Say Sankabalgan a Toon Nambilay ed Kapiganman

Kapitulo 62

Sakey ya Aral Nipaakar ed Inkamapaabeba

Kayarin pinaabig so ugaw ya aselepan na demonyo ed rehyon ya asingger ed Cesarea Filipos, labay nen Jesus a sikatoy onsempet ed Capernaum. Anggaman ontan, labay ton makapanbokbokor a kaiba iray babangatan to ed baroy pian sikaray niparaan to nin nagkalalo nipaakar ed ipapatey to tan saray responsabilidad da ed saginonor. “Say Anak na too niawat naani ed lima na saray totoo,” paliwawa to ed sikara, “tan sikato naani pateyen da, et dia ed [komatlo’n] agew onoli ed bilay.”

Anggaman nansalita lay Jesus nipaakar ed saya ed asasakbay, tan talora ed saray apostol so aktual ya akanengneng ed panamayawar legan a diad satan et say “itainan” so siningbat, saray patumbok to so siansia nin anggapoy pananisia nipaakar ed pamaakaran. Anggaman anggapo ed sikara so analin mangiburi a sikatoy pateyen, a singa ginawa nen Pedro ed akadkauna, sikara so antakot ya ontepet na malalaglaem nipaakar ed satan.

Diad kaunoran et sikara so akasabi ed Capernaum, a nagmaliw a tuloyan nen Jesus legan na ministeryo to. Satan met so niyanakan a baley nen Pedro tan pigara ed saray arum ya apostol. Diman, saray lalakin mangokolekta na buis ed templo so inmasingger ed kinen Pedro. Anganko ta diad panasalin ilanor si Jesus ed sakey a gutgot diad ag-itutumbok ed kustumbre diman, intepet da: “[Kasin] say managbangat yo ag to bayaran so kapaldua a siklo [na templo]?”

“On,” inyebat nen Pedro.

Nayarin ag-abayag ed saman, si Jesus so akasabi ed abung a walaan na kakabatan ed no anto so agawa. Kanian sakbay a nibaga nen Pedro itan a bengatla, intepet nen Jesus: “Anto so isisip mo, Simon? Saray arari dalin siopa so pansingilan da na impuesto ono buis? Ed saray anak da, ono ed saray sankaili?”

“Ed saray sankaili,” ebat nen Pedro.

“Saray anak ag ira sirin ombuis,” so inimano nen Jesus. Lapud say Ama nen Jesus so Ari ed talba, say Sakey a dadayewen ed templo, peteg ya aliwan legal a kakaukolanen parad Anak na Dios a manbayar na buis ed templo. “Balet, ompan sikara’y naitdan tayo na kagapolan,” inkuan nen Jesus, “onla ka ed dayat, tan manbanwit ka, et alam so sira ya ononan naala; tan sano nalengat mo so sangi to naromog mo’y sakey a siklo [apatira a drakma]: alam itan, tan iter mo ed sikara nipaakar ed siak tan sika.”

Sanen nandoroypo iray babangatan kayari na impawil da ed Capernaum, a nayarin diad abung nen Pedro, intepet da: “Siopa sirin so kabalbalgan ed panariay tawen?” Amta nen Jesus no anto so sengegay impantepet da, a kabat to no anto so nagagawa ed limog da legan a sikaray manumtumbok ed sikato diad ipapawil da manlapud Cesarea Filipos. Kanian intepet to: “Anto so pansasangsangan yo ed dalan?” Abaingan, ag-inmesel iray babangatan, ta sikaray nansasangsangan ed inkasikaran dili ed no siopa so sankabalgan.

Kayari ngangali taloran taon na panbabangat nen Jesus, kasin ompatnag a makapakelaw a saray babangatan so nawalaan na ontan a sangsangan? Bueno, satan so mangipatnag na mabiskeg ya impluensya na atooan ya ag-inkayadyari, ontan met ed relihyoson abenegan. Say Judion relihyon a nipasalan na saray babangatan so mangidadanet ed posisyon odino ranggo ed amin a pidedeneng da. Niarum ni, anganko si Pedro, lapud angisipanan nen Jesus a makaawat na “saray tombok” ed Panarian, so akaliknan sikatoy atagtagey nen say arum. Sikara di Santiago tan Juan so nayarin awalaan na mipadpara iran ideya lapud pagmamaliw dan apaboran a makatasi ed panamayawar nen Jesus.

Antokaman so tua, si Jesus so angipanengneng na makapakiwas a demostrasyon ed gunaet ton ipetek iray walna ra. Tinawag to so sakey ya ugaw, pinaalagey tod pegley da, inyabaray toray lima to ed saya, tan kuanto: “No ag kayo onpawil tan ag kayo magmaliw a singa saray ankekelag ya ugugaw, angan panon ag kayo naani makaloob ed panaria’y tawen. Kanian siopaman ya manpaabeba a singa saya’n melag ya ugaw, sikato lamlamang so cabalbalgan ed panaria’y tawen. Tan siopaman ya mangawat naani na sakey ya ontan a melag ya ugaw ed ngaran ko awaten to ak [met].”

Agaylan makapadinayew a paraan pian ipetek iray babangatan to! Si Jesus so agsinmanok ed sikara tan tinawag iran matangsit, maagum, odino ambisyoso. Andi, noagta inyilustra to so manametek a bangat to diad panangusar na alimbawa na ankekelag ya ugugaw, ya inkalapagan lan masimpit tan bulos manlapud ambisyon tan karaklan so agmaniisip na ranggo ed inkasikaran dili. Kanian impanengneng nen Jesus a saray babangatan to so nakaukolan a mamaaligwas na sarayan kualidad a pakabidbiran na saray mapaabeban ugugaw. A singa impangikuan nen Jesus: “Sikato a mangikondukta ed inkasikato a memelag ed amin yo, saman so baleg,” NW. Mateo 17:22-27; 18:1-5; Marcos 9:30-37; Lucas 9:43-48.

▪ Diad impawil ed Capernaum, anton bangat so inulit nen Jesus, tan panon a satan so inawat?

▪ Akin a si Jesus so aliwan obligadon manbayar na buis ed templo, balet akin a binayaran to itan?

▪ Anto so nayarin amaseseg na sangsangan na saray babangatan, tan panon a sikara so pinetek nen Jesus?