Say Sankabalgan a Toon Nambilay ed Kapiganman

Kapitulo 64

Sakey a Leksion ed Panamerdona

Mapatnag a si Jesus so wala ni’d abung ed Capernaum a kaiba iray babangatan to. Sisingbaten to ed sikara no panon ya aregloen iray agpantatalosan ed baetan na agagi, kanian intepet nen Pedro: “Katawan maminpiga kasi a mankasalanan naani ed siak so agik, tan maminpiga a perdonaen ko?” Lapud say ibabangat na saray managbangat a Judion relihyoso et mamerdona anggad mamitlon danay, nayarin ikonsidera nen Pedro a mabunlok a tuloy so pangisuherin “anga ed maminpito?”

Balet say interon ideya na pangisinop na ontan a rekord so aliwa. Pinetek nen Jesus si Pedro. “Ag ko ikuan ed sika, Anga ed maminpito; ingen, Anga ed maminpitomplo ya pito.” Ipapanengneng to ya agnepeg a limitaan nen Pedro so pamerdona ed agi to.

Pian ipasepsep ed kanonotan na saray babangatan so obligasyon dan magmaliw a manamerdona, si Jesus so angisalaysay ed sikara na sakey ya ilustrasyon. Nipaakar itan ed sakey ya ari a labay toy mipalinewan ed saray ariripen to. Sakey ya aripen so inawit ed sikato a walaan na baleg ya utang a 60,000,000 denaryo. Agto sarag iyan bayaran ed anggan diad anton paraan. Kanian, singa ipapaliwawa nen Jesus, inganggan na ari a sikato tan say asawa to tan saray anak to so ilako tan bayaran so utang.

Diad satan et dinmakmomo so aripen ed salian na katawan to tan akikasi: “Katawan, anosan mo ak komon, ta bayaran kon amin naani ed sika.”

Apakiwas na panangasi parad sikato, say katawan so mapangasin angansila ed baleg ya utang na aripen. Balet agni abayag a satan so ginawa to, intuloy nen Jesus, a sayan aripen so linma tan aromog to so sakey a kaparan aripen ya akautang ed sikato na 100 denaryo lambengat. Dinegkeman na laki so kapara ton aripen ed beklew tan titikelen to, a kuanto: “Bayaran mo so utang mo.”

Balet say kaparan aripen so andian na kuartan ibayar. Kanian sikatoy dinmakmomo ed salian na aripen ya akautangan to, ya ipipikasi: “Anosan mo ak kari, ta bayaran ta ka.” Aliwan singa samay katawan to, say aripen so aliwan mapangasi, tan impaipangaw to so kapara ton aripen.

Bueno, intuloy nen Jesus, saray arum ya aripen ya akanengneng ed agawa so linma tan insalaysay ed katawan. Sisasanok ton impatawag so aripen. “Sika marelmeng ya aripen,” inkuanto, “pinerdonak ed sika so amin ya utang mo, lapu’d akikaskasi ka’d siak. Ag mo komon met nepeg sirin ya kinasian so ibam ya aripen, a singa say inpangasik ed sika?” Asanokan a tuloy, impaipangaw na katawan imay agmapangasin aripen anggad nabayaran ton amin so utang to.

Insan sinampotan nen Jesus: “Ontan met naani gawaen nen Amak a mangatatawen ed sikayo, no sakey tan sakey ed sikayo ag to perdonaen so agi to a manlapu ed puso yo.”

Agaylan sakey a maabig a leksion ed inkamaperdona! No ipareng ed baleg ya utang a kasalanan a pinerdona ed sikatayo na Dios, anggaman anton kasalanan so nayarin nagawaan ed sikatayo na sakey a Kristianon agi so melag a tuloy. Mabetbet, agtayo ingen anggan namamantaan so pankakasalanan tayo sumpad sikato. Sirin, agtayo ta nayarian a perdonaen so agi tayo ed pigaran danay, anggaman sikatayo so walaan na makatunongan a rason pian manreklamo? Tandaan, unong ed imbangat nen Jesus ed Sermon ed Palandey, say Dios so ‘mamerdona ed sikatayo ed saray utang tayo, a singa impamerdona tayo ed saray akautang ed sikatayo.’ Mateo 18:21-35; 6:12; Colosas 3:13.

▪ Anto so amaskar ed kinen Pedro a mantepet nipaakar ed panamerdona ed agi to, tan nayarin akin ya inisip ton mabunlok so pamerdona ed sakey a too na mikapiton danay?

▪ Panon a say inkiwas na ari ed pikakasi na aripen to parad panangabagey so miduma manlapud inkiwas na aripen ed pikakasi na kapara ton aripen?

▪ Anto so naaralan tayo manlapud ilustrasyon nen Jesus?