Report na Saray Manangiyabawag na Panarian

Say Salita na Dios so Mangisesekar na Biskeg

“SAY salita na Dios sikatoy mabilay tan mabiskeg.” (Hebreos 4:12) Sarayan salita so napapaneknekan a tua ya aminpigan danay sano saray totoon papalikdoen na palson relihyon so niwawalwal ed saray katuaan na Biblia. Singa nipanengneng ed onggendan ya eksperiensian nanlapud Dominican Republic, say biskeg na Biblia so makapasimbalo ed saray bilay na totoo tan saya so mangiiter na ilalo.

Binisita na Tastasi nen Jehova so sakey a prominentin Katolikon bii ya agano nin inateyan na duaran ankelag ya anak. Sikato so nanermen a tuloy tan inagew-agew a nannangis lapud inkagawa. Impanengneng na Tastasi ed sikato no antoy ibabaga na Biblia ed Juan 5:28, 29 nipaakar ed ilalon kioli. Kayari na kaaruman niran impitongtong ed saray Tasi, agto lambengat aromog so ligliwa ed ilalon kioli noagta amoria to a sikato so pinalikdo na relihyoso iran pangulo na Katoliko.

Tampol ya inmekal manlapud Iglesia Katolika, tan sikatoy angawat na regular a panagaral na Biblia ed saray Tasi nen Jehova. Anggaman ontan, say asawa to so ag-inmabobon ed saray panmoria to. Lapud sikato met so talagan prominentin Katoliko, inyuksoy to a say misis to so bisitaen na kabkabat ed pulitika tan relihyoson kakaaro ed panalin sikatoy dismayaen manlapud kurang to tan sikatoy ipawil ed Katolisismo. Saginonor et pinagyaw to so misis ton midiborsyo, ya aminsan ni ingen et impakabat to ed kakanayon to tan kapara iran membro na iglesia a sikaray mandiborsyo la.

Balet ta sinmaew so pakana to. Diad kasuniyan, say bii so nagkalalon determinadon nanpatuloy ed panagaral to na Biblia. Lapud iyaaligwas to ed espiritual tan impamayubo to na maabig a Kristiano iran kualidad, deniside na asawan laki a miamong ed sikato imbes a midiborsyo. Sakey ya agew et inmabobon ni ingen ya usisaen so literatura na Biblian aaralen na bii​—balet diad sakey a kondisyon. Labay ton usaren so dilin bersyon na Katolikon Biblia to.

Diad inkakelawan to, tekep na tulong na saray literatura manlapud Tastasi nen Jehova, sikatoy ginmapon akaaral na balon bengabengatlan direkta manlapud Biblia to. Amoria to a duga so pinilin kurang na asawa to, tan ag-abayag et akaparaan lan ontumbok ed alimbawa na asawan bii. On, anengneng to so pankaukolan na panggawa na saray panamasimbalo ed dilin bilay to. Sakey a mairap ya angat et say itundan pansigarilyo. Kayari impamasa na Hulyo 8, 1989, a paway na magasin ya Awake! a walaay paulon “Death for Sale​—Ten Ways to Stop Smoking,” sikato so determinadon mangitunda ed sayan agmakasulatan a bisyo. Kasalat na niyugalin pakete na sigarilyo a mabetbet a naromog ed bulsa to, ginapoan ton awiten itan a paway na Awake! Bektaman a makakasigarilyo, basaen toray artikulon nipaakar ed panagsigarilyo. Nagmaliw a matalona iyan paraan! Kayari impamasa to na saray artikulo ed aminpigan danay, ayarian ton intunda so panagsigarilyo.

Natan sikaran sanasawa so manlilingkor ed si Jehova bilang bautismadon ministro. Sano iyabuloy na saray sirkumstansya, say laki so manlingkor bilang sigpot-panaon a ministro, a mangidededika na dakel a panaon to ed panangipulong na maong a balita na Panarian na Dios, tan sikato so manlilingkor bilang ministeryal ya aripen diad lokal a kongregasyon na Tastasi nen Jehova. Sikato tan say misis to so manatalaran ed kioli sano naabrasa daray anak da ed bilay diad sakey a balon mundo. On, say Salita na Dios, say Biblia, so mabilay tan mangisesekar na biskeg!