Say Sankabalgan a Toon Nambilay ed Kapiganman

Kapitulo 63

Nagkalalo Nin Simbawa ed Panametek

Legan a si Jesus tan saray babangatan to so wala ni ed abung ed Capernaum, wala ni sakey a bengatlan siningbat likod ed sangsangan na saray apostol nipaakar ed no siopa so sankabalgan. Saya so sakey ya inkagawa a nayarin agawa met diad ipapawil da ed Capernaum, sanen si Jesus so aliwan personal a wadman. Si apostol Juan so angisalaysay: “Anengneng mi sakey ya manpapapaway na demonio dia ed ngaran mo; et insebel mi ed sikato, lapu’d ag to tinmombok ed sikatayo.”

Mapatnag a momoriaen nen Juan iray apostol bilang sakey a nikadkaduma, tituladon grupo na saray managpaabig. Kanian liliknaen to a say too so manggagawa na makapanyari iran kimey ed agdugan paraan lapud sikato so aliwan kabiangan na grupo ra.

Anggaman kuan, insimbawa nen Jesus: “Ag yo sebelan: ta angapo’y too a mangawa na sakey a makapanyarin gawa dia ed ngaran ko, tan makayari’n magangano a mansalita na mauges nipaakad ed siak. Ta say ag onsumpa ed sikatayo, [sikato’y] iba tayo. Ta siopaman a mangiter naani ed sikayo na san-vaso a danum ya inumen, lapud kien kayo nen Cristo, tua kuan ko ed sikayo, ag to nabalang a balot so tumang to.”

Agmet nakaukolan parad sayan too a literal ya ontumbok ed kinen Jesus pian ondapag ed sikato. Say Kristianon kongregasyon so agni nipaalagey ed saman, kanian say agto pagmamaliw a kabiangan na grupo ra so agmankabaliksan a sikatoy walad sakey a biig a kongregasyon. Say too so peteg a walaan na pananisia ed ngaran nen Jesus tan diad ontan et sikatoy tinmalona ed pamapapaway na saray demonyo. Sikato so manggagawa na bengatlan nipara tan miulibay ed imbaga nen Jesus a makanepegan na sakey a tumang. Ipapanengneng nen Jesus a diad panggawa ed saya, sikato so agmakabalang na tumang to.

Balet anto no say too so nigapol ed saray salita tan kiwas na saray apostol? Saya so magmaliw a seryoson tuloy! Inkuan nen Jesus: “Siopaman a mangigapol na sakey ed saraya ya ankekelag ya ugugaw a manisia ed siak, magmaong ni komon ed sikato no sakey a baleg a bato na gilingan so nisabit ed beklew to, tan ibontok ed dayat.”

Imbaga nen Jesus a saray patumbok to so nepeg a mangiwaklit manlapud kabibilay da na antokaman a mabli ed sikara a singa say sakey a lima, sakey a sali, odino sakey a mata a nayarin sengegan na kagapol da. Magmaong ni andian na sayan papablien a bengatla tan onloob ed Panarian na Dios nen say mansiansian sikatoy walaan na saya tan nibantak ed Gehenna (sakey a mandarlang a bunton na basura ya asingger ed Jerusalem), a mangisisimbolo na andi-anggaan a kadederal.

Impasakbay met nen Jesus: “Nengneng yo ya ag yo modmoraen so sakey ed saraya’n ugugaw: ta kuan ko’d sikayo, ya dia ed tawen saray angeles da sankanengneng dan naynay so lupa nen Amak ya wala ed tawen.” Insan sikato so angiyilustra na kablian na “saraya’n ugugaw” sanen imbaga to so nipaakar ed sakey a toon walaan na sanlasus a karnero balet abalang so sakey. Taynanan na too so 99 pian anapen so sakey a nababalang, so paliwawa nen Jesus, tan sano naromog to iman et sikato so manliket na lalo ni ed saman nen say 99. “Ontan met,” so imbaga natan nen Jesus, “ya ag kaliktan nen Ama yo ya wala ed tawen, ya sakey ed sarayan ankekelag ya ugugaw et natawtaw.”

Nayarin wala ed nonot to so sangsangan na saray apostol to ed inkasikaran dili, impaseseg nen Jesus: “Wala komon so asin ed sikayo, tan manpaknaan so sakey tan sakey ed sikayo.” Saray anggapoy taway a tagano so pananamen na asin. Kanian, say piguratibon asin so manggagawa ed ibabaga na sakey a mainomay ya awaten. Say pakawalaan na ontan ya asin so ontulong a mangipreserba na kareenan.

Balet lapud atooan ya ag-inkayadyari, no maminsan et nagawa so seryoson sangsangan. Si Jesus so angitarok met na pananontonan parad pideneng ed saratan. “No say agim makapankasalanan ed sika,” kuan nen Jesus, “onla ka, ipaliwawam ed sikato so kasalanan to a sikayon dua lambengat: no dengelen to ka, tinalom so agim.” No sikato so ag-ondengel, insimbawa nen Jesus, “mangitagar ka na ibam a sakey ono duara pian dia ed sangi’ duara ono talora a tasi napamintuaan so amin a salita.”

Dia labat ed ultimon remedyo, kuan nen Jesus, awiten so pamaakaran ed “kongregasyon,” (NW) salanti, ed saray responsablin manangimaton na kongregasyon a makapangiter na sakey a hudisyal a desisyon. No say managkasalanan so ag-ontulok ed desisyon da, inkuan nen Jesus, “sikatoy ipasen mo ed sika a singa Gentil tan publicano.”

Diad panggawa na ontan a desisyon, saray manangimaton so nakaukolan a maapit a mangibase ed saray instruksion ed Salita nen Jehova. Kanian, sano nalmoan da so sakey a makasalanan tan makanepegan na dusa, say panangukom ‘so abedber la naani ed tawen.’ Tan sano “okbaran [da] dia ed dalin,” salanti, nalmoan so sakey ya anggapoy kasalanan, satan so asumpal lan “naokbaran naani ed tawen.” Diad satan a pansisimbangan na saray desisyon, inkuan nen Jesus, “no [iner] so kawalaan na duara ono talora a nantitipon nisengeg ed ngaran ko, siak wala ak ed nanleleetan da.” Mateo 18:6-20; Marcos 9:38-50; Lucas 9:49, 50.

▪ Akin ya agnakakaukolan ed agew nen Jesus a miulop ed sikato?

▪ Panon kaseryoso so pamaakaran na pakapangigapol ed sakey a melag, tan panon ya inyilustra nen Jesus so kaimportantian na ontan iran ankekelag?

▪ Anto so nayarin amaskar ed kinen Jesus a pasesegen iray apostol a nawalaan na asin ed inkasikaran dili?

▪ Anto so kabaliksan na ‘panamedber’ tan ‘panangokbar’?