Ariripen na Dios—Sakey ya Organisado tan Maliket a Totoo
“Mainawa [Maliket, NW] so totoo a say Dios da et si Jehova.”—SALMO 144:15.
1, 2. (a) Akin a si Jehova so walaan na kanepegan a mangiletneg na saray estandarte parad ariripen to? (b) Antoray duara ed ugali nen Jehova a nagkalautlan labay tayon aligen?
SI Jehova so Sankatalbaan a Soberano, say makapanyarin-amin a Dios, say Manamalsa. (Genesis 1:1; Salmo 100:3) Bilang ontan, sikato so walaan na kanepegan a mangigetar na saray estandarte na walna na ariripen to, ta amta to no anto so sankaabigan parad sikara. (Salmo 143:8) Tan sikato so Manunan Ehemplo ra, a saray kualidad to so kaukolan dan aligen. “Aligen yo sirin so Dios, singa anak to kayon inararo,” insulat na sakey ya apostol.—Efeso 5:1.
2 Sakey ya ugali na Dios a kaukolan tayon aligen et lalanoren to so nipaakar ed organisasyon. Sikato so “aliwa’n Dios na kolkol.” (1 Corinto 14:33) Sano siaalwar tayon imanoen iray bengatlan pinalsa na Dios, sikatayo so napaskar a mandesidin sikato so organisadon tuloy a Persona ed talba. Anggaman ontan, sananey nin ugali na Dios a labay ton aligen na ariripen to et say inka-liket to, lapud sikato so “maliket a Dios.” (1 Timoteo 1:11, NW) Kanian, say organisasyonal ya abilidad to so babalansien na liket. Say sakey ed saya et ag-onlampas a makaapekto ed sananey.
3. Panon ya ipapanengneng na mabitewen a katawenan so abilidad na Dios a mangorganisa?
3 Amin a ginawa nen Jehova, manlapud sankabalegan anggad sankamelagan, so mangiiter na ebidensya a sikato so sakey a Dios na organisasyon. Alimbawa, kunsideraen pa so nanengneng a talba. Satan so walaan na binilyon a bibitewen. Balet saraya so aliwan basta ataytayak ya anggapoy oksuy. Naiimano na astropisikon si George Greenstein a wala so “sakey a disenyo na inka-organisay bibitewen.” Saratan so naorganisa ed saray grupo a tatawagen a galaksi, say arum so walaan na nilasus binilyon a bibitewen. Tan akalkulan walaray binilyon a galaksi! Saray galaksi so naorganisa met, ya arum ed saratan et (manlapud pigpigara ya anggad nilibo) saniiba ed sakey a gumpong na saray galaksi. Tan saray gumpong na galaksi so inilaloan a naorganisa ed nagkalalon babaleg iran yunit a tatawagen a supercluster.—Salmo 19:1; Isaias 40:25, 26.
4, 5. Mangiter na saray alimbawa na organisasyon ed limog na saray bengatlan walaay bilay ed dalin.
4 Say maong ya inka-organisa na saray palsa na Dios so naiimano ed amin a pasen, aliwa lambengat ed nanengneg a katawenan noag ontan met ed dalin, pati saray nilaksa-laksan bengabengatlan walaay bilay. Nipaakar ed amin na saya, insulat nen Paul Davies, sakey a propesor ed pisika, a saray manangimaton et “nikelkelawan” ed “makapaingganyo tan maselewet ya inka-organisa na nanengneng a mundo.”—Salmo 104:24.
5 Kunsideraen paray pigaran alimbawa na “maselewet ya inka-organisa” a naromog ed saray bengatlan walaay bilay. Say neurosurgeon a si Joseph Evans so angikuan nipaakar ed utek tan tenten na too: “Agnaisip so kapetegan na agaylan inka-uksoy to.” No nipaakar ed mikroskopikon selulan mabilay, onia so sinalita na bakteriolohistan si H. J. Shaughnessy: “Say inkakomplekado tan karakpan na uksoy na mikrobiolohikal a mundo so ontanlan makapakelkelaw ed inkagawa to ya ompatnag a satan so sakey a kabiangan na sisteman ginagala na Dios.” Tan say biologo ed molekula a si Michael Denton so nankuan nipaakar ed genetic code (DNA) ed sakey a selula: “Saya so ontanlan susto ya amin ya impormasyon . . . a nakakaukolan pian seguroen so inka-desinyo na amin a nengneng na saray organismo a niwala ed kapiganman ed planeta . . . so nayarin iyan ed sakey a kutsarita tan wala ni natilak ya ispasyo parad amin ya impormasyon ed balang libron nisulat ed kapiganman.”—Nengnengen so Salmo 139:16.
6, 7. Anton organisasyon so ipapanengneng ed limog na saray espiritun pinalsa, tan panon iran mangibabalikas na panamabli ra ed Manamalsa ra?
6 Aliwa lambengat a say materyal iran palsa so inorganisa nen Jehova noagta inorganisa to met iray espiritun palsa to ed tawen. Ipapakabat ed sikatayo na Daniel 7:10 a saray anghel a manbilang na “samplonlibo ed maminsamplon libo so inmalagey ed arap [nen Jehova].” Say sanlasus milyon a makapanyari iran espiritun pinalsa so wadman pian manlingkor, balang sakey so apabtangan na nepeg ton gawaen! Agnaisip so dunong a nakaukolan pian naorganisa so ontan a kinarakel. Matukotukoy, ibabaga na Biblia: “Galangen yo si Jehova, sikayo angeles to, ya mabiskeg, a [manguunor] na salita to; ondengel na voces na salita to. Galangen yo si Jehova amin yo a gawa to, ed amin a paspasen na panuleyan to: galangen mo si Jehova, O kamarerwak.”—Salmo 103:20, 21; Apocalipsis 5:11.
7 Agaylan makapasagyat so inka-organisa tan inkadakep na saray kimey na Manamalsa! Agpankelawan a saray makapanyarin espiritun palsa diad mangatatawen a pasen so mangiyaabawag tekep na respeto tan panagpasakup: “Sika so manepeg, Katawan [Jehova, NW] mi tan Dios mi, a mangawat na gloria tan dayew tan pakayari, ta sika pinalsam so lapag a bengatla, tan lapu ed linawam wala ra tan sikara so apalsa.”—Apocalipsis 4:11.
8. Antoray alimbawan mangipapanengneng ya oorganisaen nen Jehova so ariripen to ed dalin?
8 Oorganisaen met nen Jehova iray ariripen to ed dalin. Sanen intarok to so Delap ed agew nen Noe nen 2370 K.K.P., si Noe tan say pitora ni so akaliktar ed Delap bilang sanpamilyan organisasyon. Diad Intaynan nen 1513 K.K.P., impaway nen Jehova so minilyon ed totoo to manlapud inkaaripen ed Ehipto tan inikdan ira na detalyado iran kodigo na ganggan pian organisaen iray inagew-agew a panagbilay tan panagdayew da. Tan diad saginonor, diad Insipan a Dalin, samplon nilibo ed sikara so inorganisa parad nikadkaduman serbisyo diad templo. (1 Awaran 23:4, 5) Nen inmunan siglo, saray Kristianon kongregasyon so inorganisa diad silong na panangiwanwan na Dios: “Et saray arum inyan to ra ya apostoles; tan saray arum, profetas; tan saray arum, manangipulong na maabig a pakabat; tan saray arum, pastor tan manangibangat, ya onkana a pakayadyarian na saray sasantos, a nipaakar ed gawa na panaglinkor.”—Efeso 4:11, 12.
Organisado Met Iray Modernon-Agew ya Ariripen
9, 10. Panon a naoorganisa nen Jehova so totoo to ed panaon tayo?
9 Mipadpara, oorganisaen nen Jehova so modernon-agew ya ariripen to ta pian epektibon nagawaan da so kimey to parad agew tayo—say panangipulong na maong a balita na Panarian to sakbay a panganggaen to iyan kaplesan ya agmaridios a sistema na bengabengatla. (Mateo 24:14) Kunsideraen pa no antoy nasasaglawi ed sayan sankagloboan a kimey tan no panon kaimportanti so maong ya inka-organisa. Minilyon a lalaki, bibii, tan ugugaw so nipapasal pian manbangat na saray katuaan na Biblia ed arum. Pian naasistian iyan panangipasal, dakel a bilang na Biblia tan nibased-Biblia iran palapagan so niiimprinta. Agayla, kada paway na Say Panag-Bantayan natan so niiimprinta ed masulok a 16 milyon diad 118 a lenguahe, tan say Awake! ed ngalngali 13 milyon diad 73 a lenguahe. Ngalngali amin a paway so iimprintaen a manbabansag ta pian amin ya ariripen nen Jehova so makala na parehon impormasyon ed parehon panaon.
10 Niyarum ni, masulok a 73,000 a kongregasyon na Tastasi nen Jehova ed sankamundoan so naoorganisa ta pian regular a mandoroypo parad instruktion ed Biblia. (Hebreos 10:24, 25) Wala met iray nilibon babaleg a pandoroypo—saray sirkiton asamblea tan distriton kumbension—ed kada taon. Wala so malaknab a tuloy a sankagloboan a panagpaalagey na balo odino inapiger iran Kingdom Hall, Assembly Hall, ayaman a Bethel, tan pasilidad parad pangimprinta na literaturay Biblia. Walaray eskuelaan parad nagkalalon panangipasal na managbangat ed Biblia, a singa say Watchtower Bible School of Gilead parad saray misionero tan say Pioneer Service School, a nikokondukta ed daldalin ed interon globo.
11. Anton arapen a gungguna so onsabi diad pakaaral na maong a panangorganisa natan?
11 Agaylan kaabig so impangorganisa nen Jehova ed totoo to ed dalin pian ‘sigpot a nasumpal so ministeryo ra,’ ya aasistian na manmiministeryon angheles! (2 Timoteo 4:5, NW; Hebreos 1:13, 14; Apocalipsis 14:6) Diad panbabangat ed ariripen to diad saray dalan na maong a panangorganisa natan, wala ni bengatlan susumpalen na Dios. Saray ariripen to so nipaparaan a maong ta pian sano makaliktar ira ed anggaan na sayan sistema na bengabengatla, sikara la so organisadon mangigapo na bilay diad balon mundo. Insan, diad sakey ya organisadon paraan ed silong na panangiwanwan nen Jehova, nigapo ra so pangipaalagey na sankagloboan a Paraiso. Sikara met so niparaan a maong pian manbangat ed detalyado iran kakaukolanen na Dios parad bilay na binilyon nin totoon napaoli manlapud inaatey.—Isaias 11:9; 54:13; Gawa 24:15; Apocalipsis 20:12, 13.
Organisado Balet Maliket
12, 13. Akin a nibaga tayon labay nen Jehova a saray totoo so manliket?
12 Bangta si Jehova so sakey a pandinayewan a komikimey tan sankamaongan a manangorganisa, sikato so aliwan ambetel, mapeget, odino singano makina. Imbes, sikato so sakey a maligsa, maliket a Persona a sinononot ed panliketan tayo. “Sikato asikasoen to kayo,” iyaabawag na 1 Pedro 5:7. Nanengneng tayo so panangasikaso tan pilalek to parad ariripen ton manliket ed ginawa to parad totoo. Alimbawa, sanen pinalsa na Dios so ayadyarin laki tan bii, impasen tora diad sakey a paraiso na panliket. (Genesis 1:26-31; 2:8, 9) Inikdan tora na amin a bengatlan kaukolan da pian sikaray sigpot a manliket. Balet ta abalang da itan ya amin diad impanrebelde ra. Bilang nansumpalan na kasalanan da, atawir tayo so ag-inkayadyari tan ipapatey.—Roma 3:23; 5:12.
13 Anggaman ag-ayadyari natan, sikatayon totoo so siansian makaromog na liket ed ginawa na Dios. Walaray dakel a bengatlan mangitatarok na gayaga ed sikatayo—say inkasanting na palpalandey; marakep iran linok; saray ilog, kadayatan tan saray baybay; makolor, ambalingit iran rosas tan arum niran tanaman ya anggapoy anggaan ed kinarakel; tan daakan a mananam iran tagano; makapakelkelaw ya iseselek na agew ya agtayo onsasawan maniimaton ed satan; say mabitewen a katawenan a pangagayagaan tayon tatangayen no labi; say nambabangil a pinalsan ayep tekep na malaknab iran panduruma tan makaroyroyo iran anak da tekep na makapaliket a kakikiwas da; makapasagyat a musika; makapainteres tan mausar a kimey; maong a kakaaro. Mapatnag a say Sakey ya angiyuksoy ed saratan a bengatla so sakey a maliket ya indibidual a pangagayagaan to so pamaliket ed arum.
14. Anton inkasimbang so kekerewen nen Jehova ed sikatayo diad pangalig ed sikato?
14 Kanian, aliwa lambengat a say maong ya inka-organisa so labay nen Jehova. Labay to met a saray ariripen to so magmaliw a maliket, a singa sikato et maliket. Agto labay a sikara so magmaliw a panatiko diad pangorganisa na bengabengatla ed kaderal na liket da. Nepeg a simbangen na ariripen nen Jehova so organisasyonal iran dunong tekep na liket, a singa gagawaen to, ta no iner so kawalaan na mabiskeg a masanton espiritu to, wala so gayaga. On, ipapanengneng na Galacia 5:22 a say komaduan bunga na masanton espiritu na Dios ya onkukurang ed totoo to et say “gayaga.”
Mamapawala na Liket so Panangaro
15. Akin a say aro so ontanlan importanti ed panliket tayo?
15 Makapainteres a tuloy so pangimano ed Biblia a mangibabaga: “Say Dios so aro.” (1 Juan 4:8, 16) Agton balot ibabaga: “Say Dios so organisasyon.” Say aro so manunan kualidad na Dios, tan satan so nepeg ya aligen na ariripen to. Satan so rason no akin a say ununan bunga na espiritu na Dios a nilista ed Galacia 5:22 et “aro,” a tutumbokan na “gayaga.” Mamapawala na gayaga so aro. Sano aaligen tayo so aro nen Jehova ed pidedeneng tayo ed arum, tumbokan itan na liket, ta saray maaron totoo so maliket a totoo.
16. Panon ya indemostra nen Jesus so kaimportantian na aro?
16 Say kaimportantian na pangalig ed maridios ya aro so mapatpatnag ed saray bangat nen Jesus. Inkuanto: “Noag onong na inbangat na Ama ed siak, salitaen ko so saraya’n bengatla.” (Juan 8:28) Nagkalautla, anto so imbangat ed si Jesus, a diad ontan et imbangat to met ed arum? Saman et say duaran sankabalgan a ganggan ya aroen so Dios tan say kaabay. (Mateo 22:36-39) Impanengneng nen Jesus so alimbawa na ontan ya aro. Inkuanto: “Inarok so Ama,” a papaneknekan itan diad panggagawa na linawa na Dios anggad impatey to. Tan impanengneng to so aro to parad totoo diad impatey nisesengeg ed sikara. Onia so imbaga nen apostol Pablo ed saray Kristiano diad Efeso: ‘Inaro kayo nen Cristo tan inter to so bilay to parad sikayo.’ (Juan 14:31; Efeso 5:2) Kanian, imbaga nen Jesus ed saray patumbok to: “Saya so gangan ko, a manaaroan so sakey tan sakey ed sikayo, salanti singa inpangarok ed sikayo.”—Juan 15:12, 13.
17. Panon ya impanengneng nen Pablo a say panangibalikas na aro ed arum so importanti?
17 Imbalikas nen Pablo no panon kaimportanti iyan maridios ya aro diad impangibagan: “No mansalita ak komon ed dila na totoo, tan saray angeles, balet angapo’y arok, nagawaak a singa mantaknol a gansa odino manbanengbeng a piangpiang. Tan no wala komon so langkap na inkaprofeta ed siak, tan amtak komon ya amin so misterios tan amin ya karonongan; tan no wala komon ya amin ed siak so pananisia, tan pian napaalis ko komon so saray kapalandeyan, et no angapo’y arok andi kakanaan ko. Tan no ipayabol ko komon ya ami kayarian ko pian napakan ko’ray duruka, tan no iter ko komon so laman ko a papoolan, et no angapo’y arok komon, angapo so nagungunak . . . Et natan mansiansia so pananisia, ilalo, aro, sarayan talo; et say kabalbalgan ed saraya [et] say aro.”—1 Corinto 13:1-3, 13.
18. Anto so nailaloan tayo manlapud si Jehova a mangarum na liket tayo?
18 Sano aaligen tayo so aro nen Jehova, makapanmatalek tayo ed aro to ed sikatayo, anggaman sikatayo so nalilingo, ta sikato so “Dios a mapangasi tan mapaaro, mapalna ya onsanok, tan daakan ed maaro ya abig na linawa tan katuaan.” (Exodo 34:6) No sisimoon tayon magbabawi sano nalingo tayo, saraya so agbibilangen na Dios noagta simamaaron peperdonaen to itayo. (Salmo 103:1-3) On, “Say Katawan [Jehova, NW] maabagey a toloy, tan mapangasi.” (Santiago 5:11) Say pakaamta ed saya so mangaarum ed sikatayo na liket.
Relatibon Liket Natan
19, 20. (a) Akin a say sigpot a liket so aliwan posibli natan? (b) Panon ya ipapanengneng na Biblia a nayarin nawalaan tayo na relatibon liket ed sayan panaon?
19 Anggaman ontan, kasin posibli natan so pagmaliw a maliket, anta sikatayo so manbibilay ed kaunoran iran agew ed sayan napno-na-krimen, marawal, imoral a mundon walad silong nen Satanas, a ditan et say sakit tan ipapatey so nipapaarap ed sikatayo? Siempre, agtayo nailaloan natan so sukat na liket a niwala ed balon mundo na Dios, a singa say ipapasakbay na Salita to: “Ta, nia, mamalsa ak na saray balo a tawen tan balo a dalin; ta saray inmuna a bengatla ag ira la nanonotan, ag ira la onla ed nonot. Balet mangayaga tan manliket kayo ed ando lan ando ed saman a palsaen ko.”—Isaias 65:17, 18.
20 Say nayarin niwala ed ariripen nen Jehova natan et say relatibon liket lapud kabat da so linawa to tan walaan na suston pikakabat ed makapakelkelaw iran bendisyon ya asingger lan onsabi ed mala-paraison kipapasen na balon mundo to. (Juan 17:3; Apocalipsis 21:4) Satan no akin a nibaga na Biblia: “O Jehova na saray ejercitos, mapalar so too a manmatalek ed sika,” “mapalar so balang sakey ya ontakot ed Jehova, a manakar ed saray basbas to,” “mapalar iray maoyamo: ta tawiren da’y dalin.” (Salmo 84:12; 128:1; Mateo 5:5) Kanian, anggaman ed kaplesan iran mairap a sirkumstansya a kaukolan tayon arapen, nayarin nawalaan itayo na malaglaem a liket. Anggaman walaray mauges a bengatlan nagawa ed sikatayo, agtayo naermenan a singa saramay agmikabat ed si Jehova tan andian na ilalon maadon bilay.—1 Tesalonica 4:13.
21. Panon a mangaarum na liket ed ariripen nen Jehova so pangiter na panaon, biskeg, tan kaykayarian da?
21 Say liket so onsasabi ed ariripen nen Jehova lapud sikaray manguusar na panaon, biskeg, tan kaykayarian a manbangat ed saray katuaan na Biblia ed arum, nagkalautla ed totoon ‘mansibek tan mannangis lapu ed amin a kadimlaan’ a nagagawa ed mundo nen Satanas. (Ezequiel 9:4) Kuan na Biblia: “Mapalar so mangimano na duka: ta si Jehova iliktar to ed agew na kaugsan. Si Jehova yapiger to tan pansiansiaen to a mabilay, tan sikato napapalar dia ed tapew na dalin; tan sikato agmo yawat ed kaliktan na saray kakabusol to.” (Salmo 41:1, 2) Unong ya inkuan nen Jesus, “lalo a mapalar so mangiter nen say mangawat.”—Gawa 20:35.
22. (a) No nipaakar ed liket, ipanengneng so pandumaan na ariripen na Dios ed saramay agmanlilingkor ed sikato. (b) Parad anton nikaduman rason a nailaloan tayon magmaliw a maliket?
22 Kanian, bangta saray ariripen na Dios so agmakapanilalo ed sigpot a liket ed sayan kaplesan a panaon, nagagamoran da so liket ya agpangagayagaan na saramay agmanlilingkor ed Dios. Ibabaga nen Jehova: “Nia, saray aripen ko mankanta ra naani a nisengeg ed liket na puso, balet sikayo manakis kayo naani a nisengeg ed ermen na puso, tan managogol kayo naani a nisengeg ed irap na espiritu.” (Isaias 65:14) Ontan met, saramay manlilingkor ed Dios so walaan na nikadkaduman rason pian manliket natan—walaan iray masanton espiritu to ya “initer na Dios ed saray ontulok ed sikato.” (Gawa 5:32) Tan tandaan, no iner so kawalaan na espiritu na Dios, wadtan met so liket.—Galacia 5:22.
23. Anto so kunsideraen tayo ed ontumbok a panaral tayo?
23 Diad organisasyon na ariripen na Dios natan, sakey ya importantin betang so gagawaen na “saray pinagkamasiken,” mamatatken, a mangidadaulo ed saray kongregasyon, a sengegay panliket na totoo nen Jehova. (Tito 1:5) Panon so nepeg a panmoria na saraya ed saray responsabilidad, tan say relasyon da ed saray agagi ra ed espiritual? Say ontumbok ya artikulo so maningbat ed saya.
Panon Yon Ebatan?
◻ Panon a say inkapalsa so mamapaneknek ed inka-organisado nen Jehova?
◻ Panon a naoorganisa nen Jehova so ariripen to ed apalabas tan diad kaplesan?
◻ Anton inkasimbang so labay nen Jehova ya ipanengneng tayo?
◻ Kaunongan kaimportanti so aro ed liket tayo?
◻ Anton nengneng na liket so nailaloan tayo ed panaon tayo?
[Picture Credit Line ed pahina 10]
Tagey: courtesy of ROE/Anglo-Australian Observatory, niletrato nen David Malin