Say Sankabalgan a Toon Nambilay ed Kapiganman

Kapitulo 39

Say Mapaatagey tan say Mapaabeba

Kayari na impanaglawi ed saray maabig iran walna nen Juan a Managbautismo, inyarap nen Jesus so imano ed saray mapaatagey, matangsit a totoo a walad kaliberliber. “Saya’n kailalakan,” inkuanto, “kaolibay da so ugugaw a manyorong ed plaza, a maniingalan so sakey tan sakey ed sikara; a kuanda, Sikami tinogtoganmi kayo na tolali et agkayo sinmayaw; nanagogol kami, et agkayo nannangis.”

Anto so labay ya ibaga nen Jesus? Impaliwawa to: “Ta linma dia si Juan a Bautista ya ag mangakan na tinapay ag met oninum na alak; et kuan yo, Sikato so walaan na demonio. Linma dia so Anak na too a mangan tan oninum; et kuanyo, Nia, so sakey a too a masiba, tan mainum na alak, kaaro na saray publicanos tan saray makasalanan!”

Imposiblin peneken iray totoo. Anggapo so makapaliket ed sikara. Si Juan so nambilay na simple a bilay a dilin-panangibaliwala bilang sakey a Nazareo, diad panumbok ed panangiyabawag na anghel ya “ag oninum na alak tan inumen a mabayani.” Tan ingen et ibabaga na saray totoo a sikatoy walaan na demonyo. Diad biek a dapag, nambilay si Jesus a singa arum a totoo, ya agmangaagamil na panaggemper, tan sikatoy pakakasalananan da na inkaalablabas.

Agaylay irap a paliketen iray totoo! Singara kagalaw, ya arum ed sikara so ag-onkiwas ed panagsayaw bangta arum ya ugugaw so manotogtog na plauta odino agmanermen bangta saray kapara ran ugugaw so managogol. Anggaman kuan, inkuan nen Jesus: “Say kakabatan napatunong ed saray amin ya anak [gawa, NW] to.” On, say paneknek​—saray kimey—​so manggawan malinew a saray panamakasalanan sumpad si Juan tan si Jesus so tila.

Ginapoan nen Jesus a sansakeyen a kondenaen iray taloran syudad a Chorazin, Bethsaida, tan Capernaun, no iner a nanggawaan to na makapanyari iran kimey. No saraman a kimey so ginawa to ed Fenicia ed saray syudad na Tiro tan Sidon, kuan nen Jesus, sarayan syudad so nampataoli ed magasal ya abel tan dapol. Kokondinaen so Capernaum, a mapatnag a ginawa ton ayaman to legan na ministeryo to, inkuan nen Jesus: “Lalo nin nitepel so [nipaakar] ed dalin na Sodoma dia’d agew na panangokom nen say nipaakar ed sika.”

Ontumbok et mapubliko ton dinayew so mangatatawen ya Ama to. Sikato so apakiwas a gawaen so ontan lapud inyamot na Dios iray mablin espiritual a katuaan manlapud saray makabat tan makatalos balet ta ipaparungtal irayan makapakelkelaw a bengatla ed saray mapaabeba, ed saray ugugaw, a singa panangibaga.

Kaunoran, inter nen Jesus so makapasagyat ya imbitasyon: “Dago kayo’d siak, amin yo’n nasasagpotan tan nabebelatan, et itdan ta kayo’y pampainawa. Ala yo’y pakok ed sikayo, tan manaral kayo’d siak; ta maoyamo ak tan mapaabeba ak a puso; et naromog yo’y inawa nipaakar ed saray kamarerwa yo. Ta say pakok mainomay, tan anlemew so awit ko.”

Panon ya akapangiter si Jesus na pakapainawaan? Gagawaen to so ontan diad pangitatarok na kawayangan manlapud saray mangaaripen a tradisyon a pamebelat na saray relihyoson papangulo ed totoo, a mangilalaktip, bilang alimbawa, ed mapeget iran totontonen ed panangilin na Sabaton. Impanengneng to met so dalan na pakainawaan ed saramay nabebelatan manlapud panamairap ya ipapasakbat na dominante iran pulitikal ya autoridad tan ed saramay manlilikna na belat na saray kasalanan da diad panamegley na nagogonigon a konsiensia. Imparungtal to ed saratan a nagogonigon no panon a naperdona iray kasalanan da tan panon a sikaray makapangayaga ed sakey a mablin pisisiglaotan ed Dios.

Say anlemew a pako ya iyoopresi nen Jesus et sakey a sigpot a dedikasyon ed Dios, say pakapanserbi ed maabagey, mapangasin mangatatawen ya Ama tayo. Tan say anlemew ya awit ya iyoopresi nen Jesus ed saramay ondago ed sikato et samay pangunor ed saray kakaukolanen na Dios parad bilay, a saraya et ganggan To a nikurit ed Biblia. Tan say pangunor ed saraya so agbalot makapabelat. Mateo 11:16-30; Lucas 1:15; 7:31-35; 1 Juan 5:3.

▪ Panon a saray mapaatagey, matangsit a totoo ed kailalakan nen Jesus so singara ugugaw?

▪ Akin ya apakiwas si Jesus a dayewen so mangatatawen ya Ama to?

▪ Diad antoran paraan a saray totoo so nabebelatan, tan anton pakainawaan so inyopresi nen Jesus?