Kasin Abobonan na Dios so Panagtambal na Pananisia?

“ANENGNENG tayoray bengatlan nikadkaduma natan!” On, saray manangimaton so asagyat. Sakey a paralisadon tuloy a too so atambal ed mismon imaton da. Inkuan na managtambal ed too: “Bangon ka tan libit mo so dokolan mo et onla ka ed abung mo.” Et ontan so ginawa na too! Sikato lay aliwan paralisado. Agpankelawan a saramay wadman so “ginmapon angigloria ed Dios”! (Lucas 5:18-26) Sayan panagtambal, a ginawa nen Jesu-Kristo ed ngalngalin apalabas a 2,000 taon, so malinlinew a walaan na panangabobon na Dios.

Komusta natan? Kasin say mamilagron panagtambal so siansian maabig parad saraman so agmakaromog na medikal a pakatambal? Si Jesus so nanggawa na saray milagron panagtambal. Ibabaga na saray managtambal ed pananisia natan a sikato so tutumboken da. Panon so nepeg a panmoria tayo ed ibabaga ra?

Say panagtambal na pananisia so adepina bilang “say metodo na panagtambal na sakisakit diad panamegley na pikakasi tan pangagamil na pananisia ed Dios.” Pepekderan na Encyclopœdia Britannica: “Say awaran na panagtambal na pananisia ed Inkakristiano so ginmapo ed makapakelaw iran personal a ministeryo nen Jesus tan saray apostoles.” On, ginawa nen Jesus iray matalonan pakatambal. Kasin nagawaan na saray managtambal ed pananisia natan iray milagron singa ginawa to?

Pananisia​—Sakey a Kakaukolanen?

Unong ed Black’s Bible Dictionary, si Jesus so “anukoy [ed pananisia] a bilang sakey a kakaukolanen parad saray milagro ed panagtambal to.” Ingen kasin ontan so kipapasen? Kasin kinaukolan nen Jesus a say sakey a toon mansasakit so walaan na pananisia sakbay a tambalen to? Say ebat so andi. Say pananisia so kakaukolanen ed biang na managtambal aliwan ed biang na mansasakit a too. Aminsan saray babangatan nen Jesus so sinmaew a manambal ed ugaw a lakin dumurulot. Say ugaw a laki so tinambal nen Jesus tan kayari to et imbaga to ed saray babangatan no akin a sikatoy agda natambal. “Inkuanto ed sikara: ‘Lapud samet a pananisia yo.’”​—Mateo 17:14-20.

Unong ed Mateo 8:16, 17, “amin na saray mabeblay so tinambal” nen Jesus. Tua, sarayan totoo so walaan na malaem a pananisia ed si Jesus ya amakiwas ed sikaran onasingger ed sikato. (Mateo 8:13; 9:22, 29) Diad kaslakan iran kipapasen nakaukolan da so onsingger tan mikasi sakbay toran tambalen. Anggaman ontan, agkinaukolan so pormal a pangibalikas na pananisia pian gawaen so milagro. Aminsan tinambal nen Jesus so sakey a lupoy a lakin ag-anggan makapikabat no siopa si Jesus. (Juan 5:5-9, 13) Diad samay labin kaaresto to, impawil nen Jesus so apingol a layag na aripen na atagey a saserdote, anggaman sayan too so sakey ed grupo na kakabusol nen Jesus a mangaresto ed sikato. (Lucas 22:50, 51) On, aminsan, pinaoli ni ingen nen Jesus so inatey!​—Lucas 8:54, 55; Juan 11:43, 44.

Panon nen Jesus a ginawa iratan a milagro? Lapud sikato so sinmaral ed masanton espiritu na Dios, odino aktibon puersa. Saya so nantambal, aliwan say pananisia na mansasakit ya indibidual. No basaen yoray salaysay ed saray Ebanghelyo, naimano yo met a saray impantambal nen Jesus so agmaseremonya. Anggapo so kiwas pian ayaten so imano odino agmakatunongan a pangusar ed saray liknaan. Niarum ni, anggan anto so sakit, si Jesus so agbalot sinmaew. Sikato so lawas matalona, tan sikato so agbalot nanpabayar.​—Mateo 15:30, 31.

Kasin Saray Modernon Panagtambal So Mipadparad Ginawa nen Jesus?

Say sakit so makapasinagem a problema, tan sano onsabi, sikatayo so natural a mananap na inawa. Anggaman kuan, anto no manaayam itayo ed sakey a pasen a “saray totoo, nagkalautla ed saramay duka, so tratoen na propesyonal iran managtambal a bilang bengabengatla tan aliwan bilang totoo”? Ontan so kipapasen a naimatonan na sakey a doktor ed sakey a bansa ed Latin-Amerika. Tan anto no manaayam itayo ed sakey a pasen a ditan ‘et 40 porsiento lambengat ed medikal iran doktor so kualipikadon mangagamil ed propesyon da’, a singa diad saman a bansa?

Agpankelawan a dakel, lapud agmakaromog na solusyon, so nanmorian say panagtambal na pananisia so anggan panon et maong a salien. Ingen, saray ibabagan pakatambal na saray managtambal ed pananisia so nasuppiat. Alimbawa, akalkulan 70,000 so inmatendi ed miting diad São Paulo, Brazil, a ditan et duaran managtambal so ‘angigatin ed nilasus iran antipara ya imbasyo na saray dumerengel, ya angisipan ed mananisian-tuloy iran makankayarian ya ompawil so pakanengneng da.’ Diad sakey ya interbio et simamatuan inaksobi na sakey ed saray managtambal: “Agko nibaga ya amin na saramay mansasakit ya impikasi mi so natambal. Mandepende itan ed pananisia ra. No say sakey a too et manisia, sikato so natambal.” Antokaman ya insaew ed katambal so inkuanton lapud kakulangan na pananisia ed biang na mansasakit. Anggaman kuan, unong ya anengneng tayo la tandaan ya intetel nen Jesus so insaew a panambal lapud kakulangan na pananisia ed saramay mantatambal!

Insipan na sananey nin managtambal a makatambal ed kanser tan paralisis. Anto so agawa? Unong ed magasin a Veja, “say sipan so mabitar ya ag-asumpal.” Tan talinengen so paraan ya inkiwas na too a mismo: “Legan na ngalngalin duaran oras, sinagyat na [managtambal ed pananisia] so dumerengel diad saray sermon, pikakasi, eyag, kanta​—tan mandapmeg ni ingen, ed panmorian mangablog ed dedemonyon sinmelep ed saray laman na matoor. Diad kaunoran, imbasyo to so kurbata tan panyo to ed nikelawan a tuloy a dumerengel tan angiliber na plato pian mangolekta na ‘saray boluntaryon kontribusyon.’” Si Jesus tan saray apostoles to so agbalot akikerew na kuarta parad mamilagro iran panagtambal, tan ag-iran balot nanggawa na ontan iran ayayam.

Malinew sirin a saratan a managtambal ed pananisia so agmanggagawa ed ginawa nen Jesus. Tan imposiblen say gagawaen da so abobonan na Dios. Anggaman kuan, kasin abobonan to so antokaman a mamilagron panagtambal natan? Odino walay sananey a paraan a say pananisia tayo so makatulong ed sikatayo sano sikatayo odino saray inadaro tayo so mansasakit?