Say Sankabalgan a Toon Nambilay ed Kapiganman

Kapitulo 61

Apaabig so Ugaw ya Aselepan na Demonyo

Legan a si Jesus, Pedro, Santiago, tan Juan so anggapo’d ’man, maseguron walad sakey ya abebbeban pasen na Palandey Hermon, arum a babangatan so nidunget ed sakey a problema. Diad impawil to, tampol ya anengneng nen Jesus a walay bengatlan problema. Wala so karaklan a nanmomongkog ed saray babangatan to, tan saray eskriba so misasangsangan ed sikara. Diad impakanengneng ed kinen Jesus, saray totoo so asurpresan tuloy tan binmatik pian sikatoy ibano. “Anto so pisasangsanganan yo ed sikara?” intepet to.

Sakey a laki so nanlapu ed karaklan, tan tinmalimokor ed arapan nen Jesus tan impaliwawa: “Managbangat, inyakar ko dia ed sika so ana’kon laki, ya walaan na sakey ya emel ya espiritu; Et angan ine’d a pangalaan to ed sikato, sikato’y igeba to: et manbura so sangito, tan manngalatenget so saray ngipen to, tan namagaan: et akisalitaak ed saray babangatan mo pian sikatoy papawayen da komon; et ag da ayarian.”

Saray eskriba so mapatnag a mangaanamot ed insaew na babangatan a paabigen so ugaw, a nayarin mangakantiaw ed saray sagpot da. Diad sayan mismon delikadon bekta, sinmabi si Jesus. “O andian na pananisia a kailalakan,” inkuanto, “anga ed kapigan so panayam ko dia ed sikayo? Anga ed kapigan so pantepel ko ed sikayo?”

Singa ipapaarap nen Jesus iya ed amin a wadman, balet anggapoy duaruwan saratan so nagkalautlan impaarap ed saray eskriba, a manggugulo ed saray babangatan to. Insan, inkuanto so nipaakar ed ugaw: “Sikato’y yakar yo dia ed siak.” Balet sanen samay ugaw so onaasingger ed kinen Jesus, sikato so tinumba na samay demonyon maneselep ed sikato tan sikatoy pinangilet ton tuloy. Say ugaw so nanpigar-pigar ed dalin tan binmuray sangi to.

“Kaonongan la so kabayag to nia nanlapu’d insabi to ed sikato?” intepet nen Jesus.

“Nanlapu la nen sikato’y ugaw ni,” so inyebat na ama. “Tan mabetbet a sikato’y ipelag to nanpadpara ed apuy tan ed saray danum, pian sikato’y bagbagen to.” Insan akikasi imay ama: “Et no nayarian mon gawaen so bengatla, abagey mo kami, tan tulongan mo kami.”

Nayarin pigara lan taon a say ama so onkekerew na tulong. Tan natan, lapud insaew na saray babangatan to, say ermen to so baleg. Diad impakatalos ed saman a kerew na adismayan too, makapaseseg ya inkuan nen Jesus: “[Satan a balikas,] No nayarian mo! [Agayla,] Amin a bengabengatla nayari ed manisia.”

“Manisiaak!” so tampol ya inkelyaw na ama, balet sikatoy akikasi: “Tulongan mo so kulang a pananisiak!”

Diad pakakaimano ed karaklan a manbabagtikan ya onmukot ed sikara, binaat nen Jesus so demonyo: “Sika emel tan telek ya espiritu, igangan ko ed sika, onpaway ka ed sikato, tan ag ka la onloob ed sikato.” Diad itataynan na demonyo, saya lamet so amaeyag ed ugaw tan amakelat a tuloy ed sikato. Insan say ugaw so niparukol ed dalin, kanian dakel ed saray totoo so nankuan: “Sikato’y inatey la!” Balet ta inegnaan nen Jesus so ugaw ed lima, tan sikatoy inmalagey.

Asasakbay, sanen saray babangatan so imbakin manpulong, sikara so akapapaway na saray demonyo. Kanian natan, sanen sikaray akaloob ed sakey ya abung, pribadon tinepetan day Jesus: “Panon a sikato so ag mi ayarian a pinapaway?”

Pian ipanengneng a satan so lapud sikaray kulang na pananisia, inyebat nen Jesus: “Saya a nengneng ag ompaway lapu ed antokaman, nilikod ed pikakasi.” Malinew a nakakaukolan so panagparaan pian napapaway so lalon makapanyarin demonyo a nalalanor ed sayan kaso. Say mabiskeg a pananisia tekep na pikakasin pangekerew na manangiter-biskeg a tulong na Dios so nakakaukolan.

Tan insan inyarum nen Jesus: “No wala komo’y pananisia yo a singa say sakey a bokel na mostaza, kuan yo naani ed saya’n palandey, Onalis ka a manlapu dia ya anga ed saman a pasen; et sikato’y onalis; tan angapo naani agnayari ed sikayo.” Agaylan pakayari so nagawaan na pananisia!

Saray babeng tan irirap a manesebel ed iyaaligwas ed serbisyo ed si Jehova so nayarin ompatnag a singa agnatalonaan tan agniyalis a singa baleg a literal a palandey. Ingen, ipapanengneng nen Jesus a no bayuboan tayo so pananisia ed kapusoan tayo, a sasalogen tan papasesegen itan pian ombaleg, satan so ombaleg anggad satan so ontatken tan mamakayari ed sikatayon natalonaan iray ontan a pinmalandey a babeng tan irirap. Marcos 9:14-29; Mateo 17:19, 20; Lucas 9:37-43.

▪ Anton kipapasen so nipaarapan nen Jesus sanen sikatoy pinmawil nanlapud Palandey Hermon?

▪ Anton panamaseseg so intarok nen Jesus ed ama na ugaw ya aselepan na demonyo?

▪ Akin a saray babangatan so sinmaew a mamapaway ed demonyo?

▪ Panon ya impanengneng nen Jesus so pakayari pananisia?