 26:9. Salmo 127:3) Anggaman ontan, si Zacarias tan si Elizabet so andian na anak tan matatken lara.​—Lucas 1:1-7.

Ibabaga na Kasulatan a si Zacarias tan si Elizabet so “matunong ira a nanpadpara ed arap na Dios, a nanakar iran andi binalaw ed sikara dia ed saray amin a gangan tan bilin na Katawan.” (Lucas 1:6) Inaro ran tuloy so Dios ya aliwan pabelat ed sikara so panakar ed inkatunong a kurang tan ontulok ed saray ganggan to.​—1 Juan 5:3.

Ag-iilaloan Iran Bendisyon

Ompawil itayo ed sasaginonor a primabera odino asasakbay a tiagew na taon 3 K.K.P. Si Herodes a Baleg so manuuley bilang ari na Judea. Sakey ya agew, say saserdoten Zacarias so linmoob ed Masanton pasen ed templo diad Jerusalem. Legan a saray totoo so nantitipon pian manpikasi’d paway na santuaryo, sikato so amool ed insenso a binmalitok ya altar. Angangko et impasen a sankamapagalangan a panaon ed inagew-agew a serbisyo, saya so ginawa kayari impangiyapay ed bagat. Say sakey a saserdote so nayarin nawalaan na sayan pribilihyo a maminsan lambengat ed interon bilay to.

Agmakapanisia si Zacarias. Anta say anghel nen Jehova so akaalagey ed nikawanan a dapag na altar na insenso! Say masiken lan saserdote so agonigon tan ataktakot. Balet inkuan na anghel: “Zacarias, agka antakot; ta nadngel so pikakasim, et si asawam ya Elizabet mangianak ed sika na sakey ya anak a laki et tawagen mo so ngaran to a Juan.” On, dinengel nen Jehova so masimoon iran pikakasi nen Elizabet tan si Zacarias.​—Lucas 1:8-13.

Inyarum na anghel: “Et nawalaan ka na liket tan gayaga; tan dakel so napaliket ed kianak to: Ta baleg naani ed arap na Katawan, et ag oninum na alak tan inumen a mabayani; et napano na Espiritu Santo, angan manlapu ed eges nen ina to. Et dakel ed saray anak nen Israel so panpataoliento ed Katawan a Dios da. Et manakar naani ed arap to dia ed espiritu tan pakayari nen Elias, pian ipawil to so kapusoan na atateng ed saray anak, tan saray matulay panakaren to ra ed kakabatan na saray matunong; pian itadia-anto so Katawan na sakey a baley a maralato.” Lucas 1:14-17.

Tinmepet si Zacarias: “Anto so pakapatnaganko nia? ta masikenak la, tan si asawak matatken la ed taon.” Inmebat so anghel: “Siak si Gabriel ya manalalagey ed arap na Dios; et nibakiak a misalita ed sika tan mangyakar ed sika na saraya’n maong a balita. Et nia, naemel ka tan agka makasalita, anga ed agew a kasumpal na saraya a bengatla, lapu ed agmo sinisia so saray salitak, a sikara so nasumpal sano kanepegan da.” Sanen si Zacarias so pinmaway manlapud santuaryo, agto makapansalita, tan atebek na totoo a sikato so akanengneng na labas-nen-natural a bengatla. Anggapo so nagawaan to noag say mansinyas, a manguusar na panag-andawes pian ipatalos so kanonotan to. Sanen say mapublikon serbisyo to so asumpal la, sikatoy sinmempet.​—Lucas 1:18-23.

Sengegan na Pangayaga!

Unong a nisipan, ag-abayag si Elizabet so nawalan na rason pian mangayaga. Sikatoy nanlukon, ya angekal ed kababaingan na inkalepes to. Say kanayon ton si Maria so magayaga met, lapud saman met lanlamang ya anghel, si Gabriel, so angibaga ed sikato: “Nia, ilokon mo tan yanak mo so sakey ya anak a laki et tawagen mo so ngaran to a JESUS. Sikato naani baleg, et ningaran ya Anak na Sankatageyan; et ited na Dios a Katawan ed sikato so trono nen David ya ama to.” Si Maria so mabulos a mangala ed betang ya “aripen na Katawan [Jehova, NW].”​—Lucas 1:24-38.

Si Maria so nanapuran sinmempet ed ayaman di Zacarias tan Elizabet diad sakey a syudad na mapalandey a bansa na Judea. Sanen nadngelan so panangibano nen Maria, say ugaw a lukon nen Elizabet so linmukso. Lapud impluensyado na masanton espiritu na Dios, si Elizabet so angikelyaw: “Mapalar ka ed saray bibii, tan bendito so bunga na eges mo. Et iner so nanlapuan to nia ed siak a say ina na Katawan ko onla ed siak? Ta nia, sanen say tanol na panangibanom sinmabi ed saray layag ko, lapu ed gayaga ginmalaw so ugaw dia ed eges ko. Et mapalar so anisia; ta nasumpal so bengabengatla ya inpaipakabat ed sikato na Katawan [Jehova, NW].” Si Maria so kinmiwas tekep na baleg a gayaga. Say impansiansia nen Maria ed si Elizabet so binmayag na ngalngalin taloran bulan.​—Lucas 1:39-56.

Si Juan So Niyanak

Diad nigetar a panaon sakey ya anak a laki so niyanak na matatken laran Elizabet tan Zacarias. Diad komawalon agew, say ugaw so ginalsiman. Kaliktan na saray kanayon a tawagen imay ugaw a laki a Zacarias, balet inkuan nen Elizabet: “Aliwa’n ontan; noag ingen ingaran na Juan.” Kasin say agni makapansalitan masiken to so inmabobon? Diad sakey a tableta et nansulat: “Juan so ngaran to.” Tamtampol, say dila nen Zacarias so naaryaan, tan sikato so akapansalita, a bebinditoen si Jehova.​—Lucas 1:57-66.

Napno na masanton espiritu, say magayagan saserdote so nanpropesiya. Sikatoy nansalita a singa say insipan a Manangiliktar​—say ‘saklor na panangilaban nipaakar ed sikatayo Dia ed abung nen David ya aripen to’​—so nipalesa la a mitunosan ed Abrahamikon sipanan nipaakar ed Bini a kabendisyonan na amin a nasyon. (Genesis 22:15-18) Bilang say manangiyuna na Mesias, say dilin anak a laki nen Zacarias a mamilagron niyanak so ‘onla ed arap na Katawan pian itadia iray dalan to; ya ipakat so kilalaban ed baley to.’ Legan na ilalabas na saray taon, si Juan so nantultuloy a binmaleg tan nagmaliw a mabiskeg ed espiritu.​—Lucas 1:67-80.

Atumangan na Daakan

Si Zacarias tan si Elizabet so maabig iran alimbawa na pananisia tan anos. Sikaray nantultuloy a nanlingkor ed si Jehova a sitotoor anggaman kaukolan a sikaray manalagar ed Dios, tan say sankabalgan iran bendisyon da so sinmabi lambengat sanen sikaray maedad la.

Ingen, agaylaran bendisyon so pangagayagaan di Elizabet tan Zacarias! Diad silong na impluensya na espiritu na Dios, sikaran dua so nanpropesiya. Sikaray apribilihyoan a magmaliw ya atateng tan instruktor na manangiyuna na Mesias, si Juan a Managbautismo. Niarum ni, minoria ira na Dios bilang matunong. Ontan met, saramay mangegemtan natan na maridios a kurang so nawalaan na matunong a talindeg ed Dios tan makawat na dakel ya abendisyonan a tumang diad panaakar na andi-pakabalawan ed saray ganggan nen Jehova.