Kasin Sinmaew so Panangiwanwan na Too?
SIOPA so amalsa ed amin a bengatla? No say ebat yo et say “Dios,” sirin sikayo so mipakna ed minilyon a manisia ed Dios na Biblia, say Manamalsa.
Ingen, dakel a manisia ed Dios so naiirapan a mangawat a sikato so aktibon nasasaglawi ed panagresolbi ed saray problema na katooan. Kasin realistiko so panisip a say Dios so walaan na programan nipapakurang a mangitarok na pakainawaan ed sankatooan? Liknaen na dakel ya anggapo so makatunongan a paneknek a saya so peteg.
Diad loob na nilibon taon, saray totoo so manasali ed agnabilang a paraan ya itulong ed inkasikaran dili diad pananap na saray solusyon, ya ipupulisay so Dios. Balet kasin aromog na katooan iray solusyon? Odino kasin onloloor iray problema tan mairap a resolbien? Panon na toon aasikasoen iray mankaganatan a problema ed mundo natan?
Sakey ya eksperto so angikuan na onia: “Nanlapulad inggapo na Industrial Rebolusyon, saray maaligwas a bansa so masyadon mangaabuso ed natural resources na mundo diad panamegley na agnasustintoan iran oksuyan na produksyon tan panag-konsumo, a sengegay pakakaderal na kaliberliber ed sankagloboan, diad kaderal na onaaligwas iran bansa.”
Mantutultuloy a dederalen na too so dalin. Say peryodiko na Argentina a Clari̇́n so nankomento: “Diad komaduan kapaldua na sayan siglo, say inkaagum ed ekonomya, kakulangan na panagalwar, tan panangibaliwala et responsabli ed ankabaleg a desyang ya aglabat pansesengegan na ipapatey na totoo noagta dineral to met so kaliberliber, a mabetbet ed agnakalkula iran anggaan.”
Say masyadon inkaduka natan so ompapatnag a sakey a permamentin kabiangan ed modernon sosyedad. Anggan say tatawagen a mayaman iran bansa ed mundo et napipikos iray pueg da lapud belat a tuloy na inkaduka. Unong ed The Globe and Mail na Toronto, Canada, apadiseran a “kakatlo na amin a taga Canada so maka-eksperiensia na inkaduka anggan sano sikaray walalad suston edad pian nawalaan na trabaho.” Iyarum ni na peryodiko a “say inkaapag-apag na pamilya so sakey ed manuna iran rason ed inkaduka, tan say ontan a kurang so pinmeles ed apalabas iran taon.”
Say panag-abuso ed druga so sananey nin tanda na onuuges a sosyedad. Anto so nagawaan na katooan nipaakar ed satan? Mapatnag a samet a tuloy. Minilyon so mantutultuloy a makakasagmak na pisikal, mental, tan kipapaabeba ed moral bilang sakey a direktan resulta na pan-aabuso ra ed saray narkotiko. Tan say problema so onkakayat a singa baleg a pool.
Ompatnag a saray sientista so natatalo ed bakal sumpad sakit. Tua, say modernon teknolohiya so manatalo ed dakel a panlalaban. Ingen, arum a sientipiko iran paraan so tinmulong ed pakawala na balon sumpa-ed-druga iran nengneng na mapeligron mikrobyo.”
Agnapatunda na atooan iran gobierno so malaknab a panamuyak ed saray kanepegan na too. Alimbawa, anggaman dakel a sipan tan ganggan so tinibukel pian naamper so pakaaripen, apadiseran a diad sankamundoan et masulok a sanlasus milyon a totoo so papaskaren a mankimey ed silong na saray kondisyon a mansumpal ed miserablin inkaaripen.
Balet akin ya onsasaew so panangiwanwan na too? Kunsideraen irayan sengegan. Say panangiwanwan na too so manlalapud totoo—totoon walaan na saray limitasyon. Say eksperiensia ra ed bilay so daiset a tuloy tan inkalapagan a limitado lapud saray kultura tan kaliberliber. Say pikakabat da so limitado met. Antokaman a panangiwanwan ya iiter da so mangisisindag na saraman a limitasyon. A singa inkuan nen apostol Pablo, “amin nankasalanan, tan makulang ira ed gloria na Dios.”—Roma 3:23.
Diad kapetegan, kaslakan ed saray problema tan kairapan a sasagmaken na babaleg a kabiangan na sankatooan et direkta odino aliwan direktan resulta ed panangibaliwala ed panangiwanwan na Dios. Anggaman kuan, iner so pakaromogan na ontan a panangiwanwan? Panon so pangitatarok to ed sikatayo na panangiwanwan natan? Say ontumbok ya artikulo so mangonsidera ed saray ebat.