“Ag Kayo Onermen, Onong na Singa Saray Arum”

NAIMANOM ta la no panon a singa aka-osdong so sakey a rosas kayari na sakey a bagyo? Diad sakey a paraan et makatenyeg-liknaan a nenengnengen. Anggaman panon met lanlamang, say biglan mabiskeg ya iyuran so maseguron mamaskar ed agnabilang ya ayayep tan too​—mas mabiskeg iran pinalsa nen say antokaman a rosas​—a manapuran mananap na nasiruman. Ingen, say rosas so akaalagey diman, akatanem, ya akaarap ed sigpot a sanok na panaon. Natan, et wadia iya tan akatuek balet ta akatalindeg, mangipapanengneng na biskeg a singano misumlangan ed maletey ya itsura to. Legan a pandinayewen mo iya, nayarin isipen mo no kasin makabawi iya tan nitangwa to so inkaroyroyo to ed tawen lamet.

Ontan met ed totoo. Diad sayan magulon panaon, nidudunget itayo ed amin a klase na bagyo. Kairapan ed ekonomiya, gonigon, saki-sakit, ipapatey na sakey ya inad-aro​—walaray panaon a saratan a bagyo so ondadagsa ed sikatayo, tan no maminsan et agtayo napaliisan iraya a singa no panon ya agnayarin bagoten na rosas so inkasikato tan mananap na pakasalimbengan. Makatenyeg-liknaan a nanengneng na totoo so singano maletey balet mangipapanengneng na makapakelaw a biskeg tan susungdoan so ontan iran ilulusob. Panon dan gagawaen itan? Mabetbet a say tombok et say pananisia. Onia so insulat na agi nen Jesus ed ina a si Santiago: “Amta yo a no say pananisia yo et ontatalona diad iyaarap ed ontan iran subok, say resulta et say abilidad a mansungdo.”​—Santiago 1:3, Today’s English Version.

Sakey nin tombok et say ilalo. Alimbawa, sano inatey so sakey ya inad-aro ed bilay, say ilalo so walaan na baleg a nagawaan parad saray ataynanan. Onia so insulat nen apostol Pablo ed saray Kristiano ed Tesalonica: “Ag mi labay komon ya onpasen kayo ya andi amta, agagi, no nipaakar ed saray naugip; pian ag kayo onermen, onong na singa saray arum ya angapo so ilalo ra.” (1 Tesalonica 4:13) Anggaman maseguron maneermen iray Kristiano lapud ipapatey, wala so sakey a pidumaan. Walaan ira na suston pikakabat nipaakar ed kipapasen na saray inatey tan nipaakar ed ilalo na kioli.​—Juan 5:28, 29; Gawa 24:15.

Sayan pikakabat so mangiiter ed sikara na ilalo. Tan saman met ya ilalo so kalnakalnan mamakepa ed panermen da. Saya so ontutulong ed sikara pian makapansungdo, tan nagkalalo ni. Nasabi panaon, singa saray rosas kayari na bagyo, nitangwa daray ulo ra manlapud ermen tan makaromog na gayaga tan inkapnek ed bilay lamet.