Say Sankabalgan a Toon Nambilay ed Kapiganman

Kapitulo 54

“Tuan Tinapay Manlapu ed Tawen”

Say apalabas ya agew so peteg a dakel so agawan bengatla. Mamilagron pinakan nen Jesus so nilibo tan insan tinmaynan pian paliisan so panali na totoon sikatoy gawaen ya ari. Diad saman a labi et sikato so nanakar ed mabagyon Dayat na Galilea; insalbay Pedro, a ginmapon linmereg sanen sikatoy nanakar ed madaluyon a danum; tan pinakalma iray daluyon pian isalba iray babangatan to manlapud pakakneb.

Natan et saray totoon mamilagron pinakan nen Jesus ed amianen-bukig na Dayat na Galilea so akarumog ed sikato diad asingger na Capernaum tan nantepet: “Kapigan so insabim dia?” Diad pamabaat ed sikara, inkuan nen Jesus a sikaray linma lambengat a mananap ed sikato diad ilalon sikaray libren napakan lamet. Pinaseseg toran mankimey, aliwan parad taganon nabangles, noagta parad taganon mansiansia parad andi-anggaan a bilay. Kanian intepet na totoo: “Anto so nakaokolan mi a gawaen, pian nakimeyan mi so saray kimey na Dios?”

Sakey lambengat a kimey so binitla nen Jesus a sankaimportantian. “Sikato ya so kimey na Dios,” inkuanto, “a manisia kayo ed inbaki to.”

Anggaman ontan, saray totoo so agmangaagamil na pananisia ed si Jesus, anggaman ed amin a milagron ginawa to. Agayla, anggan kayari na amin a makapakelaw iran bengatlan ginawa to, intepet da: “Anto sirin so gawaen mo a pinagkatanda, pian nanengneng mi, et manisia kami ed sika? Anto so gawaen mo? Saray atateng tayo angan ira na mana dia ed kalawakan; unong na nisulat, Sikato initdan to ra na tinapay a nanlapu ed tawen a kanen da.”

Diad ebat ed kerew da parad sakey a tanda, impalinew nen Jesus so Lapuan na mamilagro iran probisyon, inkuanto: “Aliwa a si Moises so angiter ed sikayo na tinapay a nanlapu ed tawen; balet si Amak itdan to kayo na tuan tinapay a manlapu ed tawen. Ta say tinapay na Dios sikato so onleksab a manlapu ed tawen, et mangiter na bilay ed mundo.”

“Katawan,” inkuan na saray totoo, “itdan mo kami lawas na saya’n tinapay.”

“Siak so tinapay na bilay,” paliwawa nen Jesus. “Say ondago ed siak ag naerasan, tan say manisia ed siak ag balot [napegaan]. Balet inkuan ko ed sikayo, ya anengneng yo ak, et ag kayo ni manisia. Amin ya inter na Ama ed siak ondago ed siak; et say ondago ed siak ag kon balot ipulisay. Ta linmasor ak a nanlapu ed tawen, aliwan piano gawaen ko so linawak a dili, noag say linawa na angibaki ed siak. Et saya sikato so linawa na angibaki ed siak, ya amin ya inter to ed siak angapo so nabalang ko, noag ingen paulien ko ed bilay ed kaonoran ya agew. Ta saya sikato so linawa nen Amak, ya amin a makanengneng ed Anak, tan manisia ed sikato, nawalaan na bilay ya andi-angaan.”

Diad saya et ginmapon nanmeremere iray Judio ed kinen Jesus lapud inkuanton, “Siak so tinapay a linmasor a nanlapu ed tawen.” Anggapoy anengneng da ed sikato noagta sakey labat ya anak na atooan ya atateng tan sirin et singa onman ed saramay taga Nazaret, sikaray sinmumpa, ya inkuanda: “Ag ta sikato ya si Jesus, ya anak nen Jose, a say ama to tan ina to kaba’tayo? Panon so pangibaga to natan, Siak linmasor ak a nanlapu ed tawen?”

“Ag kayo mantatalabotob [manmemeremere, NW] ed inkasikayo,” inyebat nen Jesus. “Angapo so too a makadago ed siak, likod no say Ama ya angibaki ed siak sikato so yasinger to: et sikato so paolien ko ed bilay ed kaonoran ya agew. Nisulat ed saray profetas, Et nabangatan ira ya amin ed Dios. Balang sakey ya akadngel ed Ama, tan akaaral, ondago ed siak. Aliwan say angan siopan too so akanengneng ed Ama, nilikod so samay nanlapu ed Dios, anengneng to so Ama. Tua, tua, kuan ko ed sikayo, Say manisia walaan na maando a bilay.”

Diad pangitutuloy, inulit nen Jesus: “Siak so tinapay na bilay. Saray atateng yo angan ira na mana ed kalawakan, et inatey ira. Saya sikato so tinapay ya onlasor a manlapu ed tawen, pian say too a makapangan ed sikato, et ag onpatey. Siak so tinapay a mabilay a linmasor a nanlapu ed tawen: no wala so mangan ed saya a tinapay, manbilay lawas.” On, diad pangagamil na pananisia ed kinen Jesus, say imbaki na Dios, nayarin nawalaan na andi-anggaan a bilay iray totoo. Anggapoy manna, odino antokaman a tinapay, a nayarin makapangitarok ed satan!

Say diskusyon nipaakar ed tinapay manlapud tawen so mapatnag a ginmapo ag-abayag kayari impakarumog na totoo ed si Jesus diad asingger na Capernaum. Balet satan so nantultuloy, a sasabien so sakey a pantok ed saginonor legan a manbabangat si Jesus ed sakey a sinagoga ed Capernaum. Juan 6:25-51, 59; Salmo 78:24: Isaias 54:13; Mateo 13:55-57.

▪ Antora so unaan ya agawgawa sakbay a tinukoy nen Jesus so nipaakar ed tinapay manlapud tawen?

▪ Makasengeg ed ginawa nen Jesus ed saman labat a bekta, akin a say kerew parad sakey a tanda so agmatukoy a tuloy?

▪ Akin a saray Judio so nanmeremere ed imbaga nen Jesus a sikato imay tuan tinapay manlapud tawen?

▪ Iner ya agawa so diskusyon nipaakar ed tinapay manlapud tawen?