Kairapan na Too​—Mangangga Ta Ni?

MAKAPATAKTAKOT iray eksena kayari insabog na sakey a bomba ed matoon tindaan na Sarajevo; saray anggapoy panangasin panpapateyan tan karuksaan ed Rwanda; naeerasan ya ugugaw a mangibibilagat na tagano diad Somalia; naalimoreng iran pamilya a mangukuenta ed kabaleg na perdi ra kayari na yegyeg ed Los Angeles; pakaskasi iran biktima a dinesyang na delap ed Bangladesh. Saratan ya eksena na kairapan na too so inagew-agew a nanengneng ed TV odino ed saray magasin tan saray dyaryo.

Say sakey a makapaermen ya epekto na kairapan na too et say pansesengegan iya na kaandi pananisia na arum a totoo ed Dios. “Say kiwawala na kaugsan so lawas mangitatarok na sankagrabian a pakasbel ed pananisia,” unong ed sakey a balikas ya impalapag na Judion komunidad ed Estados Unidos. Tutukoyen na saray managsulat iray inatey ed saray panangipangawan a kampo a singa say Auschwitz tan manlapud saray bomba a singa samay pinasabog ed Hiroshima. “Say tepet no akin ya aabuloyan na sakey a maptek tan makapanyarin Dios so ontan kinarakel a panangetel ed inosentin bilay so mangogonigon ed konsiensia na relihyoson too tan mamapakilot ed imahinasyon,” kuan na saray autor.

Makapaermen, say mabetbet a tuloy iran report na trahedya so nayarin mamalesa na agpakalikas ed saray emosyon na too. Anggad agnasasaglawi iray kaaro tan kakanayon, naromog na dakel ya agtanton naapektoan nipaakar ed kairapan na arum.

Ingen, say katuaan a sarag tayon manliknay panangabagey, anggan panon et diad saray dilin inad-aro tayo, so nepeg a mangiparungtal na sakey a bengatla nipaakar ed Managgawa tayo. Ibabaga na Biblia a say too so pinalsa ed “kaolibay” tan ed “indengan na Dios.” (Genesis 1:26, 27) Agkabaliksan na saya a ka-itsura na totoo so Dios. Andi, ta insalaysay nen Jesu-Kristo a say “Dios sikato’y sakey ya Espiritu,” tan “say espiritu angapo’y laman tan pokel to.” (Juan 4:24; Lucas 24:39) Say inkagawa unong ed inkaolibay na Dios so manutukoy ed pakasarag tayon mangipatnag na singa-dios a kualidades. Kanian, lapud saray normal a totoo so makaliknay panangabagey ed saray maniirap, nepeg tayon ikuan a say Manamalsa na too, si Jehova a Dios, so maabagey tan mililiknan tuloy ed maniirap a totoon palsa to.​—Ipareng so Lucas 11:13.

Say sakey a paraan a nipapanengneng na Dios so panangabagey to et diad pangitatarok ed katooan na nisulat a salaysay nipaakar ed sengegay kairapan. Saya so nagagawaan to diad Salita to, say Biblia. Malinlinew ya ipapanengneng na Biblia a pinalsa na Dios so too pian mangayaga, aliwan pian manirap. (Genesis 2:7-9) Ipaparungtal to met a saray inmunan too so angitarok na kairapan ed inkasikaran dili diad impangipulisay ed matunong ya uley na Dios.​—Deuteronomio 32:4, 5; Roma 5:12.

Anggaman onia, siansian maabagey so Dios ed maniirap a katooan. Saya so malinlinew a nipapanengneng diad sipan ton panganggaen so kairapay too. “Nia, so tabernaculo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da: Tan punasen to so amin a lua ed kamataan da; tan andi gapo la naani ipatey; tan angapo la naani onnangis o dageyem, o ot-ot: ta saray ona a bengatla sikara so linmabas la.”​—Apocalipsis 21:3, 4; nengnengen met so Isaias 25:8; 65:17-25; Roma 8:19-21.

Sarayan makapakelaw a sipan so mamapaneknek a kabat a tuloy na Dios so kairapan na too tan determinadon panampoten itan. Balet anton talaga so sengegan na kairapan na too, tan akin ya inabuloyan na Dios a mantultuloy itan anggad agew tayo?

[Picture Credit Line ed pahina 2]

Apis tan pahina 32: Alexandra Boulat/​Sipa Press

[Picture Credit Line ed pahina 3]

Kevin Frayer/Sipa Press