Say Sankabalgan a Toon Nambilay ed Kapiganman

Kapitulo 42

Binaat nen Jesus Iray Pariseo

No diad panamegley na pakapanyari nen Satanas a sikatoy mamapapaway na saray demonyo, insuppiat nen Jesus, si Satanas so naapag sirin a sumpad inkasikato. “Ono gawaen yo so kiew ya maong, et say bunga to so maong,” intuloy to, “ono gawaen yo so kiew ya mauges et say bunga to so mauges: ta say kiew nibiig lapu ed bunga to.”

Kakulangkulangan so pangibagan say maabig a bunga na pamapaway na saray demonyo so resulta na panlilingkor nen Jesus ed si Satanas. No say bunga so maabig, say kiew so maseguron aliwan mauges. Diad biek a dapag, say mauges a bunga na saray Pariseo a palso iran akusasyon tan anggapoy-basiyan ya isusumpa ed kinen Jesus so paneknek a sikara a mismo so mauges. “Sikayo so kailalakan na saray tadioco,” inkelyaw nen Jesus, “panon so pakayari yo’n mansalita’y maong a bengabengatla anta mauges kayo? ta dia ed inkadaakan na puso say sangi mansalita.”

Lapud saray salita tayo so mangisisindag na kipapasen na kapusoan tayo, say ibaga tayo so mangitatarok na basiyan parad kaukom. “Kuan ko ed sikayo,” inkuan nen Jesus, “ya amin a salita ya andi kakanaan ya salitaen naani na saray totoo, sikato naani ebatan da dia ed agew na panangokom. Ta lapu ed saray salitam so pamatonongan ed sika naani, tan lapu ed saray salitam so panusaan ed sika naani.”

Anggaman ed amin a makapanyari iran gawa nen Jesus, kinerew na saray eskriba tan Pariseo: “Managbangat, labay mi komon so makanengneng na sakey a tanda a manlapu’d sika.” Anggaman sarayan partikular a totoon nanlapud Jerusalem so nayarin agpersonal ya akanengneng ed saray milagro to, wala met iray agnasuppiat ya akatasin mamaneknek a saraya so agawa. Kanian inkuan nen Jesus ed sarayan Judion papangulo: “Sakey a mauges tan milalawanan a kapolian mananap na sakey a tanda; et angapo’y tanda ya niiter naani ed sikato noag say tanda nen Jonas a profeta.”

Ipapaliwawa no anto so labay ton ibaga, intuloy nen Jesus: “Onong a si Jonas nanayam a taloy agew tan taloy labi ed eges na [abalbaleg a sira]; ontan met na Anak na too manayam naani a taloy agew tan taloy labi ed puso na dalin.” Kayarin inakmon na sira, si Jonas so akapaway a singa no pinaoli, kanian ipapasakbay nen Jesus a sikato so ompatey tan diad komatlon agew et sikatoy paolien. Ingen, saray Judion papangulo, anggaman sanen si Jesus ed saginonor et pinaoli, so angipulisay ed “tanda nen Jonas.”

Kanian imbaga nen Jesus a saray totoo ed Ninive a nampataoli ed panagpulong nen Jonas so onoli ed panangukom pian kondinaen iray Judio ya angipulisay ed kinen Jesus. Miulibay, sikato so angipara ed say reyna na Sheba, a linma manlapud saray sampot na dalin pian ondengel ed kakabatan nen Solomon tan mankelaw ed anengneng tan arengel to. “Et nia,” inpaimano nen Jesus, “sakey a babaleg nen si Jonas so wadia.”

Insan inter nen Jesus so ilustrasyon na sakey a lakin pinawayan na marumsis ya espiritu. Anggaman ontan, samay too so ag-amano ed luang na maabig iran bengatla, kanian sikato so sinelepan na pitora niran mas marelmeng ya espiritu. “Ontan met naani so nagawa ed sayan kapolian a mauges,” inkuan nen Jesus. Say nasyon ya Israel so alinisan la tan aka-eksperiensia la na pananguman​—a singa say temporaryon intaynan na marumsis ya espiritu. Balet say impangipulisay na nasyon ed saray propeta na Dios, a papantokan na isusumpa to ed Kristo a mismo, so mangipaparungtal a say marelmeng a kipapasen to so mas mapalalo nen say nen gapo.

Kaleganan na pansasalita nen Jesus, say ina to tan agagi to so sinmabi tan nanalagey ed gilig na karaklan. Kanian walay angikuan: “Nengneng mo, si inam tan saray agim wala’ra ed paway, ya anapen da’y [pakapisalita] ed sika.”

“Siopa so inak tan siopara so saray agik?” intepet nen Jesus. Inyunat toy lima to ed saray babangatan to, inkuanto: “Niraya, so inak tan saray agik! Ta siopaman a mangawa na linawa nen Amak ya wala’d tawen, sikato so agik a laki, tan agik a bii, tan inak.” Diad onia et impanengneng nen Jesus ya anggaman maapit so siglaotan to ed saray kakanayon to, lalon maapit so pisisiglaotan to ed saray babangatan to. Mateo 12:33-50; Marcos 3:31-35; Lucas 8:19-21.

▪ Panon a sinmaew iray Pariseo a manggawa ed say “kiew” tan say “bunga” a maabig?

▪ Anto so “tanda nen Jonas,” tan panon a satan so impulisay ed saginonor?

▪ Panon a say inmunan-siglon nasyon na Israelita so singa samay lakin pinawayan na marumsis ya espiritu?

▪ Panon ya indanet nen Jesus so maapit a pisisiglaotan to ed saray babangatan to?