Say Sankabalgan a Toon Nambilay ed Kapiganman

Kapitulo 56

Anto so Mamarumsis ed Sakey a Too?

Say isusumpa ed kinen Jesus so pinmalalo. Aliwa lambengat a dakel ed saray babangatan to so tinmaynan noagta saray Judio ed Judea so mangegetman sikatoy pateyen, a singa samay ginawa ra sanen sikato so walad Jerusalem legan na Paskua na 31 K.P.

Paskua na 32 K.P. la natan. Maseguro, a mitukoyan ed kakaukolanen na Dios ya onatendi, si Jesus so linma ed Paskua diad Jerusalem. Anggaman ontan, siaalwar a tuloy ton ginawa itan lapud say bilay to so walad kaatapan. Kayari to, sikatoy pinmawil ed Galilea.

Nayarin si Jesus so walad Capernaum sanen saray Pariseo tan eskribas a nanlapud Jerusalem so inmasingger ed sikato. Sikara so manaanap na rason pian sikatoy akusaan na relihyoson panagbuyak na ganggan. “Akin a saray babangatan mo agda sumpalen so ugali na saray mamasiken?” so tepet da. “[Bilang alimbawa,] agda urasan iray lima ra no mangan ira’y tinapay.” Saya so bengatlan agkakaukolanen na Dios, ingen ta ikokonsidera na saray Pariseo a seryoson kasalanan so agpanggawa ed sayan ritual a tradisyon, a mangilalaktip ed panuras anggad saray siko.

Imbes ya ebatan ira nipaakar ed akusasyon da, inimano nen Jesus so marelmeng tan sigagagalan panamuyak da na Ganggan na Dios: “Akin ya agyo met sumpalen so gangan na Dios nisengeg ed ugali yo?” labay ton amtaen. “[Bilang alimbawa,] say Dios inbaga to, Igalang mo’y amam tan inam: tan, Say mansalita na mauges ed ama ono ina, paulian ya ompatey komon ed patey. Bangbalet kuan yo, Siopaman a mangikuan ed ama ono ina to, Say nayarian mo komon a pinabangan lapu ed siak niiter ed Dios; Ag to igalang naani ama to.”

On, saray Pariseo so mangibabangat a say kuarta, kayarian, odino bengatlan indedika bilang panangaro ed Dios so kayarian na templo tan agnausar parad arum a gagala. Ingen, diad katuaan, say indedikan panangaro so wala nin siansia ed samay toon angidedika ed satan. Diad onian paraan et say anak, diad pangibaga labat a say kuarta odino kayarian to so “corban”​—sakey a panangaron indedika ed Dios odino ed templo—​et ompapaliis ed responsabilidad ton tulongan so maedad lan atateng to, a nayarin walad kairapay bilay.

Manepeg ya asanokan ed marelmeng a pamipikewet na saray Pariseo ed Ganggan na Dios, inkuan nen Jesus: “Sikayo ginawa yo ya andikakanaan so salita na Dios nisengeg ed ugali yo. Sikayo [a] mansimpisimpitan, maong so impangiprofeta nen Isaias ed sikayo, a kuan to, Sayan baley igalang to ak ed saray bibil da; Say puso ra balet [so] arawi’d siak. Balet maapa so panangigalang da’d siak, ya ibangat dan singa matuan kakabatan da so bilibilin na saray totoo.”

Anganko ta saray karaklan so sinmener pian abuloyan iray Pariseon manuppiat ed kinen Jesus. Natan, sanen saray Pariseo so agmakaebat ed mabiskeg a balikas nen Jesus ed sikara, pinaasingger toray karaklan. “Amin yo denglen yo ak,” inkuanto, “tan talosan yo: Angapo so bengatla’n manlapu ed paway na too, ya onloob ed sikato a sikato so nayarian to a dutakan: ingen saray bengatla’n onpaway ed too sikara so mandutak ed too.”

Saginonor, sanen sikatoy limoob ed sakey ya abung, intepet na saray babangatan to: “Amtam [ta] ya saray Fariseos asanokan ira, nen nadngel da so saya’n salita?”

“Amin a tanaman ya ag-intanem nen Amak ya mangatatawen, nabagot,” inyebat nen Jesus. “Paulian yo ra: sikara so bulag a manangitonton. Et no say bulag itonton to so bulag, sikara’n dua napelag ira ed abot.”

Ompatnag a si Jesus so nikelawan sanen, diad biang na saray babangatan, kinerew nen Pedro a napalinew no anto so mamaparumsis ed sakey a too. “Anggapo ta met ni pakatalos yo?” (NW), inyebat nen Jesus. “Ag yo [ta] naomameng, ya anto kaman ya onloob ed sangi ontalos ed eges, tan nibantak ed sebekan? Bangbalet saray bengatla’n onbesngaw ed sangi [et] manlapu ra’d puso; et dumsisan da so too. Ta dia ed puso so pawayan na saray mauges a nonot, panagpatey, saray pikakalugoran, saray panaglawan, saray panagtakew, panagtasi ed aliwa’n tua, saray mabanday a salita. Saraya so mandumsis ed too; say panangan balet ya ag urasan so lima [et] ag to dumsisan so too.”

Dia et agdidismayaen nen Jesus so normal a kalinisan. Sikatoy agmikakatunongan ya agla nakaukolan na sakey so panuras na lima to sakbay a mangiprepara na tagano odino mangan. Imbes, kokondinaen nen Jesus so pansimpisimpitan na saray relihyoson pangulo a masilib a manasalin pikeweten iray matunong a ganggan na Dios diad pangipipilit na agmakasulatan iran tradisyon. On, say mauges a kagagawa so mamarumsis ed sakey a too, tan ipapanengneng nen Jesus a saraya so manlalapud puso na sakey. Juan 7:1; Deuteronomio 16:16; Mateo 15:1-20; Marcos 7:1-23; Exodo 20:12; 21:17; Isaias 29:13.

▪ Anton isusumpa so akapaarapan natan nen Jesus?

▪ Anton panamakasalanan so ginawa na saray Pariseo, balet unong ed kinen Jesus, panon a saray Pariseo so sigagagalan mamubuyak na Ganggan na Dios?

▪ Anto so imparungtal nen Jesus a bengabengatlan mamaparumsis ed sakey a too?