Say Sankabalgan a Toon Nambilay ed Kapiganman

Kapitulo 43

Panagbangat Tekep na Saray Ilustrasyon

Mapatnag a si Jesus so wala ed Capernaum sanen binaat toray Pariseo. Saginonor ed saman met ya agew, tinmaynan ed abung tan linma’d asingger a Dayat na Galilea, a no iner et dakel a totoo so nantitipon. Diman et sikato so linmugan ed sakey a baloto, inmarawi daiset, tan ginmapon manbabangat ed totoo ed gilig na dayat nipaakar ed Panarian na katawenan. Ginawa to so ontan diad panamegley na nantutumbokan a parabolo, odino saray ilustrasyon, a balang sakey so walaay eksenan kabisado na totoo.

Unona, insalaysay nen Jesus so nipaakar ed sakey a managsibwag ya angisibwag na bini. Arum a bini so dinmapo ed gilig na dalan tan tinoktok na saray manok. Arum a bini so dinmapo ed dalin a mabato. Lapud kulang na kaaralem iray lamut, saray balon tobon tanaman so alenes ed petang na agew. Arum nin bini so dinmapo ed saray sabsabitan, ya anakbong ed saray tanaman sanen tinmubo ra. Diad kaunoran, arum a bini so dinmapo ed maabig a dalin tan nanbunga na nilasus, arum so san-anemaplo, tan arum so santalomplo.

Diad sananey ya ilustrasyon, impareng nen Jesus so Panarian na Dios ed sakey a toon angisibwag na bini. Diad ilalabas na agew, legan na iyuugip na too tan sanen binmangon, tinmubo so bini. Agkabat na too no panon. Binmaleg ed inkasikaton dili tan amawala na dawa. Sanen say dawa so tinmatken, inani iman na too.

Insalaysay nen Jesus so komatlon ilustrasyon nipaakar ed sakey a toon angisibwag na suston klase na bini, balet “leleg na saray totoo ya [naugip],” sakey a kabusol so linma tan angitanem na zizañas ed pegley na dawa. Intepet na saray aripen na too no nepeg dan bagoten iray zizañas. Balet inyebat to: ‘Andi, ompan sano tiponen yo iray zizañas, [napibagot] yo ray trigo. Paulian yo’ran ontobo a bansag ya anga’d panagani. Insan ibagak naani ed saray manani a tiponen iray zizañas tan poolan ira tan tiponen iray trigo ed kamalir.’

Diad pangitutuloy toy paliwawa to ed saray ulop ed gilig na dayat, angitarok si Jesus na duara nin ilustrasyon. Impaliwawa ton “say panarian na tawen” so singa bokel na mustasa ya intanem na sakey a too. Anggaman satan so sankamelagan ed saray amin a bokel, inkuanto, ombaleg itan a sankabalgan ed amin a pisipising. Satan so magmaliw a kiew a laen na saray manok, tan panubongan iray sanga to.

Arum natan so ag-onabobon, a walaray memelag a bokel nen say bokel na mustasa. Balet ta agmangiiter si Jesus na sakey a leksion ed botanika. Diad saray bokel a kabkabat na saray taga Galilea ed agew to, say bokel na mustasa so peteg a sankamelagan. Kanian apresyaen da so nikadkaduman ibabaleg ya iyiilustra nen Jesus.

Kaunoran, impareng nen Jesus so “panarian na tawen” ed lebadura ya inala na sakey a bii tan inlaok to ed taloran sukat na arina. Asabi panaon, inkuanto, say interon masa so pinalebag to.

Kayari na impangiter ed sarayan limaran ilustrasyon, pinasempet la nen Jesus iray karaklan tan pinmawil ed abung a tutuloyan to. Ag-abayag et saray 12 apostol to tan arum ni so linmad’man ed sikato.

Pakagunggunaan Manlapud Saray Ilustrasyon nen Jesus

Sanen saray babangatan so linma ed kinen Jesus kayari na impanpaliwawa to ed saray ulop ed gilig na dayat, sikara so manderlaw nipaakar ed balon paraan na panagbangat to. Ah, sikatoy nadngelan da lan angusar na saray ilustrasyon nen inmuna, balet ta aliwan ontanlan karakel. Kanian intepet da: “Akin et pisalitaan mo ra’d saray alimbawa?”

Sakey a rason no akin a gagawaen to et pian sumpalen iray salita na propeta: “Biswaten ko’y sangik naani ed saray al-alimbawa; Ipaliwawak naani so saray bengatla ran niamot a nanlapu ed inkiletneg na mundo.” Balet wala ni so nagkalalo nen say satan. Say panguusar to na saray ilustrasyon so manseserbi ed gagalan panulong ed pangiparungtal na ugali na totoo.

Diad tua, maslak a totoo so interesado ed si Jesus bilang onsianon manangisalaysay na estorya tan managgaway milagro lambengat, aliwan lapud sikatoy labay dan panlingkuran bilang Katawan tan agsinisiblet a tumboken. Agda labay so padisturbo ed panmoria ra ed saray bengatla odino say paraan na pambibilay da. Agda labay a say mensahe so onsepsep ed onman kaaralem.

Kanian inkuan nen Jesus: “Kanian pisalitaan ko ra ed saray alimbawa; lapu’d nengnengnengen da et ag da nanengneng, tan dengdenglen da et ag da narengel, tan ag da met natalosan. Et nasumpal ed sikara so inprofeta nen Isaias, a kuan to, . . . Ta say puso na sayan baley abalang to’y liknaan to.”

“Ingen,” intuloy ni nen Jesus, “mapalar so saray mata yo, ta makanengneng ira; tan saray layag yo, ta makadngel ira. Ta tua kuan ko’d sikayo, ya amayamay a profetas tan matonong a totoo ya nanpirawat a makanengneng ed saray bengabengatla ran nanengneng yo, et ag da ra anengneng; tan makadngel ed saray bengabengatla ran narengel yo, et ag da ra nadngel.”

On, say 12 apostol tan saramay kaiba ra so walaan na manangaksobin puso. Kanian inkuan nen Jesus: “Ed sikayo niiter ya amtaen yo so saray misterios [sagradon sekreto, NW] na panarian na tawen, ingen ed sikara ag niiter.” Lapud pilalek dan makatalos, insalaysay nen Jesus ed saray babangatan to so ilustrasyon nipaakar ed managsibwag.

“Say ilik sikato so salita na Dios,” inkuan nen Jesus, tan say dalin et say puso. Diad saramay binin dinmapo ed apedper a gilig na dalan, impaliwawa to: “Saman la onsabi diablo, et ekalento so salita ed kapusoan da, pian ag ira manisia tan ag ira nilaban.”

Diad biek a dapag, saramay binin nisibwag ed dalin a mabato so ontutukoy ed kapusoan na totoo ya angawat ed salita a tekep na gayaga. Anggaman ontan, lapud say salita so agmakalamot ed ontan iran kapusoan, sarayan totoo so onsian sano onsabi panaon na subok tan panamasegsegang.

Dia balet ed saray binin dinmapo ed pegley na saray sabsabitan, intuloy nen Jesus, so ontutukoy ed totoon akarengel ed salita. Anggaman ontan, saraya so nisuawi na saray kapagaan tan kayamanan tan likeliket ed sayan bilay, kanian sikaray sigpot ya asakbongan tan anggapon balot so nitarok to ed inkayadyari.

Kaunoran, parad saray binin nisibwag ed maabig a dalin, inkuan nen Jesus, saraya ’man so, kayari na impakadngel ed salita a tekep na susto tan maabig a puso, so mamasiansia ed saratan tan mangitarok na bunga a tekep na panagsungdo.

Agaylan abendisyonan irayan babangatan a nanupapet ed kinen Jesus pian makaawat na paliwawa ed saray bangabangat to! Ginagala nen Jesus a saray ilustrasyon to so natalosan pian mangitarok na katuaan ed saray arum. “Niakar kasi silew pian sikato so ’yan ed dalem na boksot ono silong na dalagan?” intepet to. Andi, “ingen yan ed panangitapewan.” Kanian inyarum nen Jesus: “Sirin, imano yo no panon so idedengel yo, NW.”

Abendisyonan na Dakel nin Bilin

Kayari na impakaawat na paliwawa nen Jesus ed ilustrasyon na managsibwag, labay na babangatan a makaamta ni na malaglaem. “Ipaliwawam ed sikami,” kerew da, “so alimbawa na saray zizañas ed uma.”

Agaylan duma so awawey na saray babangatan manlapud saramay arum ed karaklan a walad baybay! Saraman a totoo so kulang na masimoon a pilalek pian naaralan so kabaliksan a walad beneg na saraman ya ilustrasyon, a napepenek la ed basta alasir na bengabengatla ya impasen ed sikara. Diad pangipareng ed saratan a dumerengel ed gilig na dayat ed saray maupapet a babangatan to a linma ed sikato ed abung, inkuan nen Jesus:

“[Diad] anto’n sukat a pansukat yo sikato naani isukat ed sikayo; tan dakdakel ni so niiter ed sikayo.” Saray babangatan so manusukat ed kinen Jesus na magunaet ya interes tan panangimano, kanian sikaray abendisyonan na pakaawat na dakel nin bilin. Kanian, bilang ebat to ed saray tepet na babangatan to, impaliwawa nen Jesus:

“Say mantanem na maong a bokel sikato’y Anak na too; Tan say uma sikato’y mundo; tan say maong a bokel, sikaraya so anak na panarian; et saray zizañas sikara so anak na mauges; Tan say kabosol ya angitanem ed sikara sikato so diablo: tan say panagani sikato’y angaan na mundo; tan saray manani sikara’y angeles.”

Kayari na impangipaamta ed kada nengneng na ilustrasyon to, deneskrebi nen Jesus so kasumpalan. Diad kasampotan na sistema na bengabengatla, inkuanto a saray manag-ani, odino saray anghel, so mangibiig ed singa sabsabitan ya alig-alig iran Kristiano manlapud saray tuan “anak na panarian.” Insan saray “anak na mauges” so natandaan parad kadederal, balet saray anak na Panarian na Dios, “saray matunong,” so masnag ya onsinag ed Panarian na Ama ra.

Ontumbok et benendisyonan nen Jesus iramay maupapet a babangatan to na talora nin ilustrasyon. Unona, inkuanto: “Say panarian na tawen kaolibay na sakey a kayamanan ya inyamot ed uma; ya sikato’y nalmo na sakey a too, tan inememan to; et dia ed like’to onla tan ilako to’y amin ya wala’d sikato, tan saliwen to man ya uma.”

“Lamet,” intuloy to, “say panarian na tawen miolibay ed sakey a too ya mantatagilako a manaanap na saray sankaabigan a perlas: Et sanen akalmo’y sakey a perlas a baleg so bili to, linma tan inlako to’n amin ya wala’d sikato, tan sinaliw to’man.”

Si Jesus a mismo so singa samay toon akarumog na niamot a kayamanan tan singa samay managtagilakon akalmo na sakey a mablin perlas. Inlako to so amin a bengatla, a singa panangibaga, ya iikbanan so mapagalang a posisyon to ed tawen pian magmaliw ya abebbeban too. Insan, bilang sakey a too ed dalin, sikato so anagmak na panamabaing tan masebeg a panamasegsegang, a mamaneknek a manepeg ed pagmamaliw a Mananguley na Panarian na Dios.

Say angat so impasen met ed saray patumbok nen Jesus a mangilako ed amin a bengatla pian makagamor na engranden tumang na pagmaliw a kaiban-manuley nen Kristo odino mangaraldalin ya uuleyan na Panarian. Kasin ikunsidera tayon say pakawalaan na betang ed Panarian na Dios so bengatlan mamabli nen dinanman a bengatla ed bilay, sakey ya agnaparaan a kayamanan odino sakey a mablin perlas?

Kaunoran, impareng nen Jesus so “panarian na tawen” ed sakey ya iket ya akarel na nanduruman klase na sira. Sanen saray sira so imbiig, saray makapoy so imbantak balet saray maabig so intilak. Kanian, inkuan nen Jesus, ontan met ed konklusyon na sistema na bengabengatla; saray anghel so mangibiig ed saray marelmeng manlapud saray matunong, ya iparaan iray marelmeng parad kadederal.

Inggapo nen Jesus a mismo iyan proyekton panagsigay, a tinawag toray inmunan babangatan to a magmaliw bilang “somisigay na totoo.” Diad silong na panangiwanwan na saray anghel, say panagsigay a kimey so nantultuloy ed inlabas na saray siglo. Diad kaunoran et sinmabin siansia so panaon pian agwaten so “iket,” a mangilalaman ed saray muyongan ed dalin a mankuan bilang Kristiano.

Anggaman saray makapoy a sira et ibabantak ed kadederal, misadsalamat tayon napibilang ed saray ‘maabig a sira’ ya ititilak. Diad pangipanengneng na parehon masimoon a pilalek a singa ginawa na saray babangatan nen Jesus parad nagkalalon kakabatan tan pakatebek, sikatayo so nabendisyonan aliwa lambengat a dakel nin bilin noagta ed bendisyon na Dios a bilay ya andi-anggaan. Mateo 13:1-52; Marcos 4:1-34; Lucas 8:4-18; Salmo 78:2; Isaias 6:9, 10.

▪ Kapigan tan iner a nansalita si Jesus ed saray karaklan tekep na saray ilustrasyon?

▪ Anton limaran ilustrasyon so insalaysay nen Jesus ed saray karaklan?

▪ Akin ya imbaga nen Jesus a say bokel na mustasa so sankamelagan ed amin a bokel?

▪ Akin a nansalita si Jesus diad panamegley na ilustrasyon?

▪ Panon ya impanengneng na babangatan nen Jesus a duma ra manlapud saray karaklan?

▪ Anton paliwawa so intarok nen Jesus ed ilustrasyon to ed managsibwag?

▪ Panon a midumaan iray babangatan manlapud saray karaklan ed gilig na dayat?

▪ Siopa odino anto so irerepresenta na managsibwag, say uma, say maabig a bini, say kabusol, say panagani, tan saray manag-ani?

▪ Anton talora nin ilustrasyon so intarok nen Jesus, tan anto so naaralan tayo ed saratan?