Say Sankabalgan a Toon Nambilay ed Kapiganman

Kapitulo 40

Sakey ya Aral na Panangasi

Nayarin si Jesus so wala ni ed Nain, a no iner et agano nin pinaoli to so anak na sakey a baló, odino sikato so nayarin ondadalaw ed kabangibang a syudad. Sakey a Pariseo a manngaran na Simon so manpipilalek a makanengneng na mas maapit ed samay sakey a manggagawa na saratan a makatantandan kimey. Kanian sikato so angimbita ed si Jesus a mirungo ed sikato.

Momoriaen so kipapasen bilang pankanawnawan makapanlingkor ed saramay wadman, inawat nen Jesus so imbitasyon, a singa met ed impangawat to na imbitasyon a mangan a kaiba iray managsingil na buwis tan managkasalanan. Ingen, sanen sikatoy linmoob ed abung nen Simon, si Jesus so ag-akaawat na mapagalang ya imano a kaslakan ya itatarok ed saray bisita.

Saray salin akasandalyas so ompepetang tan magmamaliw a marutak lapud panagbaroy ed marabok a dalan, tan sakey ya ugali na panagparawes so panguras ed saray sali na saray bisita na ambetel a danum. Balet ta saray sali nen Jesus so ag-inurasan sanen sikato so sinmabi. Nisay sikato so akaawat na manangabrasan angob, a sikatoy ugali diman. Tan say inuugalin larak na panagparawes so ag-intarok parad buek to.

Kaleganan a sikaray mamangan, legan a saray bisita so akatameg ed dulang, sakey ya ag-inimbitaan a bii so marereen a linmoob ed saman a kuarto. Sikato so kabkabat ed syudad bilang mambibilay na imoral. Maseguron nadngelan to so bangabangat nen Jesus, pati say imbitasyon to parad ‘saramay amin nabebelatan ya ondago ed sikato parad pakapainawaan.’ Tan lapud atenyeg a tuloy ed no antoy anengneng tan arengel to, sikato natan so nananap ed si Jesus.

Say bii natan so inmasingger ed dulang ed beneg nen Jesus tan tinmalimokor ed abay na saray sali to. Legan a saray lua to so ontetedter ed saray sali nen Jesus, saratan so pupunasan to na buek to. Sikato met so angala na pinabalingitan a larak manlapud pananginan to, tan legan a matamoy ton aangoban so sali nen Jesus, inkalbo to so larak ed saraya. Si Simon so nan-imaton tekep na agpanangabobon. “Saya a too, no profeta komon,” inkatunongan to, “naimano to no siopa tan no anto a nengneng na bii so saya a manidiwit ed sikato, ta sikato so sakey a makasalanan.”

Atebek so iisipen to, inkuan nen Jesus: “Simon, wala so daiset ya ibagak ed sika.”

“Ibagam, Managbangat.” inyebat to.

“Sakey a managpautang walaan na duara ya akautang,” inggapo nen Jesus. “Say sakey akautang na limanlasus a denario, et say sakey limanplo. Sanen andian ira na panbayar, pinerdona to’ra a nanparpara. Siopa ed sikara sirin so lalo’n mangaro ed sikato?”

“Isip ko,” inkuan nen Simon, nayarin manduaruwa ed singa anggapoy pisiglaotan a tepet, “a say amerdonaan to na dakdakel.”

“Maptek so inpangokom mo,” inkuan nen Jesus. Tan insan onaarap ed bii, inkuan to ed kinen Simon: “Nanengneng mo so sayan bii? Linmoobak ed abung mo, agka [angiter] na danum nipaakar ed saray salik: balet sinalog to so saray salik ed saray lua to, tan pinunasan to’ra ed buek to. Agmoak inangoban: balet sikato, nanlapu ed inloob to, ag tinmonda ya inmangob ed saray salik. Ag mo nilanaan so olok na larak: balet sikato pinuyokan to na unguento so saray salik.”

Say bii sirin so akapangiter na paneknek na impapuson panagbabawi to ed imoral a kabibilay to ed apalabas. Kanian sinampotan nen Jesus, diad pangibabagan: “Kanian kuan ko ed sika, Saray kasalanan to, a sikara so dakel, napaandi’ra; ta angaro ya nagkalalo: balet say napaandian na daiset, daiset so panangaro to.”

Diad antokaman a paraan et ag-ibabaliwala odino papalampasen nen Jesus so imoralidad. Imbes, sayan agawa so mangipaparungtal ed maabagey a pakatalos to ed totoon akagawa na saray lingo ed bilay da balet ta angipanengneng a sikara so maermen parad saraya tan ontan et onaasingger ed kinen Kristo parad pakainawaan. Mangitatarok na peteg a pakainawaan ed bii, inkuan nen Jesus: “Saray kasalanan mo napaandi ra. . . . Say pananisiam inlaban toka; lakala ed kareenan.” Lucas 7:36-50; Mateo 11:28-30.

▪ Panon ya inawat si Jesus na angimbita ed sikato, si Simon?

▪ Siopa so nananap tan inmasingger ed si Jesus, tan akin?

▪ Anton ilustrasyon so intarok nen Jesus, tan panon ton inyaplika iman?