Say Sankabalgan a Toon Nambilay ed Kapiganman

Kapitulo 53

Sakey a Pipilaleken a Mas Makapanyari Nen Say Toon Manuley

Sanen mamilagron pinakan nen Jesus iray nilibo, saray totoo so mankelaw. “Dia’d katuaan sikato ya so profeta ya onladia ed mundo,” inkuanda. Inkuandan si Jesus so aliwa lambengat imay babaleg a propeta nen say si Moises noagta sikato met so magmaliw a pipilaleken a tuloy a manuley. Kanian implano ran sikatoy erelen tan sikatoy gawaen ya ari.

Anggaman kuan, kabat nen Jesus so plaplanoen na totoo. Kanian sikatoy nanaporan kinmiwas pian naamper so panamilit da. Pinasempet toray karaklan tan ginanggan toray babangatan ton onlugan ed baloto tan nanlayag a papawil ed Capernaum. Insan sikatoy linma ed palandey pian manpikasi. Diad saman a labi et nanbokbokor diman si Jesus.

Nen ompalbangon la, si Jesus so binmantag manlapud nipaatagey a kawalaan to tan naimano ton madaluyon so dayat lapud maksil a dagem. Diad liwawa na ngalngalin sulaw, lapud asingger lay Paskua, abantag nen Jesus iray babangatan ton manlalayag a mipupuligesgesan ed saray daluyon. Inyopot na lalaki so biskeg dan mansakay.

Diad impakanengneng ed saya, si Jesus so linmeksab manlapud palandey tan nanakar paarap ed sikara a bineltang iray daluyon. Say baloto so niyarawi na ngalngalin talora odino apatiran milya sanen arateng nen Jesus itan. Anggaman kuan, sikatoy nantultuloy a singa no sikatoy onlampas. Sanen sikatoy anengneng na saray babangatan, inkelyaw da: “Sikato so sakey a payawar!”

Sikaray niligliwa nen Jesus ed impangikuan: “Siak; ag kayo antakot.”

Balet inkuan nen Pedro: “Katawan, no sika, ibilin mo ya onlaak ed sika a manakar ak ed tapew na saray danum.”

“Gala!” inyebat nen Jesus.

Diad saman, kaepas nen Pedro ed baloto, nanakar ed tapew na danum a paarap ed kinen Jesus. Balet diad impakaimano ed maksil a dagem, si Pedro so tinmakot, tan sanen onlelereg la, inkelyaw to: “Katawan, ilaban mo ak!”

Tampol ton inyunat so lima to, sikatoy inalawat nen Jesus, ya inkuanto: “O sika [a] makulang na pananisia, akin et nanduarua ka?”

Kapawil nen Pedro tan si Jesus ed baloto, say dagem so tinmunda, tan saray babangatan so mankelaw. Balet kasin nepeg iran mankelaw? No atalosan da so “nipaakar ed saray tinapay” diad pangapresya ed baleg a milagron ginawa nen Jesus, pigaran oras labat so apalabas sanen pinakan toray nilibo tekep lambengat na limaran tinapay tan duaran ankelag a sira, diad ontan et agkomon ompatnag a makapakelaw a tuloy a sikatoy makaakar ed danum tan makapakalma ed dagem. Anggaman kuan, natan et saray babangatan so angigalgalang ed kinen Jesus tan inkuanda: “Tua a sika so Anak na Dios.”

Ag-abayag, arateng day Gennesaret, sakey a marakep, mabungan patar ya asingger ed Capernaum. Diman da impataga so baloto. Balet sanen sikara so akasakbit, abidbir na totoo si Jesus tan linma ed kabangibang a lugar, ya aanapen iramay mansasakit. Sanen saraya so inawit ed saray dokolan da tan adiwit lambengat so akinpaway a kawes nen Jesus, sikara so sigpot ya apaabig.

Kaleganan, say karaklan ya akatasi ed mamilagron impamakan ed nilibo so akadiskobren si Jesus so akaalis la. Kanian sanen saray melag a baloto manlapud Tiberias so sinmabi, sikara so linmugan ed saraya tan nanlayag paarap ed Capernaum pian anapen si Jesus. Sanen sikatoy nalmo ra, intepet da: “Rabbi, kapigan so insabim dia?” Sikara so binaat nen Jesus, a singa magano tayo lan nanengneng. Juan 6:14-25; Mateo 14:22-36; Marcos 6:45-56.

▪ Kayarin mamilagron pinakan nen Jesus iray nilibo, anto so labay na totoon gawaen ed sikato?

▪ Anto so abantag nen Jesus manlapud palandey a nila to, tan anto so ginawa to?

▪ Akin ya agnepeg komon a mankelaw iray babangatan ed sarayan bengatla?

▪ Anto so agawa sanen sikaray akarateng ed gilig na dayat?