Say Sankabalgan a Toon Nambilay ed Kapiganman

Kapitulo 55

Dakel a Babangatan so Tinmundan Ontumbok ed kinen Jesus

Si Jesus so manbabangat ed sakey a sinagoga ed Capernaum nipaakar ed biang to bilang say tuan tinapay manlapud tawen. Say paliwawa to so mapatnag a katuloyan na sisingbaten to’d totoo sanen sikatoy nalmo ra ed impawil da manlapud mamabukig a dapag na Dayat na Galilea, a no iner et sikaray angan manlapud mamilagron nipawala iran tinapay tan sirasira.

Intuloy nen Jesus so ibabaga to, a kuanto: “Say tinapay ya iter ko sikato so laman ko, nipaakar ed bilay na mundo.” Duay taon lambengat ed kasakbayan, ed primabera na 30 K.P., imbaga nen Jesus ed si Nicodemo ya ontanlay impangaro na Dios ed mundo ya intarok to so Anak to bilang Manangisalba. Sirin, si Jesus natan so mangipapanengneng a siopaman ed mundo na katooan a simbolikon mangan na laman to, diad pangagamil na pananisia ed bagat ya asingger lan gawaen to, et nayarin makaawat na andi-anggaan a bilay.

Anggaman ontan, agapol so totoo ed saray salita nen Jesus. “Panon so pakayari na sayan too a mangiter ed sikatayo na laman to a kanen?” so tepet da. Labay nen Jesus a talosan na dumerengel to a say pangan ed laman to so nagawa ed piguratibon paraan. Kanian, pian saya so idanet, sikatoy angikuan ni bengatlan lalon agnaawat no ipasen ed literal a paraan.

“No ag kayo mangan ed laman na Anak na too tan ag kayo oninum ed dala to,” inkuan nen Jesus, “andian kayo na bilay ed inkasikayo. Say mangan na laman ko tan oninum na dalak walaan na maandon bilay; tan sikato so paolien ko ed bilay ed kaonoran ya agew. Ta say laman ko sikato’y peteg a tagano, tan say dalak sikato’y peteg ya inumen. Say mangan na laman ko tan oninum na dalak mansiansia ed siak, tan siak mansiansia ak ed sikato.”

Tua, say bangat nen Jesus so ompatnag a makaopendin tuloy no sikatoy mangisusuheri na kanibalismo. Balet, siempre, si Jesus so agmangisusuheri na literal a pangan na laman odino iyinum na dala. Sikatoy mangidadanet lambengat ya amin a mangawat na andi-anggaan a bilay so nepeg a mangagamil na pananisia ed sakripisyon gawaen to sano iyapay toy ayadyarin atooan a laman to tan ikalbo so dala a bilay to. Ingen, dakel anggan saray babangatan to so ag-analin talosan so bangat to tan diad ontan et sinmusumpa: “Saya [so] masoliwet a salita; siopa so makayari’n ondengel ed sikato?”

Diad pakakaamtan dakel ed saray babangatan to so manmemeremere, inkuan nen Jesus: “Patiroren to kayo ta na saya? Anto sirin no nanengneng yo so Anak na too ya ontotokotok ed kawalaan to nensaman? . . . Saray salita a sinalita ed sikayo sikara so espiritu, tan sikara so bilay. Balet walaray arum ed sikayo ya ag manisia.”

Intuloy nen Jesus: “Nisengeg ed saya inkuan ko ed sikayo, ya angapo so too a makadago ed siak, likod no sikato so niiter ed sikato manlapu ed Ama.” Diad satan, dakel ed saray babangatan to so tinmaynan tan agla tinmumbok ed sikato. Kanian binmaling si Jesus ed saray 12 apostol to tan intepet: “Agyo met labay so ontaynan, agta ontan?”, NW.

Inmebat si Pedro: “Katawan, siopa so laen mi? Wala ed sika so saray salita na maando a bilay. Et anisia kami tan amta mi ya sika so Santo na Dios.” Agaylan maabig a balikas na katooran, anggaman si Pedro tan arum niran apostol so nayarin agsigpot ya akatalos ed bangat nen Jesus ed sayan pamaakaran!

Anggaman aliketan ed ebat nen Pedro, inkuan nen Jesus: “Ag ta kayo ta pinili a labindua, et sakey ed sikayo sikato’y sakey a diablo?” Tutukoyen toy Judas Iscariote. Posibli a diad sayan bekta et atebek nen Jesus ed kinen Judas so “gapo,” odino sakey a panlapuan, na lingon tuloy a kurang.

Aganggano labat nin dinismaya nen Jesus iray totoo diad insumpa ed panali ran sikatoy gawaen ya ari, tan nayarin sikaray mangikakatunongan, ‘Panon a nayarin saya imay Mesias no sikatoy agmangala na manepeg a kundang na Mesias?’ Saya, met a pamaakaran so tariwa ni ed kanonotan na totoo. Juan 6:51-71; 3:16.

▪ Parad siopa so pangiteran na laman nen Jesus, tan panon a saraya so ‘mangan na laman to’?

▪ Anto niran salita nen Jesus so amigla ed totoo, balet antoy idadanet to?

▪ Sanen dakel so tinmundan ontumbok ed kinen Jesus, anto so inkiwas nen Pedro?