Say Sankabalgan a Toon Nambilay ed Kapiganman

Kapitulo 36

Say Baleg a Pananisia na Sakey ya Opisyal na Armada

Sanen intarok nen Jesus so Sermon to ed Palandey, ngalngali lan walad kapegleyan na mapublikon ministeryo to. Kabaliksan na saya a sikato so walaan na sakey taon tan siameran bulan odino onsulok ni a nakekeraan pian kumpletoen so kimey to ed dalin.

Si Jesus natan so onloob ed syudad na Capernaum, a pinagka-sentro na aktibidades to. Dia inmasingger iray mamasiken na Judios ed sikato tekep na sakey a kerew. Sikara so imbaki na sakey ya opisyal ed armada na Romano a sakey a Gentil, sakey a toon duma ed rasa na saray Judio.

Say inanaron aripen na opisyal na armada so ngalngali lan ompatey lapud seryoson inagem, tan pirawat ton paabigen nen Jesus so aripen to. Saray Judio so masimoon ya akikasi diad biang na opisyal: “Sikato so manepeg a gawaen mo so saya nipaakar ed sikato,” inkuanda, “ta inaro to so nacion tayo, tan impaalageyan to itayo na sinagoga tayo.”

Tampol, si Jesus so akila ed saray lalaki. Anggaman ontan, sanen sikaray asingger la, say opisyal na armada so angibaki na kakaaro pian ibaga: “Katawan, agka mansagpot agak onnepeg ya onloob ka ed silong na abung ko. Kanian agko met inpasen a manepegak ya ondago ed sika.”

Agaylan mapaabeban balikas parad sakey ya opisyal ya apasal a mangiganggan ed arum! Balet ta nayari met a nononoten to so kipapasen nen Jesus, momoriaen a say kustumbre so manesebel ed sakey a Judio manlapud pakawalaan na sosyal a pisisiglaotan ed saray aliwan-Judio. Anggan si Pedro so angikuan: “Amtayo a mauges ed sakey a Judio so mitipon odino onasinger ed too a sananey a nasyon.”

Nayarin lapud agto labay a si Jesus so managmak na saray pansumpalan na isusumlang ed sayan kustumbre, kinerew na opisyal ed kakaaro ton mikasi ed sikato: “Ibagam so salita, et say aripen ko onabig. Ta siak too ak met a niyan ed lepsag na pakauley, ya wala ed lepsag ko so saray sondalo: et kuan ko ed saya, Naka, et onla; tan ed sakey, Gala, et ondago; tan ed aripen ko Gawam’ya, et gawaen to.”

Bueno, sanen arengel nen Jesus iya, sikatoy nikelawan. “Kuan ko ed sikayo,” inkuanto, “angan dia ed saray Israelitas, andi, agak ni akaromog na onia kabaleg na pananisia.” Kayarin pinaabig so aripen na opisyal, inusar nen Jesus so pankanawnawa pian isalaysay no panon a saray aliwan-Judio ed pananisia so napaboran na saray bendisyon ya ipupulisay na saray andiay-pananisian Judio.

“Amayamay,” inkuan nen Jesus, “so onsabi a manlapu ed bukig tan [sagur], tan miyorong ira ed Abraham, tan Isaac, tan Jacob, dia ed panarian na tawen. Balet saray anak na panarian nibantak ira ed kabilungtan na paway: diman naani so pannangis tan panngalatenget na ngipengipen.”

‘Saray anak na panarian a nibantak ed kabilungetan na paway’ so peteg iran Judio ya agmangaawat na pankanawnawan niyopresin inmuna ed sikara ed pagmaliw a manuley a kaibay Kristo. Si Abraham, Isaac, tan Jacob so mangilalaman ed uksoyan na Panarian na Dios. Kanian isasalaysay nen Jesus no panon a saray Gentil so naabrasa pian miyorong ed mangatatawen a dulang, a singa panangibaga, “ed panarian na tawen.” Lucas 7:1-10; Mateo 8:5-13; Gawa 10:28.

▪ Akin a saray Judio so akikasi ed biang na sakey a Gentil ya opisyal na armada?

▪ Anto so nayarin mangipaliwawa no akin a say opisyal so ag-angimbita ed si Jesus ya onloob ed abung to?

▪ Anto so labay ya ibaga nen Jesus nipaakar ed pansara iran balikas to?