Apresyaen Moy Sagradon Serbisyom

PIAN nadampot so antokaman a makanan kalat, sikatayo so nepeg ya akaparaan a mansakripisyo. Say pagmaliw a sakey a doktor et kaukolan toray taon na panaral tan determinasyon, ontan met ed kuarta. Say sakey a matalonan gymnast so angusar na baleg a panaon na inkatobonbalo to a kikimeyan so gunaet ton magmaliw ya onsiano ed satan. Say onsianon piyanista so nayari met ya onnengneng ed saray taon na dedikadon inpansanay to.

Anggaman ontan, walay sakey a kalat a mangitatarok na pankaabigan a nagkalalo nen say antokaman a kablian a walan natumangan. Anto itan? Satan so pribilihyon pagmaliw ya aripen na Sankatagyan, si Jehova a Dios. Antokaman iray sakripisyon gawaen tayo balanglan panaon, kuarta, odino enerhya, say pribilihyon pangisaklang na sagradon serbisyo ed Manamalsa tayo so mangitatarok na agnaparaan a tumang. Saray salita nen apostol Pablo so tua: “Say kasantosan mangiter na pinanabang ed amin a bengatla, ta wala ed sikato so sipan na saya’n bilay a peles, tan say onsabi.” (1 Timoteo 4:8) Nengnengen tayo no panon a tua iya.

Sanen Inmunan Naaralan Tayo so Nipaakar ed Dios

Maslak ya onkiwas a maapabor ed maong a balita tan ongapon manaral ed Biblia so maseguron agmakamoria ed laknab na saray panamasimbalo a nagawa ed saray bilay da. Ununa, say balon iyaaralan na Biblia so nayarin naandiay pigaran kaaron agmakatalos no akin ya agla mikokoopera ed sikara ed saray gegemtan a bidbidbiren to natan ya agmamagalang-ed-Dios. (1 Pedro 4:4) Nayarin naeksperiensia na arum so isusumpa na pamilya tan nayarin nasakitan ed pakanengneng a saramay aaroen da so mangipatnag na agpanlabay, panggula ni ingen, ed si Jehova. (Mateo 10:36) Satan so nayarin sakey a sakripisyo.

Diad trabaho odino ed eskuelaan, kaukolan met so sakripisyo. Say balon iyaaralan na Biblia so diad dugan panaon et ontundan mibiang ed saray minumundon parti tan arum niran selebrasyon. Agto la ontalineng ed marutak a tongtongan na katrabahoan tan kaeskuela to, nisay milureyan na mabanday iran ludlurey ed sikara. Imbes, panggunaetan ton iyaplika so simbawan naromog ed Efeso 5:3, 4: “Ingen say lawan, tan say amin a nengneng na karumsisan, odino say agum, ag la komon nabitla ed sikayo, onong a manepeg ed saray sasantos; ni say karutakan tan angan saray mabanday a panagsalita, tan saray panaglurey, bengabengatla ya pisasalamat.”

Saratan a panamasimbalo so nayarin manggawa’d iyaaralan na Biblia a nipuepuera. Satan so mairap, nagkalautla parad sakey a tobonbalon maneeskuela ni. Lapud nipapaarap ed saray piesta-opisyal, ontan met ed saray bangat a sumpad Dios, a singa say ebolusyon, tan mabetbet a desdes a mipakna ed grupo, nepeg a naynay a mipuligesgesan iray kalangweran a Kristiano parad pananisia. Say itumbok ed saray dalan na Dios so manggawa ed sikara a duma tan nayarin mansumpal ed kaludlurey manlapud saray kaklase tan managbangat. Saya so nagkalautlan mairap ya awaten legan na delikadon inkatinedyer, balet say abobon na Dios so mamabli.

Talaga Ta a Sakripisyo Iratan?

Arum niran bengatla ya ompatnag diad ununa a sakripisyo so magmaliw iran bendisyon. Arum so kaukolan ya ontunda ed niyugalin panagsigarilyo. (2 Corinto 7:1) Nayarin saya so sakey a pipuligesgesan, balet agaylan bendisyon sano satan a makapadimlan bisyo so diad kaunoran et natalonaan! Pareho met so nibaga nipaakar ed itatalona ed inka-iluam ed arum niran druga odino ed alkohol. Agaylan magmaong so bilay ya anggapo iratan a makaderal a bisyo! Kaukolan ya oksuyen na arum iray paniiba ra bilang sanasawa. Saramay manaamong ya aliwan kasal so nepeg a balanglan manpakasal odino ontunda lan manamong. (Hebreos 13:4) Saramay walaay dakel ya asawa so nepeg a mangikasal ed asawa ra ed inkatobonbalo. (Uliran 5:18) Saratan a pananguman et lalanoren to so sakripisyo, balet saraya so mangitarok na kareenan ed ayaman.

Nonoten Iray Tumang

On, siopaman ya ontutulok ed saray ganggan nen Jehova so talagan nagunggunaan. Diad sanka-unaan a pankanawnawa ed bilay to, say iyaaralan na Biblia so onggapon mantawag ed Manamalsa diad ngaran To, a Jehova. (Salmo 83:18) Say iyaaralan so makapangaro ed si Jehova legan ya aaralen to so nipaakar ed makapakelaw a bengatlan ginawa To tan gawaen to ni parad katooan. Diad saray bansa a say takot ed inatey so kaslakan, naeekal iyan maaniton takot, diad pakaamta a saray inatey so naugip, a manaalagar na kioli. (Eclesiastes 9:5, 10) Tan agaylan pakainawaan so pakamoria ya agpapairapen nen Jehova so totoo ed ando lan ando diad impierno! On, say katuaan so talagan makapangibulos ed sikato.​—Juan 8:32.

Legan ya itutukoy na iyaaralan so bilay to ed saray estandarte nen Jehova, nagagamoran to so malinis a konsiensia tan dilin-respeto. Say panaral a manbilay bilang tuan Kristiano so ontulong ed sikato a mangasikason magmaong ed pamilya to, a mangitarok na baleg ya inkakontento tan gayaga. Insan wadtan so pakaatendi ed saray miting diad Kingdom Hall. Agaylan makapagayagan eksperiensia! Wadia iray totoo a talagan mangaagamil na ampetang a panangaro ed ibabaga na Biblia a manepeg a mangipabidbir ed totoo na Dios. (Salmo 133:1; Juan 13:35) Say panagsalita ra so malinis tan makapaseseg legan a sasalitaen daray “makapakelaw a gawa na Dios.” (Gawa 2:11) On, say pililimog ed “impanaagi” so sakey a panlalapuan na liket. (1 Pedro 2:17) Satan a maabig a piuulop so ontutulong ed iyaaralan na Biblia ya “ikawes to so too a balo, a sikato so pinalsay Dios ed loob na kaptekan tan matuan kasantosan.”​—Efeso 4:24.

Say Kundang na Dedikasyon

Legan a say indibidual so onaaligwas ed pikakabat, diad kaunoran et sikatayo so pakiwasen na aro ed si Jehova a mangidideka na bilay to ed sikato tan mangisimbolo ed sayan dedikasyon diad bautismo ed danum. (Mateo 28:19, 20) Sakbay a gawaen iyan kundang, insimbawa nen Jesus a nepeg a kuentaen na babangatan to. (Lucas 14:28) Tandaan, say dedikadon Kristiano so mangipapasen ed linawa nen Jehova ya ununa tan italirak toray bengatlan panpilalekay laman. Kikimeyan ton tuloy so pangipulisay ed “saray gawa na laman” tan bayuboan so “bunga na Espiritu.” (Galacia 5:19-24) Say simbawan naromog ed Roma 12:2 so walaan na babaleg a betang natan ed bilay to: “Ag kayo miabobon onong ed sayan mundo: no ag ingen mangoman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.” Kanian, say dedikadon Kristiano so manbibilay tekep na liknaan na balon gagala.

Balet, kunsideraen so naaawat to. Sakey ni, sikato la natan so walaan na personal a siglaotan ed Manamalsa na talba. Sikato so niyabawag a matunong tekep na panmoria a magmaliw a kaaro na Dios! (Santiago 2:23) Tekep na lalon araldalem a kabaliksan, sikato so ontawag ed Dios bilang “Ama mi’n wala ka ed tawen.” (Mateo 6:9) Sananey nin bendisyon ed balo nin dedikado et say pakaamta a say bilay so talagan walaan na gagala tan sikato so manbibilay a mitunosan ed satan a gagala. (Eclesiastes 12:13) Diad itumbok ed panangiwanwan nen Jesus, napaneknekan ton say Diablo so matila diad pansiansian matoor. Agaylan gayaga so itatarok na satan ed puso nen Jehova!​—Uliran 27:11.

Siempre, kaleganan a susungdoan na Kristiano so basbas na katooran, walaray kaaruman a sakripisyon kaukolan ton gawaen. Kaukolan na saya so panaon a panggawa na makabaliksan a personal tan kongregasyon a panagaral na Salita na Dios. (Salmo 1:1-3; Hebreos 10:25) Say panaon parad lawak na ministeryo so kaukolan a saliwen manlapud arum niran kimey. (Efeso 5:16) Say panaon tan sagpot so nakaukolan met ed iyaatendi ed saray miting na Tastasi nen Jehova tan panbaroy ed saray asamblea tan kumbension. Satan so mankaukolan na dilin-sakripisyo ed pibiang diad panuportay pinansyal ed Kingdom Hall tan say sankamundoan a panagpulong a kimey. Anggaman ontan, legan a minilyon a Kristiano so makapantasi, say impapuson pibibiang ed saratan a bengatla so mangitatarok na liket. Inkuan nen Jesus: “Lalo a mapalar so mangiter nen say mangawat.”​—Gawa 20:35.

Mas dakel so tumang ed panuporta ed kimey nen Jehova nen saray sakripisyo. Legan na ibubulaslas tayo ed inkatatken, say ministeryo tayo so magmaliw a lalon mabunga tan magayaga. On, anggapo so makapangitarok na ontanlan inkapenek a singa say panbangat ed sakey na katuaan ed Biblia tan ed pakanengneng ed sikaton mandayew ed si Jehova. Tan no say balon managdayew so sakey a membro na pamilya, anganko sakey ya anak a nipasal “ed disiplina tan manametek-a-kanonotan nen Jehova,” satan so mangitarok na nikadkaduman gayaga. (Efeso 6:4, NW) Nanenengneng tayoray bendisyon na Dios ed saray sagpot tayo a magmaliw a “kakimeyan” to.​—1 Corinto 3:9.

Arum Niran Tumang Parad Matoor a Serbisyo

Tua, nawalaan tayo na saray problema legan a mantultuloy ni iyan sistema na bengabengatla. Maseguro, saray problema so ompalalo legan a mantikey so panaon na Diablo. Nayarin managmak tayo na panamasegsegang odino mansungdo ed tukso. Balet say pikakabat a say Dios so walad sikatayo so manligliwa ed sikatayo tan mangiter ed sikatayo na biskeg a mansungdo. (1 Corinto 10:13; 2 Timoteo 3:12) Arum a kaparan Kristiano so nansungdon abayag ed maruksan tratamento, balet sikaray nansiansia lapud aro ra ed Dios. Saramay matalonan akapansungdo ed saray subok ed nanduruman nengneng so walaan na mipadparan liknaan a singa ed saray apostol sanen sikaray nilewet tan kayari to et pinapaway. Isasalaysay na Gawa 5:41: “Sikara siri’ pinmaway ed arap na singbatan, a malikeliket ira lapu’d kinmana ra a nantepel na baing ed Ngaran nen Jesus.”

On, mas dakel so tumang lapud panagsungdo nen say sakripisyo natan. Balet tandaan, say maridios a debosyon so ‘manisipan’ aliwa lambengat ed ‘say bilay natan’ balet ontan met ‘ed onsabi.’ (1 Timoteo 4:8) Agaylan amayamay so nailaloan na sakey a mansusungdo! No sika so matoor, naliktaran mo so baleg a kairapan a mananda ed anggaan na sayan sistema na bengabengatla. Odino no sika so ompatey ya unona ed kapanpantokan ya ebento, sika so napaoli ed balon mundo a tumbokan na satan. (Daniel 12:1; Juan 11:23-25) Isipen pa so liknaan mo ed panangitandoro diad satan sano nibagam lan: “Tekep na tulong nen Jehova, siak so nanmatoor tan akaawat na tumang!” Agaylan makapasagyat so pakatawir na kabiangan na satan a dalin, a “napano naani ed pikakabat ed Jehova, singa saray danum sakbongan da so dayat.”​—Isaias 11:9.

On, wala so sakripisyo ed panlingkor ed Dios. Balet no nipareng ed saray tumang, melag so sakripisyo. (Filipos 3:7, 8) Nisesengeg ed amin a gagawaen na Dios parad ariripen to natan tan gawaen to ni ed arapen, nibunlayon tayoray salita na salmista: “Anto kasi manepeg ya ibales ko ed Jehova a nipaakar ed amin na saray panamainawa to ed siak?”​—Salmo 116:12.