Panagpastol ed Pulok na Dios Tekep na Aro
“Pastolan yo so polok na Dios ya wala ed sikayo.”—1 PEDRO 5:2.
1, 2. Anto so manunan kualidad nen Jehova, tan panon iyan nipapatnag?
DIAD interon Masanton Kasulatan, malinew a say aro so matalonggaring a kualidad na Dios. “Say Dios so aro,” kuan na 1 Juan 4:8. Lapud say aro to so nipapatnag diad kiwas, ibabaga na 1 Pedro 5:7 a say Dios “aasikasoen to kayo.” Diad Biblia say paraan na pangaasikaso nen Jehova parad totoo to so niyaliling ed paraan a say maaron pastol so matamoy a mangaasikaso ed saray karnero to: “Nia, say Soberanon Katawan a Jehovan mismo . . . so manpastol ed dilin pulok to. Tiponen tora ed taklay toray karnero; tan dia ed pagew to et sikaray awiten to. Saray walaan na kilaw guyoren to a makalna naani.” (Isaias 40:10, 11, NW) Agaylan aligliwa si David a nibaga ton: “Si Jehova so managpastol ed siak; agak naani onkolang”!—Salmo 23:1.
2 Matukoy lambengat ya iyaliling na Biblia so totoo a papaboran na Dios bilang karnero, lapud saray karnero so mareen, mapasakup, matulok ed say maasikason pastol da. Bilang sakey a maaron Pastol, si Jehova so maasikason tuloy ed kinmarneron totoo to. Ipapanengneng to itan diad pangitatarok ed sikara na materyal tan espiritual a bengatla tan diad pangigigiya ed sikara diad mairap a “kaunoran iran agew” na sayan mauges a mundo a mamapaarap ed onsasabin matunong a balon mundo to.—2 Timoteo 3:1-5, 13; Mateo 6:31-34; 10:28-31; 2 Pedro 3:13.
3. Panon a deneskribe na salmista so paraan na panangasikaso nen Jehova parad karnero to?
3 Imanoen so maaron panangasikaso nen Jehova parad saray karnero to: “Saray mata nen Jehova wala ra ed matunong a too, tan saray layag to akalukas ira ed saray akis da. . . . Onakis ira et si Jehova narengel to, tan iliktar to ra ya ipaway ed amin a gon-gonigon da. Si Jehova asinger ed saray wala ed kipapasen na sakey a nabtagan na puso; tan ilaban to so totoo ya wala ed sakey a kamarerwa a masakit ed panagbabawi. Amayamay so pakapaermenan na matunong: balet si Jehova iliktar to ya ipaway ed saraya ya amin.” (Salmo 34:15-19) Agaylan baleg a ligliwa so itatarok na Sankatalbaan a Pastol ed kinmarneron totoo to!
Say Alimbawa na Maabig a Pastol
4. Anto so betang nen Jesus ed panangasikaso ed pulok na Dios?
4 Say Anak na Dios, si Jesus, so akaaral a maong manlapud Ama to, lapud tatawagen na Biblia si Jesus a “maong a pastor.” (Juan 10:11-16) Say makanan serbisyo to ed pulok na Dios so naimano ed Apocalipsis kapitulo 7. Diad bersikulo 9, saray ariripen na Dios natan so natatawag a “baleg ya olop . . . a nanlapu ed balang nacion tan amin na saray kailalakan, tan binaleybaley, tan salita.” Insan kuan na bersikulo 17, “Ta say Cordero [Jesus] . . . sikatoy pastol da, tan sikara so irawa’to ed saray sobol na danudanum na bilay: tan say Dios punasen to so balang lua ed saray kamataan da.” Iwawanwan nen Jesus iray karnero na Dios ed danudanum na katuaan a mangipaarap ed andi-anggaan a bilay. (Juan 17:3) Imanoen a si Jesus so tatawagen a “say Cordero,” a mangipapatnag ed dilin kinmarneron kualidades to, sikato bilang say manunaan ya alimbawa na inkamapasakup ed Dios.
5. Anto so liknaan nen Jesus nipaakar ed totoo?
5 Diad dalin si Jesus so nambilay ed limog na totoo tan anengneng to so pakaskasin kipapasen da. Panon so inkiwas to ed kipapasen da? “Inabagey to ra, lapud maermen tan abuybuyak ira, a singa saray carnero ya angapoy pastol da.” (Mateo 9:36) Saray karneron andian na pastol so manasagmak na baleg ya irap ed lima na saray manangasiba, a singa met saray karneron walaan na saray patol ya agmangimalasakit. Balet si Jesus so angasikason tuloy, tan inkuanto: “Dago kayo’d siak, amin yo’n nasasagpotan tan nabebelatan, et itdan ta kayo’y pampainawa. Ala yo’y pakok ed sikayo, tan manaral kayo’d siak; ta maoyamo ak tan mapaabeba ak a puso: et naromog yo’y inawa nipaakar ed saray kamarerwa yo. Ta say pakok mainomay, tan anlemew so awit ko.”—Mateo 11:28-30.
6. Anton panangasikaso so impanengneng nen Jesus ed saray pakaskasi?
6 Impasakbay na propesiya ed Biblia a si Jesus so simamaaron mideneng ed totoo: “Si Jehova nilanaan toak . . . a mamedber ed puso a maermen, . . . a manligliwa ed amin a managogol.” (Isaias 61:1, 2; Lucas 4:17-21) Agbalot nilames nen Jesus iray duka tan agmapalar. Imbes, sinumpal to so Isaias 42:3: “Say sakey a kawayan ya abalbal agto naani poteren, tan say sakey a pabilo a mandarlang a makuyep agto naani erepen.” (Ipareng so Mateo 12:17-21.) Saray maniirap so singa saray kawayan ya abalbal, singa saray pabilon makuyep lapud kulang na larak. Diad impakanengneng ed pakaskasin kipapasen da, impanengneng ed sikara nen Jesus so panangabagey tan inikdan tora na biskeg tan ilalo, a pinaabig to ra ed espiritual tan pisikal a paraan.—Mateo 4:23.
7. Iner so angipaarapan nen Jesus ed totoon kinmiwas ed sikato?
7 Saray kinmarneron totoo ed baleg a bilang so kinmiwas ed si Jesus. Ontanlan makaingganyo so impanbangat to a saray opisyal ya imbakin mangerel ed sikato so nanreport: “Angapo ni too a nansalita na onia.” (Juan 7:46) Agayla, saray mansimpisimpitan a relihyoson papangulo so nanreklamo: “Say mundo tinmombok ed sikato”! (Juan 12:19) Balet agkinaliktan nen Jesus so galang tan gloria a nipaarap ed inkasikato. Impaarap toray totoo ed Ama to. Imbangat toran manlingkor ed si Jehova a pinakiwas na aro parad makapadinayew iran kualidad To: “Aroen mo so Katawan [Jehova, NW] a Dios mo ed amin a pusom, tan amin a kamarerwam, tan amin a kasil mo.”—Lucas 10:27, 28.
8. Panon a say katutulok ya iiter na totoo ed Dios so duma manlapud iiter na arum ed minumundo iran manuley?
8 Niglogloria si Jehova lapud say sankatalbaan ya inkasoberano to so susuportaan na kinmarneron totoo to, a nibased aro ra ed sikato. Sibubulos dan pipilien so panlingkor ed sikato lapud pikakabat ed makaroyroyon kualidades to. Agaylan duma iya manlapud saray papangulo na mundo ya ontutulok iray uuleyan da lapud takot, odino walay imbel na linawa ra, lapud sikaray walaan na pigaran sinisiblet a motibo! Agbalot nibaga itan ed si Jehova odino ed si Jesus so imbaga nipaakar ed sakey a papa na Iglesia Katolika Romana: “Sikatoy nandinayewan na dakel, tatakotan na amin, agbalot inaro na siopaman.”—Vicars of Christ—The Dark Side of the Papacy, nen Peter De Rosa.
Maruksa Iran Pastol ed Israel
9, 10. Deskribien iray papangulo ed kadaanan ya Israel tan ed inmunan siglo.
9 Aliwan singa si Jesus, saray relihyoson papangulo ed Israel ed agew to so andian na aro parad saray karnero. Singara saray asasakbay a manuley ed Israel ya angikuanan nen Jehova: “Kasi la so saray pastol na Israel a pakanen da so saray laman da lanlamang! saray pastol agda ta komon pakanen so saray carnero? . . . Say makapuy agyo pinabiskeg, tan agyo met tinambal so mabeblay, tan agyo met binedberan so aputer, agyo met insempet so pinatainan, agyo met inanap so abalang; lapu ed panamasoot tan panamairap nanuley kayo ed sikara.”—Ezequiel 34:2-4.
10 Singa saraman a mapulitikan pastol, saray Judion papangulo nen inmunan siglo so nampaawet. (Lucas 11:47-52) Diad pangiyilustra ed saya, imbaga nen Jesus so nipaakar ed sakey ya Judio a tinakewan, pinekpek, tan tinaynan a patey-pateyan ed gilig na dalan. Sakey a saserdoten Israelita so dinmalan, balet ta sanen anengneng to so Judio, sikato so inmiwas ed biek a dalan. Ontan met so ginawa na sakey a Levita. Kayari to sakey ya aliwan Israelita, sakey a babandayen a Samaritano, so dinmalan tan naabagey to so biktima. Binedber toray sugat to, insakay to ed sakey ya ayep pian awiten ed sakey a pundoan, tan inasikaso. Binayaran to so manangasikaso na pundoan tan imbilin ton ompawil pian bayaran so antokaman a kaaruman a gastos.—Lucas 10:30-37.
11, 12. (a) Panon a sinmabi ed kapantokan so karelmengan na saray relihyoson papangulo diad agew nen Jesus? (b) Anto so kaunoran a ginawa na saray Romanon papangulo?
11 Ontanlay inkauges na saray relihyoson papangulo ed agew nen Jesus a sanen pinaoli nen Jesus si Lazaro manlapud inaatey, saray manunan saserdote tan Pariseos so anawag ed Sanhedrin a mankakasakey tan nankuan: “Anto so gawaen tayo? ta saya’n too [si Jesus] mangawa na amayamay a tanda. No sikato so paulian tayo labat ya ontan, amin day totoo manisia naani ed sikato; et saray taga Roma onsabi ra et ekalen da so pasen tayo tan say nacion tayo.” (Juan 11:47, 48) Anggapoy kablian na maong a ginawa nen Jesus ed sikara nisesengeg ed toon inatey. Pampapagaan da so nipaakar ed saray posisyon da. “Kanian nanlapu ed saman ya agew nansisingbat ira pian yanda si Jesus ed ipapatey.”—Juan 11:53.
12 Pian napantutugyop da ni so karelmengan da, saray manunan saserdote so ‘nansisingbat pian napapatey da met si Lazaro. Ta nisengeg ed sikato amayamay ed saray Judios so sinmian, tan anisia ra ed si Jesus.’ (Juan 12:10, 11) Saray sinisiblet a sagpot da pian salimbengan iray posisyon da so andiay kana, lapud imbaga ed sikara nen Jesus: “Nia, say abung yo natainan ed sikayo ya andi lugan.” (Mateo 23:38) Diad kasumpalan na saraman a salita, diad saman a kailalakan et sinmabi iray taga Roma tan inala ra so ‘pasen tan nacion da,’ tan ontan met ed saray bilay da.
Maaro Iran Pastol ed Kristianon Kongregasyon
13. Siopa so insipan nen Jehova ya ibaki pian pastolan so pulok to?
13 Imbes a maruksa, masiblet iran pastol, si Jehova so mamatalindeg na Maabig a Pastol, si Jesus, a mangasikaso parad pulok To. Insipan to met a mamatalindeg na maaro iran katulongan a pastol a mangasikaso ed saray karnero: “Mangipasen ak naani na saray pastol ed sikara; a sikara so mantagano ed sikara: et ag ira la naani ontakot.” (Jeremias 23:4) Kanian, no panon a saray Kristianon kongregasyon ed inmunan-siglo ontan met natan, “saray pananuro ed mamatatken a lalaki ed binaley-baley” so gagawaen. (Tito 1:5, NW) Sarayan matatken ed espiritual a lalaki a makakadampot ed saray kualipikasyon a nidatak ed Kasulatan so ‘mamapastol ed polok na Dios.’—1 Pedro 5:2; 1 Timoteo 3:1-7; Tito 1:7-9.
14, 15. (a) Anton awawey so aromog na saray babangatan a mairap a bayuboan? (b) Anto so ginawa nen Jesus pian ipanengneng ed sikara a saray mamatatken so nepeg a magmaliw a mapaabeban aripen?
14 Diad pangaasikaso ed saray karnero, saray mamatatken so nepeg a “lalo a toloy” a nawalaan na ‘agnaumas ya aro’ ed sikara. (1 Pedro 4:8) Balet kaukolan a naaralan iya na saray babangatan nen Jesus, lapud ta mapaga iran tuloy nipaakar ed kitandoro tan posisyon da. Kanian sanen say ina na duaran babangatan so nankuan ed si Jesus: “Ibilin mo komon a saraya’y duaran ana’ ko makayorong ira komon, sakey ed nikawanan a limam, tan say sakey ed nikawigi a limam, dia ed panarian mo,” saray arum a babangatan so asanokan. Inkuan nen Jesus ed sikara: “Amta yo ya saray makauley na saray Gentiles sikara so katawan ed sikara, tan saray manonaan aagamilen da so pakauley da ed sikara. Aliwan ontan naani dia ed sikayo: noag ingen siopaman a labay toy magmaliw a baleg ed sikayo sikato naani managlinkor yo. Tan siopaman a labay to’y onaan ed sikayo sikato naani aripen yo.”—Mateo 20:20-28.
15 Diad sananey ya okasyon, kayari na saray babangatan a ‘nansasangsangan ed sakey tan sakey ed dalan, no siopa so kabalbalgan’ inkuan nen Jesus ed sikara. “No siopaman a too labay to’n sikato’y unaan, sikato so kaonoran naani ed amin, tan aripen na amin.” (Marcos 9:34, 35) Say kaabebaan na nonot tan inkamabulos a manlingkor so kaukolan a magmaliw a kabiangan na personalidad da. Ingen saray babangatan so nantultuloy ya awalaan na kairapan ed saraman ya ideya, ta diad saman a mismon labi na impatey nen Jesus, diad kaunoran a pangdem, sakey a “siblangan” so linmesa ed limog da no siopa so sankabalgan! Saman so agawa anggaman impanengneng la nen Jesus ed sikara no panon so nepeg a panlingkor na sakey a matatken ed pulok; sikato so nampaabeban anguras ed saray sali ra. Inkuanto: “No siak sirin so Katawan tan Managbangat, et inorasan ko so saray sali yo, sikayo met nepeg yo so manoorasan na sali sakey tan sakey. Ta initdan takayo na sakey ya pangaligan, pian sikayo gawaen yo met so singa ginawak ed sikayo.”—Lucas 22:24; Juan 13:14, 15.
16. Nen 1899, anto so komento na Watch Tower nipaakar ed sankaimportantian a kualidad na mamatatken?
16 Lawas ibabangat na Tastasi nen Jehova a saray matatken so nepeg a magmaliw a singa onia. Ngalngali sakey a siglo ed apalabas, say Abril 1, 1899, a Watch Tower so anaglawi ed saray salita nen Pablo ed 1 Corinto 13:1-8 tan insan nankuan: “Malinew a tutukoyen na Apostol a say pikakabat tan talumpati so aliwan say sanka-importantian iran pakasubokan, noagta say aro a manlalapud puso tan onlalaknab angga ed amin a kurang na bilay, tan mamapakiwas tan mamapakurang ed ompatey iran laman tayo, so talagan say tuan subok—say peteg a prueba ed madibinon siglaotan tayo. . . . Say manunan ugali a nepeg ya anapen ed balang sakey ya aawaten bilang aripen na iglesia, a mangasikaso ed saray masanton bengatla, a nepeg ya unaan et say espiritu na aro.” Sinaglawi to a saray lalaki ya agmapaabeban manlilingkor lapud aro “so palpalaran iran managbangat, tan maseguron makagawa na nagkalalon deral nen say kaabigan.”—1 Corinto 8:1, NW.
17. Panon so pangidadanet na Biblia ed saray kualidad a nepeg a niwalad saray mamatatken?
17 Sirin, saray mamasiken so agnepeg a “pakatawan” ed karnero. (1 Pedro 5:3) Imbes, sikaray mangidaulo diad pagmaliw a “manaanusan ed sakey tan sakey, mapangasi.” (Efeso 4:32) Indanet nen Pablo: “Mampales kayo la sirin, a singa saray pinili Dios, sasanto tan inararo, sakey a puso a maabagey, maong a linawa, kaoyamoan, kadeenan, kasondoan . . . Tan lalo la ed saraya ya amin a bengatla ikawes yo so aro, a sikato so singer yo ed inkayadyari.”—Colosas 3:12-14.
18. (a) Anton maabig ya alimbawa so inletneg nen Pablo diad pidedeneng ed saray karnero? (b) Akin ya agnepeg ya ibaliwala na mamatatken iray pankaukolan na saray karnero?
18 Naaralan nen Pablo a gawaen iya, diad impangibagan: “No ag say maoyamo kami ed pegley yo, a singa sakey a sigsiwa a managano na dili’n anak to. Ontan mi met, a maibibeg kami’n mangaro ed sikayo, apaliket kami’n toloy a mangipanabang ed sikayo, na aliwa’n say evangelio na Dios labat, no ag met saray dili’n kakamarerwa mi, ta nagmaliw kayo a sankablian ed sikami.” (1 Tesalonica 2:7, 8) Mitunosan ed satan, inkuanto: “Simbawaen yo so saray agnaoksoy, ibalap yo so apunaw ed puso, tagano yo so saray makapuy, masungdo kayo komon ed amin.” (1 Tesalonica 5:14) Antokaman so nengneng na probleman nayarin itarok na karnero ed sikara, nepeg a tandaan na mamatatken so Uliran 21:13: “Say mamepet ed saray layag to ed akis na duka, sikato met onkiwas, balet ag pakadenglen.”
19. Akin a saray maaron mamatatken so bendisyon, tan panon so ikikiwas na saray karnero ed ontan ya aro?
19 Saray mamasiken a simamaaron mamapastol ed pulok so bendisyon ed saray karnero. Impasakbay na Isaias 32:2: “Et sakey a too so magmaliw naani a singa sakey ya amotan na dagem, tan sakey a siroman ed bagyo, singa saray agus na saray danum ed pasen ya amaga, singa anino na sakey a baleg a batondampay ed sakey a dalin ya apagaan.” Maliket tayon makaamta a dakel ed saray mamatatken tayo natan so onkikiwas a mitunosan ed saratan a marakep a deskripsyon na pakainawaan. Naaralan da so pangiyaplika ed onggendan a prinsipyo: “Nipaakar ed aroan na sanaagi, matamoy komon so aroan na sakey tan sakey, dia ed galang manpapalabian kayo.” (Roma 12:10) Sano ipanengneng na mamatatken so onian nengneng na aro tan inkamapaabeba, saray karnero so onkiwas diad pangiter da ed sikara na “nagkalalo nen say labas ni nen ordinaryon kunsiderasyon ed aro lapud gawa ra.”—1 Tesalonica 5:12, 13, NW.
Respetoen so Panangusar na Kawayangan
20. Akin a nepeg a respetoen na mamatatken so kawayangan?
20 Pinalsa nen Jehova iray totoo a walaan na kawayangan pian manggawa na dili ran panagdesisyon. Bangta saray mamatatken so manimbawa tan anggan manisiplina ni ingen, agda dodominaen so bilay odino pananisia na sananey. Inkuan nen Pablo: “Aliwan say uleyan mi pananisia yo, no ag ingen mananulong kami ed liket yo: ta lapu ed pananisia sialagey kayo.” (2 Corinto 1:24) On, “balang sakey taroken to naani so awi’ton dili.” (Galacia 6:5) Inikdan itayo nen Jehova na baleg a kawayangan ed loob na saray ganggan tan prinsipyo to. Diad ontan et nepeg a paliisan na saray mamatatken so pangigetar na saray totontonen sano agmet nasusumlang iray Makasulatan a prinsipyo. Tan nepeg dan resistian so antokaman a tendensyan mangiter na dilin personal iran opinyon bilang sisisiaen odino abuloyan da so alabas a panangipasen ed inkasikara a makaamper no wala so sakey ya agmiabobon ed saratan a panmoria.—2 Corinto 3:17; 1 Pedro 2:16.
21. Anto so naaralan manlapud awawey nen Pablo ed si Filemon?
21 Imanoen no panon nen Pablo, legan a nipangaw ed Roma et akideneng ed si Filemon, sakey a Kristianon akankayarian ed aripen ed Colosas na Asia Minor. Say aripen nen Filemon a manngaran na Onesimus so binmatik ya amaarap ed Roma, nagmaliw a sakey a Kristiano, tan tinmulong ed si Pablo. Insulat nen Pablo ed si Filemon: “Sikato so nilabay ko komon ya intilak ed siak, pian dia ed ngaran mo tulongan to ak komon dia ed saray balobalor [nisengeg ed] evangelio. Balet no angapo so panagyaboloy mo, ag ko komon labay so mangawa na angan anto; pian say kaabigan mo aliwa komon a singa manlapu’d pankaokolan, no ag dia’d mabolos mon linawa.” (Filemon 13, 14) Pinapawil nen Pablo si Onesimus, a kinerew to ed si Filemon a tratoen to bilang Kristianon agi. Kabat nen Pablo a say pulok et agto kien; satan so kien na Dios. Sikato so aliwan katawan noagta aripen na satan a pulok. Agdiniktaan nen Pablo si Filemon; nirespeto to so kawayangan to.
22. (a) Anto so nepeg a natalosan na mamatatken nipaakar ed posisyon da? (b) Anton nengneng na organisasyon so papaaligwasen nen Jehova?
22 Legan ya ombubulaslas so organisasyon na Dios, dakel a mamatatken so natuturo. Sikara, ontan met ed lalon eksperiensiadon mamatatken, et nepeg dan talosan a say kipapasen da so sakey a mapaabeban serbisyo. Diad onian paraan, legan a mamapaarap so organisasyon to ed balon mundo, satan so mantultuloy ya ombulaslas legan a labay to—naorganisan tuloy balet agmangisasakripisyo ed aro tan panangabagey parad inkamaong. Kanian, say organisasyon to so magmaliw a lalon ondakep ed singa saray kinmarneron makanengneng ed satan bilang paneknek ya “ami ganagana mankakasakey ira a mankimey ed pamaabig ed saray mangaro ed Dios.” Satan so nailaloan manlapud organisasyon a niletneg ed aro, lapud “say aro ag balot manganga.”—Roma 8:28; 1 Corinto 13:8.
Panon Yon Ebatan?
◻ Panon so panedeskribe na Biblia ed panangasikaso nen Jehova ed totoo to?
◻ Anto so betang a ginawa nen Jesus ed panangasikaso ed pulok na Dios?
◻ Antoran manunan ugali so nepeg a wala ed mamatatken?
◻ Akin a nepeg a kunsideraen na mamatatken so kawayangan na saray karnero?
[Litrato ed pahina 16]
Si Jesus, say “maong a pastor,” so angipanengneng na panangabagey
[Saray litrato ed pahina 17]
Saray mauges a tuloy a relihyoson papangulo so nannunonong pian pateyen si Jesus