Say Sankabalgan a Toon Nambilay ed Kapiganman

Kapitulo 44

Panamakalma ed Makapataktakot a Bagyo

Say agew nen Jesus so napno na saray aktibidad, a mangilalaktip ed panagbangat ed karaklan a walad gilig na dayat tan kayari et pribadon impaliwawa iray ilustrasyon ed saray babangatan to. Sanen asabi labi, inkuanto: “Onbaliksat itayo ed pagpag a gilig.”

Diad mamabukig a baybay na Dayat na Galilea et say rehyon a tatawagen a Decapolis, manlapud Griegon deʹka, a mankabaliksan na “samplora,” tan poʹlis, a mankabaliksan na “syudad.” Saray syudad na Decapolis so sentro na Griegon kultura, anggaman anggapoy duaruwan saraya so ayaman met na dakel a Judio. Anggaman ontan, say aktibidad nen Jesus ed rehyon so limitadon tuloy. Anggan ed sayan imbisita a singa nanengneng tayo ed saginonor et sikato so naamper ed pansiansian mabayag diman.

Sanen kinerew nen Jesus a sikaray onalis pian onlad sananey a gilig na dayat, saray babangatan so angilugan ed sikato ed baloto. Anggaman ontan, say itataynan da so naimano. Ag-abayag et arum so linmugan ed saray baloto ra pian mila ira ed sikara. Aliwan tanton arawi so ibebeltang. Diad tua, say Dayat na Galilea so sakey labat a maawang a linok a ngalngalin 13 milya ed karukey tan 7 1/2 milya ed kalapar.

Natalosan no akin a naksawan si Jesus. Kanian, ag-abayag kayari inyarawi ra, sikato so dinmokol diad benegan na baloto, impasen toy ulo to ed sakey a danganan, tan naugip. Pigara ed saray apostol so eksperiensiadon managlayag, a dakel lan danay a nansigay ed Dayat na Galilea. Kanian sikara so angasikaso ed panlayag na baloto.

Balet saya so aliwan mainomay a baroy. Lapud say ampetpetang a temperatura ed tapew na linok, a ngalngalin 700 piye ed kaabeba ed dantal na dayat, tan say ambetbetel a dagem diad asingger a kapalandeyan, maksil a dagem so no maminsan et onsiplog a paabeba tan mamalesa na biglan maramsak ya alimpokapok ed linok. Saya natan so nagagawa. Ag-abayag et saray daluyon so ombabasig ed baloto tan mangisisipwak ed satan, kanian satan so asingger lan napanoy danum tan onlereg. Ingen, si Jesus so tuloytuloy a nanaugip!

Saray eksperiensiadon managlayag so atalagnaw a nanggunaet ya imaneubra so baloto. Anggapoy duaruwan sikara lay nanmaneobra nen saman kaleganan na bagyo. Balet diad sayan bekta et anggapolay nagawaan da. Diad takot a mamipeligroy bilay da, binangon day Jesus. ‘Managbangat, anggapoy pagam ta a natawtaw itayo? Sikatayo so onlelereg!’ inkelyaw da. ‘Isalba mo kami, nalener kami la!’

Sanen sikatoy akabangon la, inganggan nen Jesus ed dagem tan ed dayat: “Deen ka, ag ka [magalaw].” Tan say mabanesbes a dagem so tinmunda tan kinmalmada so dayat. Inmarap ed saray babangatan to, intepet to: ‘Akin et natatakot kayo? Anggapo ta ni pananisia yo?’

Diad saman, sakey a nikadkaduman takot so angemgem ed saray babangatan. ‘Siopan peteg iyan too?’ tepet da ed sinansakey, ‘ta iganggan to anggan say dagem tan say dayat, et ononor ira ed sikato.’

Agaylan pakapanyari so impanengneng nen Jesus! Agaylan manamaseguron naamtaan a say Ari tayo so walaan na pakayari ed saray natural iran elemento tan sano say sigpot ya imano to so nipaarap la ed dalin tayo legan na uley to ed Panarian, amin a totoo so manayam ed kaligenan manlapud makapataktakot a natural iran kalamidad!

Nen kinmalna la so bagyo, si Jesus tan saray babangatan to so akasabin maligen ed mamabukig a gilig na dayat. Nayarin saray arum a baloto so akaligtas ed kaksilan na bagyo tan maligen ya akasempet met. Marcos 4:35–5:1; Mateo 8:18, 23-27; Lucas 8:22-26.

▪ Anto so Decapolis, tan iner so akapasenan to?

▪ Antoran pisikal a nengneng so sengegan na maramsak iran bagyo ed Dayat na Galilea?

▪ Sanen say managlayag a pakayari ra et agmakapangisalba ed sikara, anto so ginawa na saray babangatan?