Iner so Pakaromogan Yo na Napanmatalkan a Panangiwanwan?

“O JEHOVA, amtak a say dalan na too angapo ed sikato lanlamang; aliwa ya wala ed too a manakar a mangitonton ed saray kurang to. O Jehova, dusaen mo ak.”​—Jeremias 10:23, 24.

Say managsulat na Biblia a si Jeremias so angisulat ed saratan a salita ed ngalngali 25 siglo lay apalabas. Say mauges a kipapasen na katooan kayari na nilibon taon na panangiyaplika ed panangiwanwan na too so mamapaneknek ed agnasuppiat a katuaan na sayan balikas. Balet, nayarin itepet yo, ‘Iner so pakaromogan na napanmatalkan a panangiwanwan?’

Say kasulatan ya inaon ed tagey so mangituturo ed sakey a lapuan na napanmatalkan a panangiwanwan tan panangiderihe ya atagtagey a tuloy ed too​—say Manamalsa na too, si Jehova a Dios. Peteg ya anggapo so makaamta ed inkagawa na too tan saray pankaukolan to a magmaong nen say Manamalsa tayo. Anggaman ontan, kasin say Dios so interesadon mangitarok ed sikatayo na ontan a panangiwanwan tan panangiderihe? Panon ton gagawaen itan? Kasin satan so praktikal ed panaon tayo?

Denisinyo Pian Mangawat na Madibinon Panangiwanwan

Kabkabat a say manunan pandumaan na too manlapud ayayep et nisisintro ed inkasangal, kapasidad, tan saray andar na utek na too. Diad saray ayep et ngalngalin amin ya andar na utek et akaprograma ed no anto so nagmaliw a tatawagen a sipor a kakabatan. Aliwan onia ed kipapasen na totoo.​—Uliran 30:24-28.

Aliwan singa say utek na ayayep, say baleg a kabiangan na utek na too so andian na permanentin programa. Inikdan na Dios so totoo na pakayarin manpili (odino bulos a linawa), mangiyabuloy ed sikaran manggawa na makabat iran desisyon tan pangipatnag na atagtagey iran kalidad, a singa say aro, inkabunlok, ag-inkasiblet, inkahustisya, tan kakabatan.

Kasin makatunongan a nonoten a say Dios so mamalsa na too a walaan na ontan a mental a kapasidad balet ta agmangitarok na antokaman a nengneng na panangiwanwan ed no panon a sankaabigan a nausar itan? Inikdan na Dios iray inmunan totoo na direktan panangiwanwan. (Genesis 2:15-17, 19; 3:8, 9) Anggan kayari impankasalanan na too, intultuloy nen Jehova ya iwanwan so matoor a lalaki tan bibii, nagkalautlan tuloy ed panamegley na dilin apuyanan a Salita to, say Biblia. (Salmo 119:105) Saya so angiyabuloy ed totoo a mangarap tekep na italona ed saray inagew-agew a problema ed bilay legan ya usaren dan sikakabat so kawayangan dan manpili.

Say Dios so Autor na Biblia

Panon a say Biblia so sakey a napanmatalekan a lapuan na panangiwanwan? Ununa, ipaparungtal to so impormasyon a say Manamalsa lambengat so makapangitarok. Idadatak to so awaran na saray ebento ya abayag lan agawa sakbay na inggapo na atooan a bilay. Alimbawa, isasalaysay to no panon a say dalin so imparaan ed nantutumbokan a kipapasen anggad satan so nagmaliw a matukoy pian sustonien so atooan a bilay. (Genesis, kapitulo 1, 2) Anggaman saya so nikurit ed Biblia ed masulok a 3,000 a taon lay apalabas, satan so mitunosan ed modernon sientipiko iran bangat.

Abayag la sakbay ya inawat na katooan ed inkalapagan a say dalin et malimpek, ibabaga la na Biblia: “Ipanat to [na Dios] so amianen ed tapew na paoypaoy a leet, tan ibitin to so dalin ed tapew na angapo.” (Job 26:7) Nagkalalo ni, ipaparungtal na Biblia a “sikato a manyorong ed tagey na tibukel a dalin, tan saray manayam ed sikato singa ra dondonaron.” (Isaias 40:22) Say Dios lambengat, say Manamalsa, so makapangitarok na onian detalye.

Say abilidad ed pakaamta na arapen et aliwan sakey a langkap a niiter ed too. Imbes, ipapasakbay na Manamalsa so arapen diad panamegley na saray pahina na Biblia. Pinuyanan na Dios si Isaias a mangisulat na nipaakar ed Sikato: “Ta siak so Dios, et angapo la so sananey; Dios ak, et angapo so mipara ed siak; ya ipaliwawak so pangangaan a manlapu ed gapo, tan nanlapu nen inmuna a panaon ipaliwawak so saray bengatla ya ag ni agawa; a kuanko, Say simbawak mansiansia naani, tan gawaen ko naani so amin a labay ko.”​—Isaias 46:9, 10.

Ipapanengneng na Biblia a nayarian ton ipasakbay so kaunoran manlapud gapo tekep na makapakelaw ya inka-eksakto. Alimbawa, impasakbay to so ilesa, say kageba, tan saray nengneng na manuna iran pakayari na mundo legan na nilibon taon na awaran na too. Sarayan makatantandan propesiya so nisulat dakel laran siglo sakbay na kasumpalan na saratan, diad arum iran kipapasen ed nilibon taon sakbay ni na satan. Kanian say Biblia et suston mangipapasakbay na modernon-agew iran ebento, ontan met ed unor a kasumpalan na saratan. Say Biblia met so nikadkaduma lapud ituturo na satan so dalan na kililiktar legan na kaderal na ag-ayadyarin ginawa-na-too iran gobierno diad Armagedon, “say bakal a baleg ya agew na Dios a Makapanyarin-amin.” Say Panarian na Dios diad saray lima na Anak to, si Jesu-Kristo, so manumpal ed satan a baleg a gawa.​—Apocalipsis 16:14, 16, NW; 17:9-18; Daniel, kapitulo 2, 8.

Lawas Makagungguna​—Agbalot Makapasakit

Say kakabatan na too lambengat so ag-ayadyari; kanian, say simbawa na too et aglawas makagungguna, anggaman satan so niiter tekep na maabig iran intensyon. Aliwan onia so kipapasen ed simbawa na Biblia. Say Dios a mismo so mangibabaga: “Siak si Jehova . . . ya angibangat ed sika na nipaakar ed nabang mo, a mangitonton ed sika ed dalan a laen mo komon. O no komon ta dinengel mo so saray bilin ko! Dia ed ontan say deen mo singa komon sakey a ilog, tan say inkatunong mo singa komon daluyon na dayat.”​—Isaias 48:17, 18.

Say madibinon panangiwanwan so ontutulong ed sikatayon mangidatak na nepeg iran iyuuna tan benbenan iray atagtagey a totontonen ed bilay. Bangta say modernon sosyedad so mangidadanet ed materyal iran agawaan tan kalat, idadanet na Biblia no panon kamabli itan para’d sikatayo pian “ag [tayo] onnengneng ed saray bengatlan nanengneng, no ag ingen dia ed saray ag nanengneng. Ta saray nanengneng ag ira maando, balet saray ag nanengneng maando ra.” (2 Corinto 4:18) Diad onian paraan sikatayo so napapaseseg a nawalaan na sankaabigan iran kalat ed bilay, salanti, espiritual iran kalat diad pisiglaotan ed panggawa na linawa na Dios, say mogmon kalat ya andi-anggaan a bilay ed balon sistema.

Bangta panggugunaetan na Kristiano a tumboken irayan nitandoron kalat, say simbawa na Biblia so ontutulong ed sikaton manbilay ed sankaabigan a nengneng na panagbilay a posibli ed sayan marelmeng a sistema na saray bengatla. Say modernon kakabatan na too so mabetbet a mamaseseg ed pilosopiya a pankimey na samet tan mansueldo na baleg. Diad biek a dapag, ibabaga na Biblia ed sikatayo a “magmaliw a duka so onkimey a mangiras ya inpanlima; balet say lima na maseet makapayaman.” Insulat nen apostol Pablo ed saray Hebreon Kristiano: “Ilaloan mi ya wala so maabig a conciencia mi, a panpirawatan mi so manbilay a sigagalang dia ed saray amin a bengatla.”​—Uliran 10:4; Hebreos 13:18.

Say Biblia met so mangiiter na praktikal a simbawa ed oksuyan na pamilya. Ileletneg to so espisipikon betang na namparan asawan laki tan asawan bii ed oksuyan na panamaley, ontan met ed suston paraan ed pamabaleg tan panbangat ed saray anak. Ibabaga to: “Ontan met so nepeg na saray asawan lalaki a panangaro ra ed saray kaasawaan dan dili a singa panangaro ra ed laman dan dili. . . . Say asawan bii nepeg ton takotan so asawa to. Sikayon anak, ontolo’kayo ed saray kaatatengan yo . . . Sikayo ya atateng, ag yo ilagyat a pasanoken so saray anak yo: no ag ingen bangatan yo’ra ed kadudusa tan panamilin na Katawan.” Say itumbok ed atagtagey a simbawa na Manamalsa so makatulong a baleg ed elet tan liket na saray pamilya.​—Efeso 5:21–6:4.

Sakey a Maligen ya Arapen Para’d Saramay Ontutumbok ed Panangiwanwan na Dios

Say insulat a Salita na Dios so mangituturo ed solusyon para’d amin a problema na katooan. Magano lan tuloy a punasen nen Jehova so kaplesan a sistema na saray bengatla, pati amin ya ot-ot, ag-inkahustisya tan paniirap, tan salatan itan na matunong a balon sistema. Dedeskribien iya na Biblia diad 2 Pedro 3:7-10, ontan met ed 2Pe 3 besikulo 13: “Unong ed sipan to alagden tayo so saray tawen a balo tan dalin a balo, a sikara so pana-ayaman na katunongan.” Anggad natan saya so sankaabigan a maong a balita a niiter ed katooan. Satan so mismon mensahe ya ipaparungtal na Biblia tan ipupulong na Tastasi nen Jehova ed masulok a 200 a daldalin tan isla na dayat.

Sano say linawa na Dios so naagamil la ed sankadalinan, say interon katooan so nagunggunaan diad panumbok ed sankaabigan a panangiwanwan na Manamalsa to, si Jehova. Naandila ed satan iray problema ed inkaduka, krimen, tan saray druga. Say katooan so agla pairapen na sakit, itatatken, tan patey. Say atooan a pamilya so nitandoro ed inkayadyari a niwalad inmunan atateng tayo sakbay a sikara so nanrebelde sumpad panangiwanwan na Dios.

Agaylan maabig so impanegek na kaunoran a libro na Biblia ed maliket a kipapasen na saraman so manmatalek ed madibinon panangiwanwan! Ibabaga na Apocalipsis 21:4, 5: “Tan punasen to so amin a lua ed kamataan da: tan andi gapo la naani ipatey; tan angapo la naani onnangis o dageyem, o ot-ot: ta saray ona a bengatla sikara so linmabas la.” Garantiyaan itan na Manamalsa tayo, a kuanto: “Nia, siak gawaen ko a balo so saray amin a bengatla.” Inyarum to: “Saraya a salita sikara so matoor tan matua.”

No kaliktan tayon awaten irayan bendisyon, anto so iilaloan na Dios ed sikatayo? Ipapaliwawa nen apostol Pablo a linawa na Dios ya “amin a totoo nilaban ira komon, tan ondago ra ed pakapikabat ed katuaan.” (1 Timoteo 2:4) Saray Tasi nen Jehova so ampetapetang a mangiimbita ed sikayo a makagamor na suston kakabatan na katuaan diad panamegley na sigpot a panaral ed Biblia. Diad maseseg a panaral nipaakar ed madibinon linawa, sika met so makaromog diad panamegley na eksperiensia a say madibinon kakabatan et say mogmon napanmatalekan a panangiwanwan ed sarayan maatap a panaon. Say inkaganatan na panaon so manggagawa ed saya a nagkalalon kaukolan a tumboken ed kapiganman!