Say Sankabalgan a Toon Nambilay ed Kapiganman

Kapitulo 37

Pinunas nen Jesus so Ermen na Sakey a Baló

Ag-abayag kayari impanambal ed aripen na opisyal na armada, si Jesus so inmalis a mamaarap ed Nain, sakey a syudad a masulok a 32 kilometro ed abalaten-sagur na Capernaum. Saray babangatan to tan sakey a baleg ya ulop so akila ed sikato. Nayarin mansirunget la sanen sikara so asingger la ed ketegan na Nain. Dia et nabet da so sakey a tulor. Say bangkay na sakey a balolaki so aawiten a papaway ed syudad pian ipunpon.

Say kipapasen na ina so peteg a pakaskasi, lapud sikato so sakey a baló tan saya so bugbugtong ya anak to. Sanen inatey so asawa to, sikato so naliligliwa lapud kaantabay toy anak to. Saray ilalo, pilalek, tan ambisyon to so akasentro ed arapen na anak to. Balet natan et anggapo lay siopaman a pakarumogan toy pakaligliwaan. Maermen a tuloy legan a saray ombaley so manguulop ed sikato a mamaarap ed pasen na panangipunponan.

Sanen anengneng nen Jesus imay bii, say puso to so atenyeg ed mapalalon kaermenan to. Kanian tekep na inkamatamoy, tan ingen tekep na inkapekder a mangitarok na talek, inkuanto ed sikato: “Agka mannangis.” Say awawey tan kiwas to angalay imano na ulop. Kanian sanen inmasinger tan diniwit to so pangaawitan ed bangkay, saray managlibit so tinmunda. Amin so maseguron mankelaw no anto so gawaen to.

Tua a saramay manguulop ed kinen Jesus so akanengneng la ed sikato a mamilagron amaabig na dakel a totoon walaay sakisakit. Balet mapatnag a sikaray agnin balot akanengneng ed sikaton amaoli ed siopaman manlapud patey. Sarag to kasin gawaen itan a bengatla? Ipapaarap ed bangkay, inganggan nen Jesus: “Balolaki, kuan ko ed sika, Bangon ka.” Tan samay laki so binmangon! Sikatoy ginmapo a nansalita, tan sikatoy inyawat nen Jesus ed kinen ina to.

Sanen anengneng na totoo a samay balolaki so peteg a mabilay, ginapoan dan ikuan: “Sakey a baleg a profeta so inmalagey ed sikatayo.” Arum so angikuan: “Say Dios dinalaw to so baley to.” Maples a kinmayat so balita nipaakar ed sayan makapakelkelaw a gawa ed interon Judea tan amin a kabangibang a bansa.

Si Juan a Managbautismo so wala ni ed pangawan, tan labay to so makaamta na malaglaem ni nipaakar ed saray kimey a nayarian nen Jesus a gawaen. Saray babangatan nen Juan so angibaga na nipaakar ed sarayan milagro. Anto so inkiwas to? Lucas 7:11-18.

▪ Anto so nagagawa legan a manasingger si Jesus ed Nain?

▪ Panon a naapektaan si Jesus ed anengneng to, tan anto so ginawa to?

▪ Panon so inkiwas na totoo ed milagro nen Jesus?