Kasin Walay Napantiwalaan ya Giya Pian Maong so Bilay Mod Arapen?

Singa apantongtongan ed akauna iran artikulo, dakel ya totoo so manisia ya say kapalaran, edukasyon, kayamanan, tan panggaway kamaongan so mangiter na maong ya bilay ed arapen. Balet no saraya so usaren mon paraan, singa ka oonlad agmo kabisadon lugar insan duman mapa so uusaren mo. Labay to kasin ibaga ya anggapo lay napantiwalaan ya giya pian seguradon maong so bilay mod arapen? Andi!

SAY SANKAABIGAN A GIYA

No mandedesisyon tayo, kaslakan et mantetepet tayo ni ed sakey a mas matatken tan mas marunong ed sikatayo. Ontan met, makaanap tayo na napantiwalaan ya giya manlapud Sakey ya talagan mas matatken tan mas marunong nen say sikatayo. Nabasa tayo iray bilin To diad libron insulat manga 3,500 taon lay apalabas. Sayan libro et tatawagen ya Biblia.

Akin ya napantiwalaan moy Biblia? Lapud nanlapu iya ed sankatatkenan tan sankarunongan ya Persona ed interon uniberso. Sikatoy adeskribe bilang “Akauna nen Saray Panaon” ya “manlapud andi-anggaan ya anggad andi-anggaan.” (Daniel 7:9; Salmo 90:2) Sikato so “Manamalsa na katawenan, say tuan Dios, say amorma tan amalsa ed dalin.” (Isaias 45:18) Impakabat tod sikatayo so ngaran to ya Jehova.—Salmo 83:18.

Lapud say Biblia et nanlapud samay Amalsa ed amin ya totoo, anggapoy papaboran ton kultura odino lahi. Say bilin to et ag-ondadaan tan pakakagunggonaan na dakel ya totoo ed amin ya bansa. Available iya ed dakel ya lenguahe tan sayan libro so sankarakelan ya nibubunog ed interon mundo.a Kanian inerman so panaayaman na saray totoo, mainomay dan talosan tan manpaigiya ed saya. Napatunayan itan na sayan mismon ibabaga na Biblia:

“Anggapoy lalabien na Dios, noagta diad balang nasyon et makapaliket ed sikato so toon ontatakot ed sikato tan manggagaway duga.”—GAWA 10:34, 35.

No panon ya maar-aron igigiya na saray atateng iray ananak da, maar-aro itayo met ya igigiya nen Aman Jehova panamegley na Salita to, say Biblia. (2 Timoteo 3:16) Napantiwalaan mo so Salita to lapud sikatoy amalsa ed sikatayo tan amta to no panon tayon magmaliw ya maliket.

NO AKIN YA NAPANTIWALAAN SO BIBLIA

Napantiwalaan tayo iray ibabaga na Biblia tungkol ed arapen lapud nanenengneng tayo la natan iray impasakbay ton nagawa tan ugali na totoo manga 2,000 taon lay apalabas.

SARAY NAGAWA

“Manlalaban iray bansa, ontan met ed saray panarian. Wala ray maksil a yegyeg, tan diad nanduruman pasen et wala ray eras tan salot.”—LUCAS 21:10, 11.

UGALI NA TOTOO

“Diad kaunoran iran agew et onsabi iray mapeligro tan mair-irap a panaon. Ta saray totoo et magmaliw a maaro ed sarili ra, maaro ed kuarta, mapasirayew, mapaatagey, managmudmora, agmatulok ed atateng da, agda amtay misalamat, aliwa ran matoor, anggapoy panangaro ra ed kapamilyaan da, agda labay so mipaknaan, managpauges ira, anggapoy kontrol da ed sarili ra, masesebeg ira, agda aaroen so kamaongan, traidor ira, anawet so ulo ra, makinon ira, maaro ira ed panliliket imbes a maaro ed Dios.”—2 TIMOTEO 3:1-4.

Akin kasi et sarasarag na Biblia ya ipasakbay iray eksakton nagawa natan? Seguradon onabobon ka ed imbaga nen Leung ya taga Hong Kong: “Saray propesiya na Biblia et abaybayag lan insulat. Imposiblin totoo so angipasakbay ed saray nagagawa natan. Kanian sirin, say Biblia et nanlapud sakey ya mas superyor nen say too.”

Naromog ed Biblia iray nilasus ya propesiya ya agawa la.b Prueba iraya ya say Biblia et talagan Salita na Dios. “Siak so Dios, tan anggapoy miparad siak,” so imbaga nen Jehova. “Diad gapo ni labat et ipapasakbay ko lay pansumpalan.” (Isaias 46:9, 10) Lapud saya, napantiwalaan mo iray ibabaga na Biblia tungkol ed arapen.

GIYA A MAKATULONG ED SIKA NATAN TAN DIAD ARAPEN

No tumboken mo so giya a walad Masanton Biblia, nagunggonaan ka. Nengnengen iray pigaran alimbawa.

DUGAN PANMORIA ED KUARTA TAN TRABAHO

“Mas maong ni daiset a painawa nen say alablabas a panagkimey tan panguusil ed dagem.”—ECLESIASTES 4:6.

BILAY NA PAMILYA

“Kada asawan laki ed sikayo et nepeg ton aroen so asawa to a singa ed dilin laman to; ontan met, say asawan bii et nepeg a walaan na aralem a respeto ed asawa to.”—EFESO 5:33.

PANTRATO ED ARUM

“Tundaan moy manpasnok tan paliisan moy onsanok; agka onsyosyodot tan onggapon manggaway kaugsan.”—SALMO 37:8.

No iyaplikam iray bilin na Biblia, nagunggonaan ka tan nawalaan kay maong ya bilay natan tan diad arapen. Diad Biblia et nabasa tayo irayan promisa na Dios ya nagawa ed arapen

MAREEN LA TAN AGTAYO NATATAKOT

“Manliket iran maong ed agnaparaan a kareenan.”—SALMO 37:11.

WALA LAY ABUNG TAN NAAKAN NA AMIN

“Mangipaalagey ira na kaabungan tan manayam ira ditan, tan mantanem ira na kaubasan tan kanen day bunga to.”—ISAIAS 65:21.

ANGGAPO LAY MANSAKIT TAN OMPATEY

“Anggapo lay patey, anggapo met lay panermen tan panakis tan panotot.”—APOCALIPSIS 21:4.

Antoy dapat mon gawaen pian seguradon maong so bilay mo ed arapen? Nengnengen so onsublay ya artikulo.

a Parad impormasyon tungkol ed panagpatalos tan panagbunog na Biblia, onlad www.jw.org/pag tan nengnengen so BANGAT NA BIBLIA > HISTORY TAN BIBLIA.

b Parad kaaruman ya impormasyon, nengnengen so kapitulo 9 na libron The Bible—God’s Word or Man’s? ya im-publish na Saray Tasi nen Jehova. Available online diad www.jw.org. Anapen ed LIBRARY > BOOKS & BROCHURES.