Say Biblia​—Anto so Peteg a Kablian To?

“SAY Biblia so sakey a misteryo, libron agginagalan natalosan,” so ibabaga na sakey ya unabong. Sananey met ya unabong so nankuan: “Amta’k a say Biblia so importantin libro, balet ta anggapoy tanton amtak nipaakar ed satan. Mairap a talosan itan.”

Inkuan na The Toronto Star: “Dakel a Kristianos so makaamtay . . . daiset nipaakar ed Biblia.” Onia so komento na sakey a biin Katoliko: “Parad siak et marakep so pakawalaan na Biblia. Saya so mangitatarok na akindalem a kareenan.” “Say Biblia so singa sakey a kompas a mangiwawanwan ed agmaligen, mabagyon dayat na bilay a mamaarap ed pasen na pakasalimbengan,” kuan na sakey a managsigay. Diad saray balikas na datin Hindu, “say Biblia so Salitay Dios tan sakey a regalo ed katooan tan tambal ed espiritual ya ir-irap.”

Dakel tan nanduruma iray opinyon nipaakar ed tuan kablian na Biblia. Balet ta, anton talaga so peteg a kablian to?

Say Biblia so sanka-importantian tan sankalaknaban a nibunog a libro natan. Walad saray pahina na saya iray ebat na sankawetwetan iran probleman nasasagmak odino kidungetan ni na too. Say inka-praktikal na saray simbawa to so agnaparaan. Say ipapaseseg toran estandarte ed moralidad so agnalampasan. Saray mensahe to so mabiskeg tan makagungguna. Sayan libron agnaparengan ed kablian so makanepegan ya alaen ed saray istanti tayo pian ikdan na maalwar a panangimano tan panangusisa.

Nibukay tayo so Biblia tekep na sigpot a talek a satan so sigpot a susto, nailaloan, tan autentiko. Saray maawaran ya agawgawan nikurit ed satan so pepekderan na sekular ya awaran. Naulit-ulit, saray arkeolohikon nalmoan so mamapaneknek a say Biblia et peteg tan tua. Say inkaprangka na ag-onkulang ya 40 odino masulok nin managsulat ed Biblia so mangipabidbir ed sikara bilang lalakin matua tan walaay integridad. Say akindalem a pantutunosan na Biblia so mangipapanengneng a saya et agnanlapud too. Saray ebenton nikurit ed satan so peteg. Saray totoon tutukoyen to so peteg. Saray pasen tan lugar a sasaglawien to so peteg. Niarum ni, kakargaen na Biblia so matalonggaring iran propesiya ya agniburin mangipapabidbir ed si Jehova a Dios bilang say Autor na Biblia.​—2 Pedro 1:21.

Sinegurado na Engranden Instruktor tayo a say pikakabat nipaakar ed linawa tan saray gagala to so nagamoran na saramay malabay a mangamta ed ontan. Diad tua, ibabaga ed sikatayo nen Jehova ed malinew a salita a linawa ton amin a nengneng na totoo so manaral ed Salita to tan “ondago ra ed pakapikabat ed katuaan.” (1 Timoteo 2:3, 4; Uliran 1:5, 20-33) Saya so sakey ed sanka-importantian a bengatlan nagawaan tayo ed bilay tayo. Saya so sakey ya angat ya obligado tayon arapen. Atalosan iya na asasakbay a Kristianos. Sakey ed sikara so apakiwas a mangibagan: “Et saya so kerewen ko a say aro ya ondaak ya lalo nin lalo komon ed kakabatan dia ed amin a panangimano; ta pian nayarian yo ya abobonan so bengatla ran sankaabigan.”​—Filipos 1:9, 10; Colosas 1:9, 10.

Say Biblia so manunan paraan na Manamalsa pian ipatalos so linawa tan gagala to ed atooan a pamilya, tan isasalaysay to no panon a balang sakey ed sikatayo so mitukoyan ed satan a gagala. Wadtan iray insulat ya agawgawa ed apalabas, tan mangiiter na malinew a retrato ed kanonotan nipaakar ed arapen. Idadatak na Biblia so suston doktrina tan mamepetek ed sikatayo no anto so nepeg tan agnepeg tayon panisiaan. (Gawa 17:11; 2 Timoteo 3:16, 17) Itatarok to so totontonen ed kondukta a kaukolan a tumboken na too, tan iwawanwan toray totoo ed dalan na itatalona tan liket. (Mateo, kapitulo 5 ya anggad 7) Idadanet na saya a say Panarian na Dios so mogmon ilalo parad amin a katooan tan ipapanengneng to no panon a say gobierno to so instrumento ed pangitandoro ed ngaran to tan mangiyalangon ed inkasoberano to. Isasalaysay na Biblia so kurang a kaukolan tayon gemtanen pian napangayagaan so maapit, maaron siglaotan ed Manangiter-Bilay tayo, si Jehova.

Niarum ni, say Biblia lambengat so mogmon libro a mangitonton ed sika ed sankabalgan a langkap a naawat na katooan ed kapiganman​—andi-anggaan a bilay ed paraison dalin bilang ayadyarin totoo. (Roma 6:23) Onia so ibabaga ed sikatayo na bogbogtong ya Anak nen Jehova: “Saya sikato et kabaliksan to so andi-anggaan a bilay, say pangala ra na suston kakabatan ed sika, say saksakey a tuan Dios, tan saman so inbakim, salanti si Jesu-Kristo.” (Juan 17:3, NW) Maseguron say libron ontan so kabaleg na kablian to so nepeg a mamakiwas ed sikatayon aralen no anto so nepeg a gawaen tayo pian nagamoran so langkap ya andi-anggaan a bilay. Say Biblia so ginagalan natalosan, unong ya ipanengneng na ontumbok ya artikulo.