Say Sankabalgan a Toon Nambilay ed Kapiganman

Kapitulo 46

Diniwit To so Kawes To

Say balita na impawil nen Jesus manlapud Decapolis so akasabi ed Capernaum, tan sakey a baleg a karaklan so nantitipon ed gilig na dayat pian sikatoy abrasaen lamet. Anggapoy duaruwa a nadngel dan sikatoy amakalma na bagyo tan amaabig ed aselepan na demonyon totoo. Natan, legan na isasakbit to, sikatoy minukot da, magunaet tan mailalo.

Sakey ed saramay magunaet a makanengneng ed kinen Jesus et si Jairo, sakey a manangimaton ya opisyal na sinagoga. Sikato so dinmakmomo ed salian nen Jesus tan akikasi na paulit-ulit: “Say melag ya anako’n bii ngalngali ompatey; pikasik ed sika, ya gala komon tan itapew mo so saray limam ed sikato, pian onabig komon, tan nabilay.” Lapud sikato so alenleneg ya anak to tan 12 taon lambengat, sikatoy nikadkaduman pinabli nen Jairo.

Si Jesus so kinmiwas tan, inibaan na karaklan, amaarap ed abung nen Jairo. Naumameng tayo so ligsa na totoo legan a sikaray manatalaran lamet ed sakey a milagro. Balet say imano na sakey a bii ed limog na karaklan so niyapasakey ed dili ton mapalalon problema.

Diad 12 andukey iran taon, sayan bii so nanirap manlapud panpaparala. Sikato so nanpanengneng la’d dakel a doktor, a gagastosen so amin a kuarta to ed panpapatambal. Balet ta sikatoy ag-atulongan; noagta, say problema to so pinmalalo.

A singa nayarin naimanom, likud ed ikakapoy ton tuloy, say liliknaen to so makapabaing tan makapaabeba. Say sakey so diad inkalapagan et agmapublikon mitotongtong nipaakar ed ontan a kairapan. Niyarum ni, diad silong na Mosaikon Ganggan, say panpaparala so manggawa ed sakey a biin marumsis, tan siopaman a makadiwit ed sikato so kakaukolanen a manoras tan magmaliw a marumsis a sanlabi.

Nadngelan na bii so milagro nen Jesus tan natan et sikatoy nananap ed sikato. Makasengeg ed inkarumsis to, sikato so akiseksekan ed karaklan ya agnaimano no nayari, ya inkuanto ed inkasikato: “No nadiwit ko lambengat so saray kawes to onabigak.” Sanen ginawa to so ontan, tampol ya alikas ton inmabig so panpaparala to.

“Siopa so aniwit ed siak?” Agaylan saraman a salita nen Jesus so angigtot ed sikato! Panon ton naamtaan? ‘Managbangat,’ insuppiat nen Pedro, ‘dakel a totoo so onleletlet ed sika tan bobontonan daka, tan ikuan mon, “Siopa’y aniwit ed siak?”’

Aanapen imay bii ed kaliberliber, inkuan nen Jesus: “Wala so aniwit ed siak, ta alikas ko a pinmaway ed siak so pakapanyari.” On, saman so aliwan ordinaryon diwit, lapud say panamaabig a nansumpalan so amawas ed biskeg nen Jesus.

Diad impakanengneng a sikatoy naimano, say bii so inmasingger tan dinmakmomo ed arapan nen Jesus, ya atalagnaw tan mangiwgiw. Diad arapan na amin a totoo, imbaga to so interon katuaan nipaakar ed sakit to tan no panon a singa sikato natan so apaabig.

Apakiwas ed sigpot a panangipatua to, si Jesus so maabagey ya angambegya ed sikato: “Anak say pananisiam pinaabig to ka, onla ka’d kareenan, et onabig ka ed [makapaermen a sakit mo, NW].” Agaylay abig a naamtaan a samay Sakey a pinili na Dios a manuley ed dalin so ontanlan maligsa, maabagey a persona, a namparan manatalima ed totoo tan walaan na pakayarin ontulong ed sikara! Mateo 9:18-22; Marcos 5:21-34; Lucas 8:40-48; Levitico 15:25-27.

▪ Siopa si Jairo, tan akin a sikatoy linma ed kinen Jesus?

▪ Walaan na anton problema so sakey a bii, tan akin a say iyaasingger to ed si Jesus so ontanlan mairap parad sikato?

▪ Panon a say bii so apaabig, tan panon a sikato so inambegya nen Jesus?