Panon so Pakatulong na Pananisia ed Mansasakit

SARAY salaysay na mamilagron panagtambal ed Biblia so mangipaseguro ed sikatayon say Dios so mapaga ed pankaabiganan tayo, tan ipanengneng da so pakayari ton manambal. Lapud sarayan mamilagron panagtambal so angigloria ed Dios tan angitarok na baleg a gayaga, makatunongan ya itepet, Kasin onkukurang ni so langkap na panagtambal diad panamegley na masanton espiritu?

Say ebat ed atan a tepet so andi​—tan say rason so manurpresa ed arum. Saraman a mamilagron panagtambal nen inmunan siglo so anumpal la ed gagala ra. Sustosuston ibabaga na The Illustrated Bible Dictionary: “Say gagala na saray milagron panagtambal so teolohiko, aliwan medikal.” Antoray arum ed teolohikon gagala ya agawaan na saraman a milagro?

Say sakey, saray milagron panagtambal nen Jesus so kinmana ed gagalan mangipabidbir ed sikato bilang say Mesias. Tan kayari impatey to, sikaray tinmulong a mangiletneg a say bendisyon na Dios so wala ed balon Kristianon kongregasyon. (Mateo 11:2-6; Hebreos 2:3, 4) Niarum ni, indemostra ran say sipan na Dios a panambal ed katooan diad balon mundo so nasumpal. Pekderan da so pananisia tayo a say panaon so peteg ya onsabi sano “anggapo lay manaayam a mangikuan: ‘Mabeblay ak.’ Saray totoon manayam ed dalin et saramay aperdona la ed kasalanan da.” (Isaias 33:24) Bektaman ya agamoran la irayan inmunan-siglon gagala, saray milagro so agla nakaukolan.

Makatantanda a saray mismon inmunan-siglon babangatan nen Jesus so nanlikna na sakisakit ya ag-atambal a mamilagro. Saya so kaaruman ya ebidensyan say mamilagron panagtambal a kimey nen Jesus tan ontan met ed ginawa na saray apostoles so adesinyon mangibangat na importante iran katuaan, aliwan pian mangitarya na medikal a serbisyo. Sanen angirekomenda na remedyon tambal ed mabetbet a sakit nen Timoteo, inrekomenda nen Pablo so pangusar na alak a bilang tambal, aliwan panagtambal na pananisia. Si Pablo, a nanggawa na saray milagron panagtambal, so ag-akagamor na inawa manlapud “sabit ed laman” a mansiasiansian “manatampal” ed sikato.​—2 Corinto 12:7; 1 Timoteo 5:23.

Say langkap na panagtambal so anampot sanen saray apostoles so inatey. Impanengneng a mismo nen Pablo a saya so nagawa. Iyaaliling to so Kristianon kongregasyon ed sakey ya ugaw, inkuan nen Pablo: “Nen ugaw ak, mansasalita ak a singa ugaw, nanisip a singa ugaw, nankatunongan a singa ugaw; natan ta nagmaliwak a too, pinaulian koray ugalin inuugaw.” Say punto ed ilustrasyon to et lapud saray mamilagron langkap na espiritu so kabiangan ed inkaugaw na Kristianon kongregasyon. Sikaray “ugalin inuugaw.” Kanian, inkuanto: “Sikara [saray mamilagron langkap] so mangangga.”​—1 Corinto 13:8-11.

Kasin Makatulong so Pananisia Sano Mansakit Itayo?

Anggaman ontan, anggan ag-itayo onsaral ed panagtambal na pananisia, peteg a matukoy so panpikasi ed Dios parad tulong sano mansasakit itayo. Tan seguradon anggapoy mauges diad pangipikasi na arum ed biang tayo. Balet nakaukolan a saray pikakasi so realistiko tan mitunosan ed linawa na Dios. (1 Juan 5:14, 15) Inerman et ag-itayo igaganggan na Biblia a mangipikasi parad panagtambal na pananisia.a Imbes, ipikasi tayo so maaron tulong nen Jehova legan na saray subok ya intarok na sakit.

Ipapanengneng na Biblia no anto so nayarin ipikasi na saray matoor a mansasakit sanen inkuanto: “Sikato so pabiskegen nen Jehova a mismo ed tapew na dokolan na inagem; sika umanen mo naani so amin a dokolan to legan na inagem to.” (Salmo 41:3) Say panagdalepdep ed Salita na Dios so ontulong ed saramay emosyonal a mansasakit. Insulat na salmista: “Say dilin maaron-kaabigan mo, O Jehova, so manusustuni ed siak. Sanen say manisigensigen iran kanonotan so dinmakel ed loob ko, saray mismon ligliwam so amaliket ed kamarerwak.”​—Salmo 94:18, 19; nengnengen met so 63:6-8.

Niarum ni, kaukolan tayon ipanengneng so maong a pakalikna ed saray pamaakaran na bunigas, tan sisimbawaen itayo na Biblia nipaakar ed saya. Magmaong nin tuloy so manbilay unong ed saray prinsipyo na Biblia nen say mibiang ed panag-abuso na druga, panagsigarilyo, panagbuanges, odino kasibaan tan insan sano mansakit, et dismayadon ompanon ed panagtambal na pananisia. Say pangipikasi parad milagro sano say sakey so atalos na sakit so aliwan kasalat parad makabat a konduktan ipaliis ed sakit, a singa diad pangan na masustansyan tagano no wala odino pananap na kualipikadon medikal a katulongan no nayari.

Papasesegen itayo met na Salita na Dios a mamayubo na mabunigas iran awawey na kanonotan a makagungguna ed pisikal a bunigas tayo. Isisimbawa na libro na Uliran: “Say mareen a puso so bilay na laman, balet say imon sikato so inkabulok na saray pukel.” “Say magayagan puso sikato so maong a tambal, balet say apasakitan ya espiritu pamagaen toray pukel.” (Uliran 14:30; 17:22) Say pangipikasi ed masanton espiritu pian mamayubo na inkaulimek tan gayaga ed sikatayo so walaan na mogmon makagungguna iran epekto ed pisikal a bunigas tayo.​—Filipos 4:6, 7.

Anto so Nipaakar ed Panagtambal na Pananisia?

Siempre, anggan manbibilay so too a mabunigas unong ya iyabuloy na kipapasen to, siansian say sakit so nayarin onsabi. Anto sirin? Wala ta so kapeligroan diad ipanon ed sakey a managtambal ed pananisia diad ilalon katambal? On, walay kapeligroan. Saray modernon managtambal ed pananisia so mataltalag a manambal ya anggapoy bayar. Tan say pangusar na kuarta parad managtambal na pananisia a nausar komon ed medikal a tulong so nayarin mansumpal ed kairapan tan kalugi. Sakey ni, akin ya ikdan na kuarta iray indibidual a mangaanamot ed inkapalikdo na totoo?

Arum so nayarin onsuppiat: ‘On, say panagtambal na pananisia so walaan na arum a kablian no walaray anggan daiset ya atambal ed saramay oonla ed “saray managtambal.”’ Ingen talagan nasuppiat no peteg kasin natambal na saray managtambal ed pananisia so siopaman diad permanenten dalan. Aksobien na Encyclopœdia Britannica: “Say panangusisan ginawa unong ed saray pihon pamaakaran so agamoran ed dakel iran agkabat a sengegan diad panagtambal na pananisia.”

Anggan walaray pigaran natambal, saya so aliwan ebidensya na ikukurang na masanton espiritu. Inkuan nen Jesus diad Sermon to ed Palandey: “Dakel naani so mangikuan ed siak ed saman ya agew, ‘Katawan, Katawan, agkami ta angipropeta lapud ngaran mo, tan amapaway na saray demonyo lapu ed ngaran mo, tan nanggawa na dakel a makapakelaw iran gawa lapu ed ngaran mo?’ Et saman ko la ipaliwawa naani ed sikara: Agta kayo apikabkabatan a balot! Arawi kayo ed siak, sikayon managgawa na kaugsan.” (Mateo 7:22, 23) Inkuan met nen Jesus a walaray, anggaman ag-inabobonan na Dios, so managyat na imano ed inkasikara diad panamegley na dakel iran tanda: “Ta onalagey naani iray tilatilan Kristo tan tilatilan propetas tan mangipanengneng ira naani na ankabaleg iran tanda tan pakelaw pian mangibalang, no nayari, pati saray pinili.” (Mateo 24:24) On, saray modernon managtambal ed pananisia so napisakup ed aplikasyon na saraman a balikas, pati saray dramatikon presentasyon da, naynay ya ikekerew na kuarta, tan ibabagan mamilagron panagtambal.

Saratan so agmanutumbok ed saray bakat nen Jesus. Sirin, siopa so tutumboken da? Ikdan itayo nen apostol Pablo na sakey a pamatnagan sanen inkuanto: “Itutultuloy nen Satanas a pagmamaliwen so inkasikato ya anghel na liwawa. Sirin agmakapakelaw a saray ministros to et pagmaliwen da met so inkasikaran ministros na inkatunong. Balet say pansumpalan da so unong ed saray gawa ra.” (2 Corinto 11:14, 15) No aggawaen na saray managtambal ed pananisia iray panagtambal ya ibabaga ra, sirin sikaray manamalikdo, manutumbok ed basbas nen Satanas, “a mamapalikdo ed interon panaayaman a dalin.” (Apocalipsis 12:9) Balet anto no, diad arum iran kipapasen et sikaray makatambal? Kasin nibaga tayon say “makapakelaw iran gawa” ra so lapud pakayari nen Satanas tan saray demonyo to? On, seguradon ontan!

Say Panaon na Peteg a Panagtambal

Saray mamilagron impantambal nen Jesus so ginawa diad tulong na masanton espiritu na Dios. Indemostra ra so gagala ton panresolbi ed saray amin a problema na too ed bunigas diad nigeter a panaon to. Isisipan nen Jehova so “panambal ed nasyones.” (Apocalipsis 22:2) Tan agto lambengat tambalen iray sakit noagta ekalen to so patey. Ipapaliwawa nen Juan a si Jesus so linmadia “pian siopaman a mangagamil na pananisia ed sikato so agnatawtaw noagta nawalaan na andi-anggaan a bilay.” (Juan 3:16) Alay abig itan a panagtambal! Si Jesus so manggawa lamet na saray panagtambal a singa saramay nikurit ed Biblia balet ta diad babaleg ya eskala. Paolien to ingen so inatey! (Juan 5:28, 29) Kapigan so kagawa na saya?

Diad balon mundo na Dios, ya unong ed amin ya ebidensya et asingsingger la. Atan a balon mundo, a nitarok kayari kaekal na karelmengan na sayan sistema na bengabengatla ed ando lan ando, so magmaliw a peteg a bendisyon parad maptek-impanpuson katooan. Magmaliw itan a mundon andian na kairapan. “Punasen na [Dios] so amin a lua ed kamataan da, tan anggapo la so patey, nisay pannangis nisay pandageyem nisay ot-ot. Saray gendat a bengatla so naandi la.” (Apocalipsis 21:4) Agaylan duman tuloy ed nanaimatonan tayo ed kaliberliber tayo natan!

Sirin, sano mansasakit, manpikasi ed Dios parad tulong. Tan balanglan mansasakit odino mabunigas, aralen no panon a say maandon bilay ya andian na sakit so peteg a posible naani. Ipaalagey so pananisia yo ed sayan napanmatalkan a sipan na Dios diad panaral na dakel iran impanukoy ed atan diad Biblia. Aralen no panon a say gagala na Dios ed sayan pamaakaran so manasingger ed kasumpalan unong ed dilin panaon to. Agmanduaruwa, lapud ipapaseguro ed sikatayo na Salita na Dios: “Akmonen to naani so patey ed ando lan ando, tan punasen na Soberanon Katawan a Jehova iray lua ed amin a kalupaan.”​—Isaias 25:8.

[Paimano ed leksab]

[Litrato ed pahina 7]

Sinumpal la na saray mamilagron panagtambal nen Jesus so gagala ra

[Litrato ed pahina 7]

Uliten tan palaknaben naani nen Jesus iray milagro na panagtambal