Akin ya Onaagliwas Iray Marelmeng?
“AKIN et manbilay so saray marelmeng?” Sayan tepet so abayag lan pinalesa na matoor a Job, tan saya so aminpigan danay ya inulit nanlapulad agew to. Maseguron saya so pilalek a walad kanonotan na dakel a totoo ed teritorya na datin Yugoslavia (a singa say biin nipanengneng ed apis tayo) a maneermen lapud saramay maniirap ed makapakebbiew a bakal. Akin kasin saray totoon marelmeng so makakaliktar tan onaaligwas ni ingen? Singa imbaga nen Job, mabetbet a “saray abung da mareen ira a manlapu ed takot, angan say panaklay na Dios ag nitapew ed sikara.”—Job 21:7, 9.
Kasin kabaliksan na saya ya anggapoy kakanaan na panlingkor ed Dios, say aro ed kaabay, tan say ipapaliis ed panggaway mauges? Andin balot! Iikdan itayo na Biblia na suston panmoria sanen inkuanto: “Agmo panggunaetan a talonaan iray managgawa na kaugsan odino aligen iramay manggawa na aliwa. Lapud singa saray dika et mainomay a nalenes, tan onlabas a singa saray tanaman na subol. Manmatalek ka ed KATAWAN tan manggawa na maptek.”—Salmo 37:1-3, The New English Bible.
On, say singa aligwas na saray marelmeng so temporaryo lambengat. Diad tua, antiktikey so bilay da, bangta saramay manlilingkor ed Dios so walaay maglorian ilalo parad arapen. Agla mabayag, say sipan na Dios so nasumpal: “Punasen [na Dios] so amin a lua ed kamataan da; tan andi gapo la naani ipatey; tan angapo la naani onnangis o dageyem, o ot-ot: ta saray ona a bengatla sikara so linmabas la.” (Apocalipsis 21:4) Saray matunong lambengat, aliwan saray mauges, so makanengneng ed satan a panaon. Agaylan panamaseseg ed iyaasingger ed Dios tan aralen so panggawa ed linawa to, anggan panon lay kauges na saramay walad kaliber-liber tayo.
Anggaman ed sayan magulon mundo, nagamoran yo so liket diad panamegley na suston pikakabat ed Biblia diad Dios, say Panarian to, tan say marakep a gagala to ed katooan. No abrasen yo so kaaruman ya impormasyon o kaliktan yo so sakey a mangikondukta ed sikayo na libren panagaral na Biblia ed abung, ipangasin mansulat ed Watch Tower, P.O. Box 2044, 1099 Manila, odino diad matukoy ya address a nilista ed pahina 2.