Say Sankabalgan a Toon Nambilay ed Kapiganman

Kapitulo 41

Sakey a Sentro na Sangsangan

Agni abayag kayarin sikatoy nagmaliw a bisita ed abung nen Simon, inggapo nen Jesus so komaduan panagpulong a baroy ed Galilea. Diad asasakbay a baroy to ed teritorya, sikato so inibaan na saray inmunan babangatan to, sikara di Pedro, Andres, Santiago, tan Juan. Balet natan et saray 12 apostoles, ontan met ed pigaran bibii so akila ed sikato. Saraya so mangilaktip ed sikara di Maria Magdalena, Susana, tan si Juana, a say asawa to so sakey ed saray opisyal nen Arin Herodes.

Legan a say peles na ministeryo nen Jesus so ompapalalo, ontan met ed sangsangan nipaakar ed aktibidad to. Sakey ya aselepay-demonyo a too, a bulag met tan agmakasalita, so inawit ed kinen Jesus. Sanen sikatoy papaabigen nen Jesus, ta pian sikatoy nibulos ed panangontrol na demonyo tan namparan sikatoy makasalita tan makanengneng, ontanla so impakatalagnaw na saray karaklan. Inkuanda: “Sikato ta ya kasi’may anak nen David?”

Agaylan karakel a tuloy so bilang na totoo so nanliktob ed abung a tutuloyan da a sikato tan saray babangatan to so ag-anggan makapangan. Kaaruman ed saramay maniisip a nayarin sikato imay insipan ya “anak nen David,” wadman met iray eskriba tan Pariseo a nanlapu ni ed Jerusalem pian maneral ed sikato. Sanen nadngelan na kakanayon nen Jesus so nipaakar ed gulon mangilalanor ed kinen Jesus, sikaray linma pian sikatoy agwaten. Parad anton rason?

Bueno, anggad saman et saray agagi nen Jesus so agni manisian sikato so anak na Dios. Ontan met, say gulo tan gulaan ya apalesa to so duman tuloy ed Jesus ya amta ra legan na imbaleg to ed Nazaret. Kanian, manisia ra a si Jesus so walaan na seryoson diperensya ed panagnonot. “Wala ed paway na inkasikato,” so inkuanda, tan labay dan sikatoy erelen tan agwaten manlapud’man.

Ingen say paneknek so malinew a pinaabig nen Jesus imay toon aselepan na demonyo. Saray eskriba tan Pariseo so agmakapangiburi ed kapetegan na saya. Kanian pian deralen si Jesus inkuanda ed saray totoo: “Saya’n too ag to papawayen so saray demonio, no ag lapu ed Beelzebub ya katawan na saray demonio.”

Kabat so kanonotan da, tinawag nen Jesus iramay eskriba tan Pariseo ed sikato tan inkuan: “Balang panarian a naapag ya onsumpa ed sikato lanlamang niakar ed kadederal; tan amin a ciudad ono abung a naapag ya onsumpa ed sikato lamlamang, agmakapansiansia. Et no si Satanas papawayen to si Satanas, sikato so naapag ya onsumpa ed sikato lamlamang; panon siri pakapansiansia na panarian to’d satan?”

Agaylan makapadesyang a lohiko! Bangta bibidbiren na saray Pariseo a saray totoon kakaiba ra met lanlamang so akapangipaway na saray demonyo, intepet met nen Jesus: “Et siak no lapu’d Beelzebub so pamapapaway ko’d saray demonio, lapu ed siopa met sirin so pamapapaway na saray anak yo’d sikara?” Diad arum a salita, say ibabaga ra sumpad si Jesus so nepeg met a niyaplika ed sikara no panon ed sikato. Insan impasakbay nen Jesus: “Bangbalet no siak lapu ed Espiritu na Dios papawayen ko ray demonio, sinmabi la sirin ed sikayo so panarian na Dios.”

Pian iyilustra a say impangipaway to na saray demonyo so paneknek na pakayari to ed kinen Satanas, inkuan nen Jesus: “Panon so pakaloob na sakey a too ed abung na mabiskeg a laki, tan panamsam to ed saray kagawaan to, nilikod ya onona a baloren to so mabiskeg a too? et insan samsaman to so abung to. Say ag ontombok ed siak sikato’y onsumpa ed siak; tan say agmikopkop ed siak, manbuyandak.” Malinew a saray Pariseo so sumpad kinen Jesus, a mangidedemostra ed inkasikara bilang ahente nen Satanas. Bubuyaken daray Israelita pian onarawi ra ed sikato.

Sirin, pinasakbayan nen Jesus irayan maka-Satanas a sumusumpa a “say panayew sumpa ed Espiritu agnaperdona naani.” Impaliwawa to: “Say siopaman a mangibalikas na sakey a salita sumpa ed Anak na too, sikato’y naperdona ed sikato; say siopaman balet a mansalita na sumpa ed Espiritu Santo, sikato’y ag naperdona ed sikato, angan dia’d saya a bilay, angan dia ed bilay ya onsabi.” Saraman ya eskriba tan Pariseo so akapanggawa na agnaperdonan kasalanan diad panamegley na malisyoson pangibabaga a si Satanas so nanggawa ed sakey a milagron malinew a gawa na masanton espiritu na Dios. Mateo 12:22-32; Marcos 3:19-30; Lucas 8:1-3; Juan 7:5.

▪ Panon a say komaduan baroy nen Jesus ed Galilea so duma manlapud unaan?

▪ Akin a sinali na saray kakanayon nen Jesus a sikatoy agwaten?

▪ Panon a sinali na saray Pariseo a deralen si Jesus ed saray milagro to, tan panon ya inebatan ira nen Jesus?

▪ Anto so kasalanan na saraman a Pariseo, tan akin?