Say Sankabalgan a Toon Nambilay ed Kapiganman

Kapitulo 38

Kasin Kinmulang na Pananisia si Juan?

Si Juan a Managbautismo, a walad pangawan ed ngalngali lan sakey taon natan, so akaawat na balita nipaakar ed inkioli na anak na baló ed Nain. Balet ta labay nen Juan a direktan narengelan ed si Jesus so nipaakar ed kabaliksan na saya, kanian imbaki to so duara ed saray babangatan to pian itepet: “Kasin sika imay Onsabin Sakey, odino alagden mi sananey ni?”, NW.

Satan so singano makapakelaw a tepet, nagkalautla ta anengneng nen Juan so espiritu na Dios a linmeksab ed si Jesus tan arengel so boses na panangabobon na Dios sanen babautismoan si Jesus ngalngalin duay taon lay apalabas. Say tepet nen Juan et nayarin sengegan na pangikuan na arum a say pananisia to so kinmesay. Balet ta aliwan ontan. Agtanton pagalangan nen Jesus si Juan, a singa gagawaen to ed sayan bekta, no si Juan so ginmapon manduaruwa. Sirin, akin a mantetepet si Juan na onia?

Nayarin labay lambengat nen Juan so sakey a panangipatua manlapud si Jesus a Sikato imay Mesias. Saya so makapabiskeg a tuloy ed si Juan legan a sikato so walad pangawan. Balet mapatnag a wala so nagkalalo ni ed tepet nen Juan nen say satan. Mabitar a labay ton naamtaan no wala ni so sananey ya onsasabi, sakey a kasandi, a singa kuan, a mangumpleto na kasumpalan na amin a bengabengatlan impasakbay a sumpalen na Mesias.

Unong ed saray propesiya na Biblia a kabat nen Juan, samay Sakey ya Alanaan na Dios so nepeg a magmaliw a sakey ya ari, sakey a manangiliktar. Ingen, si Juan so mansiasiansia ni bilang sakey a nipangaw, a dakel ni ingen iran bulan kayari bautismo nen Jesus. Kanian si Juan so mapatnag a manetepet ed kinen Jesus: ‘Peteg kasin sika imay sakey a mangiletneg na Panarian na Dios ed maparungtal a pakayari, odino kasin wala ni so sananey a sakey, sakey a kasandi, a nepeg min alagden pian sumpalen so amin a makapakelkelaw iran propesiya a misiglaotan ed gloria na Mesias?’

Imbes ya ibaga ed saray babangatan nen Juan, ‘Siempre siak imay sakey ya onsasabi!’ angitarok si Jesus ed saman a mismon oras na sakey a makatantandan panengneng diad panamegley na pamaabig ed dakel a totoo, a tatambalen ira manlapud amin a sakisakit tan beblay. Insan inkuanto ed saramay babangatan: “Onla kayo, et ibaga yo ed Juan so saray bengatla ya anengneng tan nadngel yo; saray bulag akanengneng ira, saray piley akaakar ira, saray akating alinisan ira, et saray telek akadngel ira, saray inatey inmoli ra ed bilay, saray duruka wala a nipulong ed sikara so saray maong a balita.”

Diad arum a salita, say tepet nen Juan so nayarin mankabaliksan na paniilalo a si Jesus so manggawa na mas ni nen say gagawaen to tan nayarin ibulos to si Juan a mismo. Anggaman ontan, ibabaga nen Jesus ed kinen Juan ya agmanilalo na mas ni nen saray milagron gagawaen nen Jesus.

Sanen tinmaynan iray babangatan nen Juan, si Jesus so inmarap ed karaklan tan imbaga ed sikara a si Juan so “igagangan” nen Jehova ya impasakbay ed Malaquias 3:1 tan sikato met so propetan Elias ya impasakbay ed Malaquias 4:​5, 6. Intandoro to sirin si Juan bilang kapara na siopaman a propetan nambilay sakbay to, ya ipapaliwawa: “Tua kuan ko’d sikayo, Diad saray nianak ed saray bibii agtinmalindeg so sakey a babaleg nen si Juan a Bautista: et ingen tan say kamelamelagan ed panariay tawen babaleg ni nen sikato. Nanlapu’d saray agew nen Juan a Bautista ya anga ed natan say panarian na tawen mantetepel na panamasoot, et saray totoo a manamasoot sikato’y alaen da’d biskegan.”

Ipapanengneng dia nen Jesus a si Juan so aglinma ed mangatatawen a Panarian, lapud say sankamelagan a sakey diman et babaleg nen say si Juan. Si Juan so angiparaan na dalan parad si Jesus balet ta inatey sakbay a pinaletan nen Kristo so sipanan, odino paknaan, ed saray babangatan to, parad say sikara so pagmaliw a kaiba ton mananguley ed Panarian to. Satan et no akin ya imbaga nen Jesus a si Juan so aglinma ed mangatatawen a Panarian. Imbes et si Juan so magmaliw a sakey a mangaraldalin ya uuleyan na Panarian na Dios. Lucas 7:18-30; Mateo 11:2-15.

▪ Akin a si Juan so nantepet no kasin si Jesus so samay Onsabin Sakey odino sananey a sakey a nepeg ya ilaloan?

▪ Antoran propesiya so imbaga nen Jesus a sinumpal nen Juan?

▪ Akin a si Juan a Managbautismo so aglinma ed tawen a kaiba nen Jesus?