Say Sankabalgan a Toon Nambilay ed Kapiganman

Kapitulo 60

Sakey a Panengneng na Inkagloria na Panarian nen Kristo

Si Jesus so akasabi ed kabiangan na Cesarea Filipos, tan sikatoy manbabangat ed sakey a karaklan a walad limog da met iray apostol to. Sikato so nanggawa na sayan makapakelaw a balikas ed sikara: “Tua kuan ko’d sikayo, Wala ray arum ed saray wadia, ya angan panon ag da naani natawayan so patey, anga’d pakanengneng da ed Anak na too ya onsabi ed panarian to.”

‘Anto kasi labay ya ibaga nen Jesus?’ so nayarin pankelawan na saray babangatan. Ngalngali sakey simba ed saginonor, impila nen Jesus ira di Pedro, Santiago, tan Juan ed sikato, tan sikara so tinmatdang ed sakey ya atagey a palandey. Nayarin satan so diad labi, lapud saray babangatan so mantemeg. Legan a manpipikasi si Jesus, sikato so anguman-ed-nengneng ed arapan da. Say lupa to so ginmapon sinminag a singa agew, tan say kawes to so nagmaliw a masnag a singa liwawa.

Insan, duaran pigura, ya abidbiran bilang “Moises tan Elias,” so inmapireng tan ginmapon akitongtong ed kinen Jesus nipaakar ed ‘itainan a nasumpal ed Jerusalem.’ Say itataynan so mapatnag ya ontutukoy ed ipapatey tan say onsaginonor a kioli nen Jesus. Kanian, sayan tongtongan so mamapaneknek a say makapabaing ya ipapatey to so aliwan bengatlan nepeg ya arawian, a singa pinilalek nen Pedro.

Sigpot lan abangon natan, saray babangatan so nanbantay tan dinmengel tekep na inkakelawan. Anggaman saya so sakey a pasingawey, pinmatnag a saya so mabilabilay a si Pedro so ginmapon mibiang ed eksena, a kuanto: “Katawan, maong komon no manayam itayo dia: no labay mo, mangawa ak dia na talora’n abung-abung; sakey so onkana’d sika, tan sakey so onkana’d Moises tan sakey so onkana’d Elias.”

Legan a si Pedro so mansasalita, sakey a masnag a lurem so anakbong ed sikara, tan sakey a boses so nankuan manlapud lurem: “Sikatoya so inarok ya Anak, a sikato’y panliketan ko’n maong; sikato so dengelen yo.” Diad impakadngel ed boses, saray babangatan so dinmakmomo. Balet inkuan nen Jesus: “Alagey kayo, tan ag kayo antakot.” Sanen ginawa ra, anggapoy siopaman ya anengneng da noagta si Jesus.

Diad ileleksab da ed palandey ed kaimbuasan, inbilin nen Jesus: “Ag yo ibabaga ed siopaman a too so pasingawey, anga ed say Anak na too onoli ed bilay a manlapu ed saray inaatey.” Say kiwawala nen Elias ed pasingawey so amalesa na sakey a tepet ed kanonotan na saray babangatan. “Akin sirin,” intepet da, “a kuan na saray escribas a si Elias kaokolan ya onla dia ya onona?”

“Si Elias linma la dia,” inkuan nen Jesus, “et sikato’y agda binirbir.” Anggaman kuan, si Jesus so manutukoy ed si Juan a Managbautismo, ya anumpal na sakey a betang a mipadpara ed betang nen Elias. Si Juan so angitarya na dalan parad si Kristo, a singa ginawa nen Elias parad si Eliseo.

Agaylan makapabiskeg so pinaneknekan na sayan pasingawey, nampara ed kinen Jesus tan ed saray babangatan! Say pasingawey so, singa ed panangibaga, et sakey panengneng na inkagloria na Panarian nen Kristo. Saray babangatan so, singa met lanlamang, akanengneng ed “Anak na too ya onsabi ed panarian to,” a singa insipan nen Jesus sakey simba ed asasakbay. Kayari impatey nen Jesus, insulat nen Pedro so nipaakar ed ‘impakanengneng ed katagyan to legan a sikatoy kaiba ra ed masanton palandey.’

Saray Pariseo so kinmerew ed si Jesus na sakey a tanda pian paneknekan a sikato imay sakey ya insipan ed Kasulatan a pinili na Dios ya Ari. Sikara so ag-inikdan na ontan a tanda. Diad biek a dapag, saray maapit a babangatan so inabuloyan a makanengneng ed transpigurasyon nen Jesus bilang panamatua na saray propesiya na Panarian. Kanian, insulat nen Pedro ed saginonor: “Wala met ed sikami so salita na profecia a lalo’n maando [segurado, NW].” Mateo 16:13; 28–17:13; Marcos 9:1-13; Lucas 9:27-37; 2 Pedro 1:16-19.

▪ Sakbay a makataway na patey, panon ya anengneng na arum si Kristo ya oonla’dia ed Panarian to?

▪ Diad pasingawey, nipaakar ed anto so nantongtongan nen Moises tan si Elias a kaibay Jesus?

▪ Akin a sayan pasingawey so sakey a makapaseseg a tulong ed saray babangatan?