Say Sankabalgan a Toon Nambilay ed Kapiganman

Kapitulo 57

Panangabagey Parad Saray Maniirap

Kayari na impamaat ed saray Pariseo ed dilin-pankaabigan iran tradisyon da, si Jesus so tinmaynan a kaiba iray babangatan to. Agni-abayag, nayarin nanonotan mo ni, say impanali ton onarawin kaiba ra pian manpainawan magano so naamper sanen sikaray nalmo na karaklan. Natan, kaiba iray babangatan to, sikato so amaarap ed rehyon na Tiro tan Sidon, a dakel a milya a mamaarap ed amianen. Mapatnag a saya so mogmon baroy a ginawa nen Jesus a kaiba iray babangatan a lampas ed ketegan na Israel.

Kayari na impakalmoy abung a tuloyan, imbaga nen Jesus ya agto labay a naamtaan na siopaman so kawalaan da. Ingen, anggan diad sayan aliwan-Israelitan teritorya, sikato so naimano. Sakey a biin Griego, ya inyanak dia ed Fenicia na Syria, so akalmo ed sikato tan ginmapon akikasi: “Kasian mo ak komon, O Katawan, sika Anak nen David; say ana’ko a bii [so] papairapen [a tuloy] na sakey a demonio.” Anggaman ontan, si Jesus so ag-anggan inmebat.

Kaunoran, imbaga na saray babangatan to: “Sikato komon so patainanen mo; ta manakis ya manumtumbok ed sikatayo.” Diad pangipapaliwawa na rason to ed pangibabaliwala ed sikato, inkuan nen Jesus: “Agak dia nibaki no ag dia’d saray abalang a carnero na abung na Israel.”

Anggaman ontan, say bii so agsinmuko. Inmasingger ed kinen Jesus tan dinmakmomo ed arapan to. Ipipikasi to, “Katawan, tulongan mo ak.”

Agaylan atenyeg angankoy puso nen Jesus diad magunaet a pikakasi na bii! Ingen, impaimano to lamet so manunan responsabilidad to, pian manlingkor ed totoo na Dios ed Israel. Diad parehon bekta, mapatnag pian suboken so pananisia to, sikato so angusar na manangidumaduman panmoria na saray Judio ed saramay arum a nasyonalidad, ya ikakatunongan: “Ag manepeg ya alaen so tinapay na saray ugugaw tan sikato so ibontok ed saray [ankelag ya, NW] aso.”

Diad maabagey a tono na boses tan itsuray lupa to, maseguron imparungtal nen Jesus so mismon matamoy iran liknaan to ed saray aliwan Judio. Pinalemek to ni ingen so panangipara na saray Gentil ed aso diad panutukoy ed sikara bilang “saray ankelag ya aso,” odino oken. Imbes ya naopendi, inanamot na bii so impanukoy nen Jesus ed Judio iran panangidumaduma tan nanggawa na mapaabeban panangimano: “On, Katawan; balet diad tua et saray ankelag ya aso so mangan ed saray mekmek a napepelag manlapud dulang na katawan da.” (NW)

“O bii, baleg so pananisiam,” ebat nen Jesus. “Nagawa ed sika so onong na kaliktan mo.” Tan nagmaliw ya ontan! Kasempet na bii, naimano toy marikit tod dokolan, sigpot ya apaabig.

Manlapud mabaybay a rehyon na Sidon, bineltang nen Jesus tan saray babangatan to so baley, a paarap ed aagusan na Ilog Jordan. Mapatnag a binaliw day Jordan ed bandad tagey na Dayat na Galilea tan linmoob ed rehyon na Decapolis diad bukig na dayat. Diman et tinmatdang ira ed palandey, balet sikaray aromog na karaklan tan inawit ed kinen Jesus iray pukol, baldado, bulag, tan emel, tan dakel iray arum a mansasakit tan walay deperensia. Sikaray impasen ed salian nen Jesus, tan pinaabig tora. Saray totoo so mankelaw, legan a nanenengneng daray emel a mansasalita, saray pukol a makakaakar, tan saray bulag a makakanengneng; tan indayew day Dios na Israel.

Inikdan nen Jesus na nikadkaduman imano so sakey a lakin telek tan ngalngalin agmakasalita. Saray telek so mabetbet a mainomay a nabaingan nagkalautla no walad limog na karaklan. Nayarin naimano nen Jesus so mapalalon nerbyos na sayan laki. Kanian sikatoy maabagey ya inyarawi nen Jesus manlapud karaklan. Sanen akaarawi lara, impaamta nen Jesus so gawaen to ed sikato. Inyan toray gamet to ed saray layag na satan a too tan, kayarin linmukda, diniwit toy dila na satan a too. Insan, tinmangay ed tawen, si Jesus so inmingas na aralem tan inkuanto: “Nalukasan [ka].” Diad saman, say pakadngel na laki so nipawil, tan nayarian to lay makapansalitan normal.

Sanen agawaan nen Jesus irayan dakel a panamaabig, saray karaklan so kinmiwas tekep na pisasalamat. Inkuanda: “Sikato ginawa to so amin a bengatla’n maong; gawaen to ni ya makadngel so telek, tan mansalita so umel.” Mateo 15:21-31; Marcos 7:24-37.

▪ Akin ya agtampol a pinaabig nen Jesus imay anak na biin Griego?

▪ Kayari na satan, iner so angawitan nen Jesus ed saray babangatan to?

▪ Panon a maabagey a pinaabig nen Jesus imay telek a laki a ngalngalin agmakasalita?