Tuan Liket Diad Panlingkor ed Si Jehova
“Maliket so too a say Dios nen Jacob so tulong to, a say ilalo to wala ed si Jehova a Dios to.”—SALMO 146:5.
1, 2. Anto so nibaga nipaakar ed uker na liket, tan anto so kabaliksan na liket parad dakel a totoo natan?
ANTO so liket? Saray otor na diksionaryo, pilosopo, tan teologo so manggugunaet a manguker ed atan ed loob na saray siglo. Balet ag-ira angitarok na uker a makadampot na nankakasakey a panangabobon. Aksobien na Enyclopœdia Britannica: “Say ‘liket’ so sakey ed sankairapan a talosan iran salita.” Say liket so mapatnag a mankabaliksan na nanduruman bengatla ed nanduruman totoo, a dependi ed panmoria ra ed bilay.
2 Parad dakel a totoo say liket so onliber ed maabig a bunigas, materyal a kaykayarian, tan marakep a piuulop. Ingen, walara so totoon walaan na amin na atan balet ta sikaray agmaliket. Parad lalaki tan bibii a dedikado ed si Jehova a Dios, say Biblia so mangitarok na ideya na liket a duman tuloy manlapud karaklan a panmoria.
Duman Panmoria ed Liket
3, 4. (a) Siopa so inyabawag nen Jesus a maliket? (b) Anto so naimano no nipaakar ed saray sengegan na liket a binitla nen Jesus?
3 Diad Sermon to ed Palandey, ag-imbaga nen Jesu-Kristo a say liket et mandependi ed maabig a bunigas, materyal a kaykayarian, tan mipadpara. Inyabawag to a tuan maliket iramay “mapaga ed espiritual a pankaukolan da” tan saraman so “narasan tan napgaan ed inkatunong.” Mitukoyan ed sarayan duaran sengegan a kakaukolanen parad tuan liket et say kuanmono mansumlangan a balikas nen Jesus: “Maliket iramay mannangis, ta sikara so naligliwa.” (Mateo 5:3-6) Mapatnag, ag-ibabaga nen Jesus a saray tototo so otomatikon magmaliw a maliket sano nabalang da so inadaro ra. Imbes, sasalitaen to so nipaakar ed saraman so mannangis ed makasalanan a kipapasen da tan saray pansumpalan to.
4 Sinalita nen apostol Pablo so atooan a pinalsa a maningel ed leksab na kasalanan ed basiyan na ilalo a “nibulos manlapud inkaaripen na inkabulok.” (Roma 8:21, 22) Saray totoon mangawat ed mananakbong-kasalanan a probisyon nen Jehova diad panamegley na dondon bagat nen Kristo tan manggawa ed linawa na Dios so peteg a naligliwa tan napaliket. (Roma 4:6-8) Diad Sermon ed Palandey, inyabawag met nen Jesus a maliket “iray mauyamo,” “say mapangasi,” “say maralus ed puso,” tan “say managpareen.” Inter to so panamaseguro ya anggaman napasegsegang, saratan a mauyamo so agmakabalang ed liket da. (Mateo 5:5-11) Makapasagyat a naimano a sarayan nipaatagey a sengegan na liket so mangipasen ed mayaman tan duruka a parapara.
Say Basiyan na Tuan Liket
5. Anto so basiyan parad liket na dedikadon ariripen na Dios?
5 Say lapuan na tuan liket so agnaromog ed materyal a kayamanan. Inkuan nen makabat ya Arin Solomon: “Say bendisyon nen Jehova—atan so makapayaman, tan sikato so agmangarum na ermen.” (Uliran 10:22) Parad saray pinalsan mamidbir ed sankatalbaan ya inkasoberano nen Jehova, say liket so lawas misiglaotan ed panamendisyon na Dios. Say dedikadon too a walaan tan manlikna na panamendisyon nen Jehova ed sikato so tuan maliket. Diad Biblikon panmoria, lalanoren na liket so liknaan na inkakontento, inkapnek, tan panumpal ed panaglingkor ed si Jehova.
6. Anto so nakaukolan ed totoo nen Jehova pian sikara so magmaliw a tuan maliket?
6 Say tuan liket so mandepende ed suston siglaotan ed si Jehova. Nibase itan ed panangaro ed Dios tan katooran ed sikato. Saray dedikadon ariripen nen Jehova so sigpot-puson mikasakey ed saray salita nen Pablo: “Diad tua, anggapo ed sikatayo, so manbilay ya onkana ed sikaton dili lambengat . . . Manbilay itayo ya onkana ed si Jehova . . . Kien itayo nen Jehova.” (Roma 14:7, 8) Sirin, say tuan liket so agnagamoran nilikud ed itutulok ed si Jehova tan magayagan pampasakup ed linawa to. Inkuan nen Jesus: “Maliket iraman so ondengel ed salita na Dios tan onuren itan!”—Lucas 11:28.
Manguman-uman Iran Sengegan na Liket
7, 8. (a) Panon a nayarin ibiig iray sengegan na liket? (b) Anto so nibaga nipaakar ed panangasawa tan panag-ilalak?
7 Saratan ya akaunan sengegan na liket so nayarin natawag a “saray manunaan,” odino “saray agnasalatan,” lapud sikara so makana parad dedikadon ariripen nen Jehova ed amin a panaon. Niarum ni, walara so natawag a saray manguman-uman, saray sengegan a nayarin mansumpal ed liket ed sakey a panaon balet ta daiset odino anggapo itan ed sananey. Diad saray patriarka tan sakbay-Kristianon panaon, say panangasawa tan panag-ilalak so impasen a nakaukolan a tuloy parad liket. Saya so niparungtal ed mapekder a kerew nen Racquel ed si Jacob: “Ikdan moak na na anak tano andi ompatey ak.” (Genesis 30:1) Sayan awawey ed panag-ilalak so matukoy ed gagala nen Jehova ed saman a panaon.—Genesis 13:14-16; 22:17.
8 Say panangasawa tan panag-ilalak so impasen ya inter-Dios iran bendisyon ed limog na totoo nen Jehova ed asasakbay iran panaon. Anggaman ontan, say gonigon so konektado ed saraya tan arum iran kipapasen legan na mapeligron panaon ed awaran da. (Ipareng so Salmos 127, 128 ed Jeremias 6:12; 11:22; Tagleey 2:19; 4:4, 5.) Mapatnag sirin a say panangasawa tan panilalak so aliwan permanenten sengegan-na-liket.
Liket Anggaman Andian-na-Asawa Nensaman
9. Akin a say ilalak a bii nen Jepte so tinaon a mangaawat na komendasyon?
9 Dakel ed saray ariripen na Dios so akaromog na tuan liket anggaman andian-na-asawa. Nisesengeg ed pamagalang ed sipan nen ama to, say anak a bii nen Jepte so nansiansian walad kasulowan. Sikato tan saray kaiba ton bibii so nannangis ed inkamarikit to ed pigaran panaon. Balet agaylan gayaga so niwala ed sikato diad sigpot-panaon a panaglingkor ed abung nen Jehova, angangko ed limog na “saray bibiin ariripen a nanggawa na organisadon panaglingkor ed pinto na tulda na doypo”! (Exodo 38:8) Nisengeg ed saya, sikato so tinaon a mangaawat na komendasyon.—Uko-ukom 11:37-40.
10. Anto so kinaukolan nen Jehova ed si Jeremias, tan kasin ompatnag a sikato so agmaliket a nambilay bilang nansumpalan?
10 Lapud dramatikon panaon a nambilayan nen propeta Jeremias, kinaukolan na Dios a sikato so mamokpok ed pangasawa tan panilalak. (Jeremias 16:1-4) Balet naeksperiensia nen Jeremias so katuaan na saray salita na Dios: “Mapalar so too a manmatalek ed si Jehova, tan say ilalo to sikato si Jehova.” (Jeremias 17:7) Diad loob na masulok ya 40 taotaon na mapropetikon lingkor, sitotoor a nanlingkor si Jeremias ed Dios a bilang lakin walad kasulowan. Diad saray limitasyon na pikakabat tayo, sikato so agbalot angasawa tan nanilalak. Ingen, siopa so makapanduaruwa a maliket si Jeremias, a singa say matoor a Judion nakdaan a ‘nagmaliw a maliket ed kamaongan nen Jehova’?—Jeremias 31:12.
11. Sioparay arum a Makasulatan ya ehemplo na matoor iran ariripen nen Jehova a maliket anggaman anggapo so asawa ra?
11 Dakel nin arum a totoo so nanlingkor a sigagayaga ed si Jehova ya andian na asawa. Sikara so balanglan walad kasulowan, odino balo. Saratan et di propetesan Ana; nayarin si Dorcas, odino Tabita; si apostol Pablo; tan say sankabalgan ya ehemplo ed amin—si Jesu-Kristo.
Walad Kasulowan balet Maliket Natan
12. Diad anto so angitalagaan na saray arum a maliket, dedikadon ariripen nen Jehova natan, tan akin?
12 Natan, nilibon Tastasi nen Jehova so sitotoor a manlilingkor ed Dios ya andian na asawa. Arum so akayarin angawat ed imbitasyon nen Jesus: “Say makayarin mangawat ed [langkap na kasulowan] awaten to itan.” Ginawa da iya “nisesengeg ed panarian na katawenan.” (Mateo 19:11, 12) Salanti, inusar dan maong so inter-Dios a kawayangan da diad pangidedeboto na malaglaem a panaon tan sagpot ed pangiyalibansa na intereses na Panarian. Dakel ed sikara so manlilingkor a bilang payunir, misionero, odino membro na pamilya na Bethel diad sankamundoan a hedkuarter na Watch Tower Society odino diad sakey ed saray sanga to.
13. Anto iray alimbawan mangipanengneng a say sakey a Kristiano so nayarin walad kasulowan tan maliket?
13 Sakey ya inadaron matatken lan agin bii so angiter na estorya ed impanbilay to diad manangipaamtan paulon “Single and Happy as a Pioneer.” (The Watchtower, Mayo 1, 1985, pahina 23-6) Sananey nin walad kasulowan ya agin bii ya angusar na masulok a 50 taon a panaglingkor ed Bethel so angikuan: “Siak so sigpot a napnek ed bilay ko tan kimey ko. Siak so mas okupado natan nen diad apalabas diad kimey ya inararok a tuloy. Agak magbabawi. Gawen ko so parehon desisyon lamet.”—The Watchtower, Hunyo 15, 1982, pahina 15.
14, 15. (a) Unong ed si apostol Pablo, anto so nakakaukolan ta pian mansiansian walad kasulowan? (b) Akin ya inkuan nen Pablo a say walad kasulowan so “magmaong” tan “mas maliket?”?
14 Imanoen itan a salitan “desisyon.” Insulat nen Pablo: “No siopaman et mabiskeg ed puso to, ya andian na pankaukolan, balet walaan na pakauley ed linawa ton dili tan ginawa to iyan desisyon ed puso ton dili, pian pansiansiaen so inkamarikit to, maong so gawaen to. Ontan met saman so mangiter ed inkamarikit to diad piasawa et maong so gawaen to, balet saman so agmangiter ed atan diad pangasawa et magmaong so gawaen to.” (1 Corinto 7:37, 38) Akin a “magmaong”? Insalaysay nen Pablo: “Labay ko a bulos kayo ed kapagaan. Say lakin andian na asawa so mapaga ed saray kien na Katawan, no panon ton nagamoran so abobon na Katawan. . . . Niarum ni, say biin andian na asawa, tan say marikit, so mapaga ed saray kien na Katawan . . . Balet salitaen ko iya parad personal a pankaabigan yo, . . . pian ipaarap kayo ed saman so makapaliket tan saman so mankabaliksan na maparanay a panaglingkor ed Katawan ya agnasigensigen.”—1 Corinto 7:32-35.
15 Kasin “say maparanay a panaglingkor ed Katawan ya agnasigensigen” tekep na panmoria ed ‘pakagamor na abobon na Katawan” so misiglaotan ed liket? Mapatnag ya ontan so kanonotan nen Pablo. Totongtongen so nipaakar ed Kristianon balo, inkuanto: “Sikato so bulos a miasawa ed labay to, dia lambengat ed Katawan. Balet sikato so lalon maliket no sikato so mansiansian ontan, unong ed isip ko. Tan isip ko a wala met ed siak so espiritu na Dios.”—1 Corinto 7:39, 40.
Saray Bentaha na Andian na Asawan Kipapasen
16. Antoray arum a bentahan nangayagaan na andian na asawan Tastasi nen Jehova?
16 Balanglan say Kristiano et walad kasulowan diad personal a desisyon odino diad kapilitan na saray sirkumstansya, say andian na asawan kipapasen so mangitarok na dakel iran personal a bentaha. Mas dakel so panaon na walad kasulowan a totoo a manaral na Salita na Dios tan dalepdepen itan. No anamoten da iyan sirkumstansya, onaralem so espiritualidad da. Lapud anggapo so asawan pangibiangan na saray problema ra, naaralan na dakel so onsaral a nagkalalo ed si Jehova tan anapen so panangiwanwan to ed amin a bengabengatla. (Salmo 37:5) Saya so ontulong a mangitarok na mas maapit a siglaotan ed si Jehova.
17, 18. (a) Antoran pankanawnawa parad sakey ya apalaknab a lawak na serbisyo so wala parad ariripen nen Jehova ya andian na asawa? (b) Panon na arum ya andian na asawan ariripen nen Jehova so aneskribe ed liket da?
17 Saray andian na asawan Kristianos so walaan na saray pankanawnawa parad malaknab a lawak a serbisyo diad kirayewan nen Jehova. Say espesyal a panangipasal a niiiter ed Eskuelaan na Ministeryal a Panangipasal so limitado ed walad kasulowan iran agagin lalaki odino saray balo. Saray walad kasulowan ya agagin bibii so mas bulos a mandampot ed saray pribilehyo ed panaglingkor ed Dios. Say matatken lan agin bii ya asaglawi ed akadkauna so nanboluntaryon manlingkor ed sakey a bansa ed Aprika sanen, diad pangaon ed inkuanto, sikato so “mabeblay a bii a manedad la na masulok a 50 taon.” Tan sikato so nansiansia diman, anggan legan na pananebel, sanen amin na saray misionero so pinataynan. Sikato nin siansia so manlilingkor diman a bilang payunir, anggaman sikato la natan so masulok a 80 taon. Kasin sikato so maliket? Diad salaysay na bilay to et insulat to: “Nausar ko so malaem a kawayangan tan inkamabulos ya ipabtang na kasulowan pian mansiansian okupado ed ministeryo, tan saya so angitarok ed siak na baleg a liket. . . . Diad loob na saray taon inmaralem so siglaotan ko ed si Jehova. Bilang sakey a walad kasulowan a bii ed sakey a bansa ed Aprika, sikato so anengneng ko bilang sakey a Mananalimbeng.”
18 Makatantanda, met, iray salita na agin laki a nanlingkor ed saray hedkuarter na Watch Tower Society ed loob na saray dekada. Sikato so maliket, anggaman agton balot angasawa tan ingen et sikato so walaan na mangatatawen ya ilalo ya andian na ilalon mangasawa. Diad edad a 79, insulat to: “Inagew-agew ya onkekerew ak ed maaron mangatatawen ya Ama diad pikakasi na tulong tan kakabatan pian mansiansia ak a mabunigas tan mabiskeg ed espiritual tan ontan met ed pisikal ta pian makapantultuloy ak a manggawa na masanton linawa to. Legan na sarayan apalabas ya apataplo-tan-siam a taotaon ed panaglingkor ed si Jehova peteg a nangayagaan ko so liket, makatumang tan abendisyonan a dalan na panagbilay. Tan tekep na agkanepegan a panangasi nen Jehova maniilaloak ed mantultuloy a serbisyo diad kagalangan tan gloria to tan ed panamendisyon ed totoo to. . . . [Say] gayaga nen Jehova so ontutulong ed siak pian mansiansia ed maabig a pibabakal ed pananisia, a maniilalo ed panaon sano saray kakabusol nen Jehova so naandi la tan amin a dalin so napano na gloria to.”—Numeros 14:21; Nehemias 8:10; The Watchtower, Nobyembre 15, 1968, pahina 699-702.
Anto so Pandependian na Tuan Liket?
19. Diad anto so lawas pandependian na liket tayo?
19 Say mablin relasyon tayo ed si Jehova, say abobon to, tan panamendisyon to—saraya so sengegan a mangitarok ed sikatayo na tuan liket ed ando lan ando. Say kiwala na sayan dugan panmoria ed no anto so mamawala na puron liket et anggan saray ariripen nen Jehova a walaan na asawa so makamoria a say panamaley da so aliwan sankaimportantian a bengatla ed saray bilay da. Tutumboken da so simbawa nen apostol Pablo: “Saya kuanko, agagi, ta say panaon a natitilak so apatikeyan la. Kanian manlapu ed natan saramay lalakin walaan na asawa magmaliw ira komon a singa andian na asawa.” (1 Corinto 7:29) Agkabaliksan na saya ya ikaindan daray asawa ran bibii. Saray matatken a Kristianon kaasawaan a lalaki tan ontan met ed maridios, maaro, tan matulong a kaasawaan dan bibii, so mangiyuuna ed serbisyo nen Jehova, arum ni ingen so manlilingkor a sigpot-panaon a bilang kaulop na saray kaasawaan dan lalaki.—Uliran 31:10-12, 28; Mateo 6:33.
20. Anton dugan awawey so wala ed dakel iran Kristianos nipaakar ed saray pribilehyo ra ed panangasawa?
20 Saray agagin lalakin walaan na asawa a managbiahen manangasikaso, boluntaryo ed Bethel, mamatatken ed kongregasyon—on, amin na saray Kristianos a walaan na asawa a mangiyuuna ed intereses na Panarian—so peteg ya ag ‘manguusar a nagnap ed mundo’; mankikimey ira a mangitukoy ed saray pribilehyo na panamaley da diad dedikadon bilay da ed serbisyo ed si Jehova. (1 Corinto 7:31) Ingen, sikara so maliket. Akin? Lapud say matalonan rason parad liket da et aliwan say panamaley da noagta say panaglingkor da ed si Jehova. Tan dakel iran matoor a kaasawaan a lalaki tan bibii—on, pati ed ananak da—et maliket a saray bengatla so onia.
21, 22. (a) Diad basiyan na Jeremias 9:23, 24, anto so nepeg a mamano ed sikatayo na liket? (b) Antoran sengegan na liket so abitla ed Uliran 3:13-18?
21 Insulat nen propeta Jeremias: “Onia so kuan nen Jehova: ‘Say makabat a too agkomon manpasirayew ed kakabatan to, tan say mabiskeg a too agkomon manpasirayew ed inkabiskeg to. Say mayaman a too agkomon manpasirayew ed kayamanan to. Noag ingen say manpasirayew ed inkasikato so manpasirayew komon ed sayan mogmon bengatla, say walaan na pakatalos tan pikakabat ed siak, a siak si Jehova, say Sakey a mangaagamil na maaron-kaabigan, inkahustisya tan inkatunong dia ed dalin; ta diad sarayan bengatla a manliket ak,’ kuan nen Jehova.”—Jeremias 9:23, 24.
22 Balanglan sikatayo so walad kasulowan odino walaan na asawa, say sankabalgan a lapuan na liket tayo et say pikakabat ed si Jehova tan say mabiskeg a pananisia a walaan itayo na panamendisyon to lapud gagawaen tayo so linawa to. Maliket itayo met a nawalaan na pakatebek ed no anto iray manugyop ed tuan sukatan na saray prinsipyo, saray bengatlan pangayagaan nen Jehova. Si Arin Solomon a walaan na dakel ya asawa so ag-angipasen ed panangasawa a mogmon tombok na liket. Inkuanto: “Maliket so toon makaromog na kakabatan, tan say too a makagamor na pakatalos, ta say pakagamor ed sikato so magmaong nen say pakagamor ed pilak tan say pinabangan ed sikato magmaong nen say dalisay a balitok. Atan so mamabli nen saray rubi, tan anggapo ed saray bengatla a napanpilalekan mo so makapipara ed sikato. Say karukey na saray agew wala ed kawanan a lima to; dia ed kawigi a lima to wala so saray kayamanan tan dayew. Saray dalan to sikara so dalan a makapaliket, tan amin iray basbas to sikara so deen. Sikato so sakey a kiew na bilay ed saray ompeket ed sikato, tan mapalar so balang sakey a mamenben ed sikato.”—Uliran 3:13-18.
23, 24. Akin a makapanseguro itayo ya amin a matoor ya ariripen nen Jehova so magmaliw a maliket ed balon sistema na bengabengatla?
23 Komon ta saraman so walaan na asawa ed sikatayo so makaromog na maandon gayaga ed panggawa na madibinon linawa. Tan komon ta saray inadaron agagi tayon lalaki tan bibii a walad kasulowan diad impanpili odino diad kapilitan na saray sirkumstansya so mansungdo ed amin na saray subok da tan makaromog na liket tan inkakontento diad panaglingkor ed si Jehova natan tan diad ando lan ando. (Lucas 18:29, 30; 2 Pedro 3:11-13) Diad onsasabin sistema na bengabengatla na Dios, “saray lukot” so nalukasan. (Apocalipsis 20:12) Saraya so mankarga na makapasagyat a balo iran ganggan tan totontonen a mamawala na liket ed matulok a katooan.
24 Maseguron, walaan tayo na talek a say “maliket a Dios” tayo so angiparaan parad sikatayo na makapakelaw iran maabig a bengabengatla a mansumpal ed kumpleton liket tayo. (1 Timoteo 1:11) Itultuloy na Dios a ‘lukasan so lima to tan peneken so pilalek na amin a bengatlan mabilay.’ (Salmo 145:16) Agpankelawan a wala tan lawas a wala so tuan liket diad panaglingkor ed si Jehova.
Panon so Pangebat Yo?
◻ Anto so basiyan ed liket na dedikadon ariripen nen Jehova?
◻ Diad panaon na Biblia, siopara so arum a maliket ya andian na asawan ariripen nen Jehova?
◻ Akin ya irekomenda nen Pablo so kasulowan, tan panon ya aromog na arum iran Kristianos iya a maliket a bilay?
◻ Diad anto so lawas pandependian na liket tayo?
◻ Akin a nepeg itayon matalek ya amin iray matoor diad balon sistema na bengabengatla so magmaliw a maliket?
[Litrato ed pahina 14]
Dakel iran walad kasulowan ya agagin bibii so maliket a manlilingkor ed si Jehova a bilang sigpot-panaon iran ministros
[Litrato ed pahina 16]
Say panlingkor ed intereses nen Jehova so manunan lapuan na liket