Kasin Saray Pananebel so Manismaya ed Sika?

SARAY pananebel! Anggapo so siopaman a talagan mankaliktan ed saratan; ingen amin tayo so anggan panon et kaukolan a mananos ed saratan. Anggaman ontan, no maminsan et kasin sika so nadidismaya lapud ta say bilay mo so singano limitadon tuloy? Anganko ta mas maabig no umanen moy punto-de-bistam. Imbes a panpagaan so bengatlan agmo nagawaan, akin ya agmo sigpot ya anamoten so antokaman iran kawayangan a pangagayagaan mo?

Alimbawa, dakel a gipit ed panagbilay so mankaliktan a sikaray onyaman. Anggaman ontan, legan a say inkaduka so mangigetar ed nagawaan tayo ed sayan sistema na bengabengatla, nayarin nagamoran na amin iray importantin bengatla ed bilay. Saray duka ontan met ed mayaman so mangaro, mangasawa, mamabaleg na ananak, mangayaga ed maabig a pikakaaro, tan arum nira. Nagkalalon importanti, saray duka ontan met ed mayaman et kabat da si Jehova tan manilalo ed insipan a balon mundo. Parehon duruka tan mayaman so onaaligwas ed Kristianon kakabatan tan pikakabat a magmaong nen saray kayamanan. (Uliran 2:1-9; Eclesiastes 7:12) Amin​—mayaman man tan duka—​so makapanggawa na matalonggaring a ngaran parad inkasikara ed si Jehova. (Eclesiastes 7:1) Diad panaon nen Pablo say Kristianon kongregasyon so malalaknab a tugyopen na totoon abeba ed sosyal a kipapasen​—arum ed sikara so ariripen—​a makabat ya angusar ed antokaman a kawayangan ya inyabuloy na saray sirkumstansya ra.​—1 Corinto 1:26-29.

Makasulatan ya Inkaulo

Diad Kristianon panamaley, say asawan bii so pauleyan ed asawa to​—sakey ya oksuyan ya adesinyon mangungguna ed interon pamilya. (Efeso 5:22-24) Kasin liknaen na asawan bii a napaabeba lapud saya? Andin balot. Say sanasawa so sakey a team. Say inkaulo na laki, sano agamilen ed singa-Kriston paraan, so mangipasen na dagdaiset a pananebel ed asawa to tan mangiyabuloy ed asawan bii na dakel a pankanawnawan nausar iray abilidad tan talento to. (Efeso 5:25, 31) Say “sankakanaan a bii” na Uliran kapitulo 31 so okupado ed dakel a makapa-interes a kimey a mankakaukolan na abilidad tan determinasyon. Malinew, say panagpasakup ed asawa to so agmakapairap parad sikato.​—Uliran 31:10-29.

Mipadpara, anggapo so probisyon parad bii a mangidaulo ed kualipikadon lalaki ed Kristianon kongregasyon. (1 Corinto 14:34; 1 Timoteo 2:11, 12) Kasin manliknay ag-inkakontento iray bibii ed satan a pananebel? Andi. Maslak so misadsalamat ed pakanengneng ed satan a pamaakaran ed Kristianon serbisyo ya aasikasoen diad teokratikon paraan. Sikaray maliket a nagunggunaan manlapud panagpastol tan panagbangat na aturon mamatatken tan mapaga ed inkasikara ed makanan kimey na panagpulong tan panaggaway babangatan. (Mateo 24:14; 28:19, 20) Baleg so nagagawaan na Kristianon bibii ed sayan lawak, tan saya so mangitatarok ed sikara na galang ed imaton nen Jehova a Dios.​—Salmo 68:11; Uliran 3:35.

Saray Pananebel ed Kalangweran

Saray kalangweran met so no maminsan et manreklamo a say bilay da so napepegetan a tuloy, mabetbet lapud sikaray walad pakauley na atateng da. Ingen saya met so Makasulatan. (Efeso 6:1) Imbes ya onsyodot iray makabat a kalangweran a Kristiano ed saray pananebel na atateng ya ipapakseb ed sikara, sikaray mangiyapasakey ed pangayaga na saray kawayangan a walad sikara​—pati say, gendagendat, a kawayangan ed ambebelat iran responsabilidad. Kanian sikara so makapanganamot ed biskeg na inkatobonbalo ra tan saray sirkumstansyan mangiparaan ed inkasikara parad bilay na susto la’d edad.

Sakey a datin manangasikaso na sirkito ed Brazil et atandaan ton tuloy so 12-taon a laki diad melag a niyarawin grupo na manangipalapag ya anganamot a tuloy ed saray sirkumstansya to. Samay apabtangan a mangasikaso ed saray rekord so okupado ed sekular a trabaho tan agmakapangiter na malaknab ya imano ed grupo, balet inyoksoy to ed sayan kalangweran ya ontulong ed sikato. Amta to no iner so kawalaan na amin a porma tan lawas wadtan pian ontulong. Say interes to so makapaseseg, tan sikato so sakey a matoor a kaiba ed lawak na serbisyo. Satan a kalangweran so aturo lan matatken natan.

Walaray dakel a situasyon a nayarin manlimita ed kawayangan na too. Arum so nasesebelan lapud sakit. Arum so manbibilay ed naapag iran sankaabungan tan aromog dan say kawayangan da so alimitaan na saray kaukolan na agmananisian asawa. Bangta saramay manbibilay a walaay pananebel so mankaliktan na bengatlaran duma, sikara nin siansia so makapanbilay na makapenek a panagbilay. Sayan magasin so nankarga na dakel a salaysay na saratan ya indibidual a makapaseseg a tuloy ed arum lapud sikaray onsasaral ed si Jehova tan mangaanamot a tuloy ed saray sirkumstansya ra.

Nipaakar ed kaslakan a situasyon ed dilin agew to, inkuan nen apostol Pablo: “Atawag ka kasi anta aripen ka? Ag mo kapagaan: et no nayarian mo so onpawil a bolos, anamot mo.” (1 Corinto 7:21) Agaylan asimbang a panmoria! Arum a situasyon so manguman. Saray kalangweran so ombabaleg. Saray onsusumpan kapareha so no maminsan et mangawat ed katuaan. Saray situasyon ed ekonomya so akabatan ya inmaligwas. Saray mansasakit so nayarin onabig. Diad arum a kipapasen, nayarin saray pamaakaran so agmanguman anggad isabi na balon mundo nen Jehova. Anggaman kuan, anto so nagamoran no say sakey et panpagaan to so agto nagawaan a nagagawaan na arum?

Kasin akapanbantay ka na saray manok a mantekkiab ed tagey tan pandinayewan mo so dakep tan kawayangan na kiwas da? Anganko ta kaliktan moy makatekkiab a singa ontan. Bueno, agmo nayarian tan talagan agmon balot nagawaan so itekkiab a singa nayarian na saray manok! Balet maseguron agka manreklamo. Imbes, sika so mangayaga ed inter-Dios iran abilidad mo. Nabibilay ka met anggaman sika so manaakar ed liber na tapew na dalin. Diad mipadparan paraan, antokaman so kipapasen tayo ed bilay, no iyapasakey tayo so kanonotan tayo ed nayarian tayon gawaen imbes a panpagaan so nipaakar ed ag tayo nagawaan, say bilay so magmaliw a makapenek, tan sikatayo so makaromog na gayaga diad serbisyo ed si Jehova.​—Salmo 126:5, 6.

[Litrato ed pahina 28]

Kasin liknaen mon saray ateng mo et gigipiten da ka?