Say Sankabalgan a Toon Nambilay ed Kapiganman

Kapitulo 59

Siopan Talaga si Jesus?

Sanen say baloton niluganan nen Jesus tan saray babangatan to so sinmabi ed Betsaida, inawit na totoo so sakey a bulag a laki ed sikato tan akikasi ran diwiten tan paabigen toy too. Intabin nen Jesus imay too ed paway na baley tan, kayarin nilukdaan iray mata to, intepet nen Jesus: “[Kasin] makanengneng ka na bengatla?”

“Makanengneng ak na totoo,” inyebat na too, “ta sikara so naimanok a singa saray kiew, a manaakar.” Diad pangitatapew na saray lima to ed saray mata na too, impawil nen Jesus so pakanengneng ta pian sikatoy makanengneng a malinlinew. Insan pinasempet nen Jesus imay too tekep na bilin a sikatoy ag-onloob ed syudad.

Si Jesus natan so tinmaynan a kaiba iray babangatan to ya amaarap ed baley na Cesarea Filipos, diad mamaamianen a tuloy a parti na Palestina. Satan so andukey a baroy a patatdang a walaay karukey a 50 kilometro, a paarap ed marakep a pasen na Cesarea Filipos, ngalngalin 350 metro ed katagey ed dantal na dayat. Say baroy so ngalngali duay agew.

Legan a sikaray paarap diman, si Jesus so sinmian pian manpikasi. Wala labat lay siamera odino samploran bulan a nakekeraan sakbay na ipapatey to, tan sikatoy mapaga nipaakar ed saray babangatan to. Dakel la so tinmundan ontumbok ed sikato. Arum so mapatnag nagogonigon tan nadidismaya lapud impangipulisay to ed saray sagpot na totoon sikatoy gawaen ya ari tan lapud, sanen sikatoy sinubok na saray sumusumpa to, sikatoy ag-angitarok na tanda manlapud tawen pian paneknekan so inkaari to. Anto so sisisiaen na saray apostol to nipaakar ed pakabidbiran to? Sanen sikaray inmasingger ed pasen a panpipikasian to, intepet nen Jesus: “Siopa ak ed kuan na saray karaklan?”

“Saray arum kuanda’n si Juan a Bautista,” inyebat da, “saray arum, si Elias: tan saray arum, si Jeremias, ono sakey ed saray profetas.” On, isipen na totoo a si Jesus so sakey ed sarayan totoo a pinaoli!

“Sikayo balet, siopaak ed kuan yo?” tepet nen Jesus.

Tampol ya inmebat si Pedro: “Sika so Cristo, ya Anak na Dios a mabilay.”

Kayari impangibalikas na panangabobon ed ebat nen Pedro, inkuan nen Jesus: “Kuan ko met ed sika, ya sika Pedro ka, et dia ed tapew na saya’n baton dampay ipaalagey ko naani so iglesiak; et saray pinto na Hades ag ontalona naani ed sikato.” Dia et inmunan inyabawag nen Jesus a sikatoy mamaalagey na sakey a kongregasyon ya ag-anggan nakautibo na patey iray membro to kayari na matoor a kurang da ed dalin. Insan imbaga to ed si Pedro: “Iter ko naani ed sika so saray tombok na panaria’y tawen.”

Imparungtal sirin nen Jesus a si Pedro so makaawat na nikadkaduma iran pribilihyo. Andi, si Pedro so ag-initdan na manunan pasen ed limog na saray apostol, nisay sikato so ginawan pundasyon na kongregasyon. Si Jesus a mismo so Baton-Dampay a pangipaalageyan na kongregasyon to. Balet si Pedro so ikdan na taloran tombok a diad saratan lukasan to, a singa panangibaga, so pankanawnawa parad saray grupo na totoo pian makaloob ed Panarian na katawenan.

Usaren nen Pedro so unaan a tombok ed Pentecostes 33 K.P. pian ipanengneng no anto so nepeg a gawaen na saray magbabawin Judio pian sikaray nilaban. Sikato so mangusar ed komadua agmabayag kayari pian lukasan so pankanawnawa ed saray Samaritano a makaloob ed Panariay Dios. Insan, diad 36 K.P. et sikatoy mangusar ed komatlon tombok pian lukasan so parehon pankanawnawa ed saray ag-agalsiman a Gentil, si Cornelio tan saray kakaaro to.

Intuloy nen Jesus so pitotongtong to ed saray apostol to. Sikaray dinismaya to diad pangibabaga na irirap tan patey ya agmabayag et arapen to ed Jerusalem. Lapud ag-impakatalos a si Jesus so napaoli ed mangatatawen a bilay, impireg nen Pedro si Jesus. “Sikato so niarawi komon ed sika, Katawan,” inkuanto. “Saya ag komon nagawa angan kapigan ed sika.” Diad ibebeneg, inyebat nen Jesus: “Ekal ka’d arap ko, Satanas: sika’y sakey a makapagapol ed siak: ta ag mo nononoten iray bengatlan nipaakar ed Dios, noag saray bengatlan nipaakar ed saray totoo.”

Mapatnag, arum likud ed saray apostol so manbabaroy a kaibay Jesus, kanian tinawag tora natan tan impaliwawa ya aliwan mainomay so magmaliw a patumbok to. “No siopaman a too labay to’y [ontumbok] ed siak,” inkuanto, “iburi to so inkasikato, et awiten to so cruz [panamairapan a kiew, NW] to, tan [tumboken] to ak. Ta siopaman a mangilaban na bilay to, sikato so nabalang to naani; tan siopaman ya makabalang na bilay to nisengeg ed siak tan say evangelio sikato naani nilaban to.”

On, no paneknekan dan sikaray manepeg ed pabor to, saray patumbok nen Jesus so nepeg a magmaliw a makpel tan masakripisyo-ed-sarili. Insalaysay to: “Ta siopaman a mangibaing ed siak tan saray salitak dia ed saya’n mikakalugoran tan makasalanan ya kailalakan, say Anak na too sikato met so ibaing to naani, sano onla ed gloria nen Ama to pati saray masanton angeles.” Marcos 8:22-38; Mateo 16:13-28; Lucas 9:18-27.

▪ Akin a mapaga si Jesus nipaakar ed saray babangatan to?

▪ Antoran panmoria nipaakar ed pakabidbiran nen Jesus so walad totoo?

▪ Antoran tombok so inter ed kinen Pedro, tan panon a saratan so nausar?

▪ Anton panametek so naawat nen Pedro, tan akin?