Kasin Nanonotan Mo?

Kasin inusisam so agano niran paway na Say Panag-Bantayan? No ontan, naromog mon makapaliket so pakanonot ed saray onggendan:

▫ Anto so manunan pandumaan ed baetan na too tan ayayep?

Kabkabat a say manunan pandumaan na too manlapud ayayep et nisisintro ed inkasangal, kapasidad, tan saray andar na utek. Diad saray ayep ed ngalngalin amin ya andar na utek et akaprograma ed no anto so nagmaliw a tatawagen a sipor a kakabatan. Aliwan onia ed kipapasen na totoo. Inikdan na Dios so totoo na pakayarin manpili (odino bulos a linawa). (Uliran 30:24-28)​—4/15, pahina 5.

▫ Anto so betang na panagkanta diad panagdayew ed templo na saray Israelita?

Say musika, nagkalautla ed saray managkanta, so walaan na importantin pasen ed panagdayew, aliwan lapud panangipasepsep ed ambetbelat iran pamaakaran na Ganggan, noagta pian mangiter na dugan espiritu ed panagdayew. Tinmulong itan ed saray Israelita pian mandayew ed si Jehova ed paraan a napno na espiritu. (1 Awaran 23:4, 5; 25:7)​—5/1, pahina 10, 11.

▫ Anton nengneng na panangimano so kaukolan na ugugaw manlapud inkaugaw?

Saray ateng so kaukolan a mangiter na mantultuloy a panangimano ed kapkapangiyanak. Insulat nen Pablo: “Nanlapu ed inkaugaw mo akabatan mo so saray masanto a Sulsulat, a makayari a mangawa ed sika a makabat ed kilalaban.” (2 Timoteo 3:15) Kanian say inaateng a panangimanon naawat nen Timoteo, anggan manlapud inkaugaw, so espiritual met a klase.​—5/15, pahina 11.

▫ Antoray apatiran ebidensya a mamaneknek a say Biblia et mankarga na mensahe na Dios para’d amin a katooan?

(1) Nayarin naala. Say Biblia so niwala ed 98 porsiento na populasyon na mundo. (2) Inkamaawaran. Lugan na Bilbia iray maawaran a katuaan, aliwan saray agnapaneknekan a tongtong basilyo. (3) Inkapraktikal. Saray ganggan tan prinsipyo to so mangidadatak na paraan na kabibilay a mangitatarok na gungguna ed saramay maapit ya ontumbok ed saratan. (4) Propesiya. Satan so libron mangibabaga no anto so nagawa ed arapen.​—6/1, pahina 8-10.

▫ Anto so responsabilidad ed pakaamta ed suston relihyon?

Bekta man a naromog tayo so suston relihyon, magmaliw la itan a sentro na kabibilay tayo. Satan so dalan na panagbilay. (Salmo 119:105; Isaias 2:3)​—6/1, pahina 13.

▫ Akin a say personal a panagaral na Biblia so importanti?

Amin ya ariripen na Dios so kaukolan a pasimbaloen da so gayaga tan biskeg da ya inagew-agew diad pakarumog na balo tan araldalem iran aspekto na katuaan na Salita na Dios. Diad onian paraan et napansiansia ra so inkasikaran aliing ed espiritual.​—6/15, pahina 8.

▫ Anto so kabaliksan na salitan “kasalanan” unong a nausar ed Biblia?

Diad saray berbon porma ra, saray Hebreo tan Griegon salita so gendagendat a nauusar ed Biblia a mankabaliksan na “kasalanan” a say labay ton ibaga et “imintis,” diad pantalos na pankasalanan odino agpakadampot ed sakey a kalat, marka, odino puntirya. Say inmunan atooan a sanasawa so kinmulang ed gloria na Dios, sinmaew ed gagala na inkapalsa ra ed indengan na Dios. Diad arum a salita, sikaray nankasalanan.(Genesis 2:17; 3:6)​—6/15, pahina 12.

▫ Akin ya agmakabat so panbasa na apostatan literatura?

Pigara ed saray apostatan literatura so mangipaparungtal na katilaan diad panamegley na ‘saray salita a maamoyot’ tan “konkonwarin salita.” (Roma 16:17, 18; 2 Pedro 2:3) Amin ya apostatan sulsulat so basta panamalaw tan panamaletey! Anggapoy antokaman a makapabiskeg.​—7/1, pahina 12.

▫ Kasin say Gresya so lapuan na demokrasya?

Diad kadaanan a Gresya, say demokrasya so inagamil lambengat diad pigpigaran syudad-estado, tan anggan diad saraya et saray mibabaley a lalaki labat so manboboto. Saray bibii, ariripen, tan manaayam a sankaili​—ya akalkulan kapaldua anggad kakapat a kalima na populasyon​—so agkabiangan. Agnibagan popular ya inkasoberano odino demokrasya!​—7/1, pahina 16.

▫ Anto so sengegan na iyaligwas na Kristianon panamaley?

Sano say asawan laki tan bii so manrerespeto ed panmoria na Dios ed panangasawa tan panbanikelan dan manbilay unong ed saray prinsipyo na Salita to. (Efeso 5:21-33)​—7/15, pahina 10.

▫ Panon a magmaliw a makapagayaga so panagaral na pamilya?

Panggunaetan a nasaglawi ya amin so ananak. Magmaliw a positibo tan makapaseseg, ampetang a komendaan iray anak yo lapud pibibiang da. Aglambengat kobrian so materyal balet ta panggunaetan a sabien iray kapusoan na saray anak yo.​—7/15, pahina 18.

▫ Anto ipapatnag na say balikas a: “Kapiganman ya ibabaga ra: ‘Kareenan tan kaligenan!’” (1 Tesalonica 5:3)

Imanoen ya ag-ibabaga na Biblia a saray nasyon so makadampot na “kareenan tan kaligenan.” Mapatnag a sikara so mangitongtong nipaakar ed satan ed nikadkaduman paraan, a mangibabalikas na inka-optimismo tan talindeg a datin agda alikna. Saray posibilidad para’d pakagamor na kareenan tan kaligenan so ompatnag a mas asingger nen kapiganman.​—8/1, pahina 6.

▫ Bitlaen iray taloran paraan a pangipapanengnengan nen Jehova na inkamakatunongan.

Impanengneng nen Jehova ya akaparaan a mamerdona. (Salmo 86:5) Sikato so mabulos a manguman ed sakey a nononoten a kiwas legan ya onlelesa iray balon sirkumstansya. (Nengnengen so Jonas, kapitulo 3.) Ontan met, impanengneng nen Jehova so inkamakatunongan ed pangagamil na autoridad. (1 Arari 22:19-22)​—8/1, pahina 12-14.