Kasin say Panangasawa so Mogmon Tombok na Liket?
“Sikato so bulos a miasawa ed siopaman a labay to, dia lambengat ed Katawan. Balet sikato so mas maliket no sikato so mansiansian ontan.”—1 CORINTO 7:39, 40.
1. Panon so paneskribre na Kasulatan ed si Jehova, tan anto so walan ginawa to parad saray pinalsa to?
SI Jehova so “maliket a Dios.” (1 Timoteo 1:11) Bilang say Mabunlok a Manangitarok na “amin a maong a palangkap tan amin ya ayadyarin palangkap,” itatarya to parad amin ya intelehentin palsa to—katooan tan espiritu—so mismon pankaukolan da pian magmaliw a maliket ed lingkor to. (Santiago 1:17) Nipaakar ed atan, say magayagan manok a mankakanta, mansayandak ya oken, odino sakey a mankulabbiang a dolphin so mantasin amin a si Jehova so amalsa ed ayayep pian pangayagaan so bilay ed dilin panaayaman da. Say salmista so maanlong ni ingen ya angikuan “saray kiew nen Jehova so napno na tabol, saray cedros na Lebanon ya intanem to.”—Salmo 104:16.
2. (a) Anto so mangipanengneng ya aromog nen Jesus so liket ed panggawa na linawa nen Ama to? (b) Antoran katunongan parad liket so wala ed saray babangatan nen Jesus?
2 Si Jesu-Kristo so ‘eksakton representasyon na inka-Dios.’ (Hebreos 1:3) Sirin, agpankelawan, a si Jesus so nepeg a natawag a “maliket tan saksakey a Makapanyari.” (1 Timoteo 6:15) Itarok to ed sikatayo so makapakelaw ya alimbawa no panon a say panggawa ed linawa nen Jehova so mas makapnek nen say tagano, a mamawala na sigpot a liket. Impanengneng met nen Jesus ed sikatayo a wala so liket sano onkiwas ed itatakot ed Dios, salanti, tekep na galang tan mabunigas a takot ed pamaermen ed Sikato. (Salmo 40:8; Isaias 11:3; Juan 4:34) Sanen pinmawil iray 70 babangatan a “tekep na gayaga” kayari na panagpulong-na-Panarian ya impanbaroy, si Jesus a mismo so “aliketan a tuloy ed masanton espiritu.” Kayari impangibalikas to na gayaga ed Ama to diad pikakasi, binmaling ed saray babangatan to tan inkuanto: “Maliket iray mata a makanengneng ed saray nanenengneng yo. Ta kuanko ed sikayo, Dakel a propetas tan arari so nankaliktan a nengnengen iray bengatlan nanenengneng yo balet agda ra anengneng, tan dengelen iray bengatlan dedengelen yo et agda ra nadngel.”—Lucas 10:17-24.
Saray Katunongan a Magmaliw a Maliket
3. Antoray arum a katunongan parad liket?
3 Agta saray mata tayo et maliket a makanengneng ed bengabengatlan nanenengneng tayo diad kasumpalan na Salita nen Jehova tan saray gagala to diad sayan panaon na anggaan? Agta sikatayo so mangayaga a natalosan iray propesiya ya agnatebek na saratan a matoor a propeta tan arari a singa si Isaias, Daniel, tan David? Agta naligliwa itayo a manlingkor ed maliket a Dios, si Jehova, diad silong na panangipangulo na maliket a Makapanyari, say Ari tayon Jesu-Kristo? Siempre!
4, 5. (a) Pian mansiansian maliket diad panaglingkor ed si Jehova, anto so nepeg a paliisan tayo? (b) Antoray arum a bengatlan mamawala na liket, tan anton tepet so palesaen na saya?
4 Anggaman ontan, no labay tayo so mansiansian maliket diad panaglingkor ed Dios, nepeg ya agtayo ibase iray kakaukolanen na liket ed minumundon kanonotan. Saraya so magmainomay a mamabilunget ed kanonotan tayo lapud laktipen daray materyal a kayamanan, say mapasirayew ya estiloy-panagbilay, tan mipadpara. Antokaman a “liket” a niletneg ed saratan a bengatla so agmanbayag, ta sayan mundo so mangangga.—1 Juan 2:15-17.
5 Karaklan ed dedikadon ariripen nen Jehova so akamoria a say pakadampot ed minumundon kalat so agmangitarok na tuan liket. Say mangatatawen lambengat ya Ama tayo so mangitatarok na espiritual tan materyal iran bengatla a mamawala na puron liket ed ariripen to. Agaylay pisalamat tayo ed espiritual a taganon iiter to ed sikatayo diad panamegley na “matoor tan makabat ya aripen”! (Mateo 24:45-47) Misalamat tayo met ed pisikal a tagano tan arum iran materyal a bengatlan nanaawat tayo manlapud maaron lima na Dios. Insan, wadtan met so makapakelaw a regalo na panangasawa tan mitukoyan iran gayaga ed bilay na pamilya. Agpankelawan a say impapuson pirawat nen Noemi parad saray abalon manugang to so nibalikas ed sarayan salita: “Manggawa komon si Jehova na langkap ed sikayo, tan makaromog kayo komon na painawa balang sakey ed sikayo dia ed abung na asawa to.” (Rut 1:9) Kanian say panangasawa so sakey a tombok a mangilukas na puerta ed baleg a liket. Balet kasin say panangasawa so mogmon tombok a mangilukas ed pinto na maliket a bilay? Saray tobonbalo so nagkalautlan nakaukolan a seryoson mangusisa no kasin saya et tua.
6. Unong ed Genesis, anto so manunan gagala na uksoyan ed panangasawa?
6 Diad pangisalaysay ed gapoan na panangasawa, ikuan na Biblia: “Pinalsa na Dios so too ed indengan to, diad indengan na Dios a sikato so pinalsa to; say laki tan say bii pinalsa to ra. Et say Dios binendisyonan to ra tan inkuan na Dios ed sikara: ‘Manbunga kayo tan ondakel kayo tan panoen yo so dalin tan patuloken yo.’” (Genesis 1:27, 28) Diad panamegley na impangiletneg nen Jehova na panangasawa, si Adan so nausar a mangitarok na dakel ya atooan a pinalsa ed kiwawala, sirin palaknaben so atooan a rasa. Balet wala so nagkalalo ni nen say saya diad panangasawa.
“Dia Lambengat ed Katawan”
7. Anton pankaukolan ed panangasawa so nanggunaetan a sinumpal na sakey a matoor a patriarka?
7 Lapud si Jehova a Dios so Manangigapo ed panangasawa, ilaloan tayo a sikato so mangiletneg na saray estandarte ed panasawa a mansumpal ed panliketan na ariripen to. Diad saray panaon na patriarka, say pangasawa ed saraman so agmandadayew ed si Jehova so mabiskeg a tuloy a dinismaya. Impansamba nen Abraham si Eliezer ya aripen to ed si Jehova ya agto mangaala na bii parad si Isaac ya ilalak na patriarka manlapud saray Canaaneo. Andukey so impanbaroy nen Eliezer tan mapeget a tinmumbok ed saray bilin nen Abraham ta pian anapen so ‘biin impabtang nen Jehova parad ilalak na katawan to.’ (Genesis 24:3, 44) Kanian inasawa nen Isaac si Rebeca. Sanen nanpili so anak dan Esau na asawan bibii ed limog na paganon Hiteo, sarayan bibii “so sengegan na kapaitan ed espiritu nen Isaac tan Rebeca.”—Genesis 26:34, 35; 27:46; 28:1, 8.
8. Anton panameget so nipaakseb ed panangasawa diad panamegley na Ganggan a sipanan, tan akin?
8 Diad silong na Ganggan a sipanan, insebel so pangasawa ed lalaki o bibiin kabiangan na espesipikon Canaaneon nasyones. Binilin nen Jehova so totoo to: “Agka miaasawa ed sikara naani. Agmo iiter naani bii ya anak mo ed laki ya anak to, tan agka naani mangaala na bii ya anak to ya iyasawa ed laki ya anak mo. Ta pabenegen to so anak mo diad itutumbok ed siak, tan manlingkor ira naani ed sananey a dirios; dia ed atan ondalang naani sanok nen Jehova ed sikayo et tampol a deralen to kayo.”—Deuteronomio 7:3, 4.
9. Anton simbawa ed panangasawa so iter na Biblia ed saray Kristianos?
9 Agpankelawan a saray parehon panameget diad pangasawa ed saraman so agmandadayew ed si Jehova so nepeg ya onaplika ed limog na Kristianon kongregasyon. Insimbawa nen apostol Pablo ed kapara toran mananisia: “Agkayo miulop ed pako a duma na saray agmananisia. Ta anto so piulopan na katunongan ed kaugsan? Odino anto so piulopan na liwawa ed bilunget? Tan, anto so pinunongan nen Kristo ed si Belial? Odino anto so pinabangan na mananisia ed agmananisia?” (2 Corinto 6:14, 15) Onaplika itan a konseho ed nanduruman dalan tan peteg ya onaplika ed panangasawa. Say pihon bilin nen Pablo ed amin a dedikadon ariripen nen Jehova et nepeg dan kunsideraen ya asawaen so sakey “no sikato lambengat so mikasakey ed Katawan.”—1 Corinto 7:39, paimanod-leksab.
Agmakapangasawa “diad Katawan”
10. Anto so gagawaen na dakel iran andian na asawan Kristianos, tan anton tepet so onlesa?
10 Pinili na dakel iran walad kasulowan a Kristianos so ontumbok ed ehemplo nen Jesu-Kristo diad pamayubo ed langkap na kasulowan. Insan lamet, lapud diad kaplesan et agmakaromog na sakey a matakot-ed-Dios a kapareha tan makapangasawa “diad Katawan,” dakel iran matoor a Kristianos so angipasen na talek da ed si Jehova tan nansiansian walad kasulowan imbes a mangasawa na agmananisia. Itarok na espiritu na Dios ed sikara iray bunga a singa gayaga, deen, pananisia, tan dangka, a nanggawa ed sikaran mansiansian walad kasulowan. (Galacia 5:22, 23) Diad limog na saraman so sitatalonan makakadampot ed sayan subok na debosyon ed Dios so baleg a bilang na agagi tayon Kristianon bibii, a walaan itayo na aralem a galang parad sikara. Diad nanduruman daldalin, palumbasan da so bilang na agagin lalaki tan sirin walaan na baleg a pibibiang ed panagpulong a kimey. Peteg, a “si Jehova iter to a mismo so salita; saray bibii a mangipapaamta na maong a balita so sakey a balbaleg ya ulop.” (Salmo 68:11) Diad tua, dakel ya andian-na-asawan ariripen na Dios ed namparan sekso so makapansiasiansian matoor lapud ‘manmamatalek [ira] ed si Jehova ed amin a puso ra, tan sikato so mangitotonton ed saray basbas da.’ (Uliran 3:5, 6) Balet kasin saraman so agmakapangasawa ed kaplesan “diad Katawan” so maseguron magmaliw ya agmaliket?
11. Diad anto a napaseguroan iray Kristianos a mansiansian walad kasulowan nisesengeg ed saray prinsipyo na Biblia?
11 Nepeg tayon tandaan a sikatayo so Tastasi na maliket a Dios, si Jehova, a manlilingkor ed silong na maliket a Makapanyari, si Jesu-Kristo. Kanian no say panrespeto tayo ed saray panameget a malinlinew a nidatak ed Biblia so mamakiwas ed sikatayon mansiansian walad kasulowan lapud agmakaromog na asawaen “diad Katawan,” kasin makatunongan ya isipen a say Dios tan si Kristo so mangitalirak ed sikatayon manermen? Seguradon andi. Kanian, nibaga tayo a posiblin magmaliw a maliket bilang Kristianos legan a walad andian-na-asawan kipapasen. Peteg a napaliket itayo nen Jehova balanglan sikatayo so walaan na asawa o walad kasulowan.
Say Tombok na Tuan Liket
12. Anto so ipanengneng na kipapasen na saray matungangan angheles no nipaakar ed panangasawa?
12 Say panangasawa so aliwan mogmon tombok na liket parad amin ya ariripen na Dios. Alaen ya alimbawa iray angheles. Sakbay na Delap, arum iran angheles so amayubo na saray pilalek ya agnatural parad saray espiritun pinalsa, nagmaliw ya agnapnek ed agda pakaasawa, et sikaray nankinon-too ta pian mangala na bibii bila g kaasawaan. Lapud sarayan angheles et “tinaynan da so dilin manepeg a pasen ya ayaman,” say Dios “so angigana [ed sikara] ed andi-anggaan ya inkabalor ed silong na kabilungetan parad panangukom na baleg ya agew.” (Judas 6; Genesis 6:1, 2) Malinew, agbalot inyarunsa na Dios a mangasawa iray angheles. Kanian say panangasawa so agnayarin tombok parad liket da.
13. Akin a saray masanton angheles et maliket, tan anto so ipatnag na saya parad amin ya ariripen na Dios?
13 Ingen, saray matoor ya angheles so maliket. Inletneg nen Jehova so pundasyon na dalin “diad magayagan kanta na bibitewen ed kabuasan tan ed nankakasakey ya eyag na [anghelikon] ananak na Dios.” (Job 38:7, The New Jerusalem Bible) Akin a saray masanton angheles so maliket? Lapud sikara so maparanay a walad arap nen Jehova a Dios, “ya ontatalineng ed boses na salita to” ta pian gawaen itan. Pangagayagaan dan “gawaen so panliketan to.” (Salmo 103:20, 21, paimanod-leksab) On, say liket na masanton angheles so manlapud panlingkor a sitotoor ed si Jehova. Atan so tombok na tuan liket parad katooan met. Nisengeg ed atan a pamaakaran, saray sililiket a manlilingkor iran alanaan a Kristianon walaan na asawa natan so agmangasawa sano napaoli ed mangatatawen a bilay, balet sikara so manliket bilang espiritun pinalsa a manggawa na madibinon linawa. Sirin, balanglan walaan na asawa o walad kasulowan, amin a matoor iran ariripen nen Jehova so makapanliket lapud say tuan basiyan na liket et say matoor a panaglingkor ed Manamalsa.
“Bengatlan Magmaong Nen Saray Anak a Lalaki tan Anak a Bibii”
14. Anton mapropetikon sipan so niiter ed maridios iran eunoko ed kadaanan ya Israel, tan akin ya ompatnag iyan nikadkaduma?
14 Anggano say sakey a matoor a Kristiano so agbalot mangasawa, atan a sakey so paseguroan na Dios na liket. Naala so panamaseseg ed sarayan balikas a mapropetikon nipaarap ed saray eunoko ed kadaanan ya Israel: “Ta onia so kuan nen Jehova ed saray eunoko a manngilin ed saray agew ko a sabaton tan amili ed saray bengatlan makapaliket ed siak tan mangawalo ed sipan ko: ‘Mangiter ak ni ingen naani ed sikara diad abung ko tan dia ed dalem na saray bakor ko na sakey a pakanodnonotan tan sakey a ngaran, bengatlan magmaong nen saray anak a lalaki tan anak a bibii. Ikdan ko ra naani na sakey a ngaran ya agnapegpeg diad ando lan ando.’” (Isaias 56:4, 5) Nayarin ilaloan na sakey a sarayan sinansakey et asipanan a nawalaan na asawan bii tan ananak a mamasiansia ed ngaran da. Balet nisipan ed sikara so “bengatlan magmaong nen saray anak a lalaki tan saray anak a bibii”—maandon ngaran ed loob na abung nen Jehova.
15. Anto so nayarin nibaga nipaakar ed kasumpalan na Isaias 56:4, 5?
15 No sarayan eunoko et akunsidera a bilang propetikon retrato a mangilalanor ed “Israel na Dios,” irepresenta ra iray alanaan a mangawat na maandon pasen ed loob na espiritual ya abung nen Jehova, odino templo. (Galacia 6:16) Agpanduaruwaan, a sayan propesiya so nawalaan na literal ya aplikasyon ed maridios iran eunoko na kadaanan ya Israel a napaoli. No awaten da so dondon bagat nen Kristo tan mantultuloy a pilien no anto so makapaliket ed si Jehova, naawat da so “sakey a ngaran ed ando lan ando” diad balon mundo na Dios. Onaplika met iya ed saraman so “arum a karnero” diad sayan panaon ya anggaan ya angitalirak ed pangasawa tan inkaateng ta pian italaga so inkasikara ed lalon nagnap a panaglingkor ed si Jehova. (Juan 10:16) Nayarin arum ed sikara so ompatey ya andian na asawa tan andian na anak. Balet no sikara so matoor, diad kioli et awaten da so “bengatlan magmaong nen saray anak a lalaki tan anak a bibii”—sakey a ngaran “ya agbalot napegpeg” diad balon sistema na bengabengatla.
Say Panangasawa so Agmogmon Tombok na Liket
16. Akin a nibaga a say panangasawa et aglawas mangitarok na liket?
16 Liknaen na arum a totoo a say liket et misiglaotan a tuloy ed panangasawa. Anggaman ontan, nepeg ya aksobien ya anggan diad limog na saray ariripen nen Jehova natan, a say panangasawa et aglawas mangitarok na liket. Resolbien toray arum a problema balet mabetbet a sengegan so saray arum a mas mairap a pidenengan nen say saraman so naeksperiensia na walad kasulowan a totoo. Inkuan nen Pablo a say panangasawa so mangitarok na ‘kairapan ed laman.’ (1 Corinto 7:28) Walara so panaon sano say walaay asawa so “mapaga” tan “naapag.” Mabetbet a naromog to a mairap so “panlingkor a maparanay ed Katawan ya agnasigensigen.”—1 Corinto 7:33-35.
17, 18. (a) Anto so inreport na arum iran managbiahen manangasikaso? (b) Anton simbawa so inter nen Pablo, tan akin a makagunggunan iyaplika itan?
17 Namparan say panangasawa tan kasulowan so langkap manlapud Dios. (Rut 1:9; Mateo 19:10-12) Anggaman ontan, pian ontalona ed balanglan kipapasen, say sipipikasin pannonot so makana. Ireport na saray managbiahen manangasikaso a dakel a Tastasi so mangaasawan ugaw ni, a mabetbet a magmamaliw ya atateng sakbay ya akaparaan iran manakbat ed nansumpalan iran responsabilidad. Arum ed sarayan panamaley so abuyak. Arum iran sanasawa so ontalona ed saray problema ra, balet say panamaley da so ag-angitarok na liket ed sikara. A singa insulat na dramatistan Ingles a si William Congreve, saraman so manapurastan mangasawa “so magbabawi ed andukey a panaon.”
18 Ireport met na saray manangasikaso na sirkito ya arum iran tobonbalon agagin lalaki so mamopokpok ed pangaplay ed serbisyo ed Bethel odino ed panboluntaryo parad Eskuelaan na Ministeryal a Panangipasal lapud kakaukolanen a mansiansian walad kasulowan ed pigaran panaon. Balet inter nen Pablo so simbawa ya agmangasawa sakbay a say sakey so “linmabas la ed kabuskagan na inkatobonbalo,” salanti, manalagar ya anggad ikepa na ununan ilesa na pankaliktan ed sekso. (1 Corinto 7:36-38) Saray taon ya impanbilay bilang sakey a walad kasulowan ya adulto so mangitarok na mablin eksperiensia tan pakatebek ed sakey a too, a mangipasen ed sikato ed magmaong a posisyon a manpili na kapareha odino manggawa na siaalwar a panagdesisyon a mansiansian walad kasulowan.
19. Panon so panmoria tayo ed saray pamaakaran no anggapo so peteg a pankaukolan tayo ed pangasawa?
19 Arum ed sikatayo so linmampas la ed kabuskagan na inkatobonbalo, a pati ed mabiskeg a pankaliktan ed seksual a piapit. Nayarin no maminsan et isindag tayoray bendisyon na panangasawa balet diad tua et walaan na langkap na kasulowan. Nayarin naimano nen Jehova a sikatayo so epektibon tuloy a manlingkor ed sikato diad kipapasen a walad kasulowan tan anggapo so peteg a pankaukolan parad pangasawa, ya atan et kaukolanen to itayon ontunda ed arum iran pribilehyo ed serbisyo to. No say panangasawa so aliwan personal a pankaukolan tan sikatayo so ag-abendisyonan na sakey a kapareha, nayarin wala so bengatlan itatarya na Dios parad sikatayo. Sirin sikatayo komon so mangagamil na pananisia ya itarok to no anto so pankaukolan tayo. Say sankabalgan a liket so mansumpal ed sipapaabeban pangawat ed no anto so ompatnag a linawa na Dios parad sikatayo, unong ya anggan saray agagin Judio so ‘akikasakey tan angigloria ed Dios’ diad impakabidbir a pinagamoran toray Hentil na panagpataoli ta pian nawalaan ira na bilay.—Gawa 11:1-18.
20. (a) Anton simbawa ed kasulowan so niiter ed saray tobonbalon Kristianos? (b) Anton manunan punto nipaakar ed liket so mansiansian tua?
20 Kanian, sirin, say panangasawa so nayarin magmaliw a tombok ed liket, anggaman atan so mangilukas met ed puerta na saray problema. Sakey a bengatla so segurado: Say panangasawa so aliwan say mogmon dalan ed pakaromog na liket. Kinunsidera so amin a bengabengatla, makabat sirin, nagkalautla ed saray tobonbalon Kristiano, a manggunaet a mansiansian walad kasulowan ed pigaran panaon. Saratan a taon so nausar a maong ed panlingkor ed si Jehova tan pian onaligwas ed espiritualidad. Anggaman ontan, antokaman so edad odino aligwas ed espiritual, sayan manunan punto so mansiansian tua parad amin na saraman so matoor a dedikado ed Dios: Naromog so tuan liket ed matoor a panaglingkor ed si Jehova.
Panon so Pangebat Yo?
◻ Akin a saray ariripen nen Jehova et maliket?
◻ Akin a say panangasawa et aliwan tombok parad sankabalgan a liket?
◻ Diad pampili na kapareha, anto so kakaukolanen ed saray totoo nen Jehova?
◻ Akin a makatunongan a sisiaen a saray Kristianos a mansiansian walad kasulowan so magmaliw a maliket?
◻ Anto so nepeg ya aksobien nipaakar ed panangasawa tan liket?